‘Qallariymantam qaritawan warmita unancharqa’ (Mateo 19:4).

Jehova * Diosmi casarachirqa Adantawan Evata. Bibliam nin chayllaraq warmita unanchaspan ‘qariman pusasqanta’. Chaymi Adanqa kusikuymanta kaynata nirqa: “Payqa tulluymanta hinaspa aychaymanta kaqmi”, nispa (Genesis 2:22, 23). Jehova Diosqa hinallam kunankamapas munachkan casarasqakuna kusisqa kawsanankuta.

Chayllaraq casarakuqkunaqa piensankupaschá kusisqallaña kawsakunankumanta. Ichaqa maynataña kuyanakuspankupas sasachakuyniyoqmi kanqaku (1 Corintios 7:28). Kay qellqapi Bibliapa nisqankunata kasukuspaykiqa kusisqam kawsakunki casado vidaykipi hinaspa familiaykipipas (Salmo 19:8-11).

 1 JEHOVA DIOSPA KAMACHISUSQAYKITA KASUKUY

BIBLIAM NIN: Qosaqa familiapa umanmi (Efesios 5:23).

Jehova Diosqa munanmi qosakuna warminkuta kuyakuywan uywanankuta (1 Pedro 3:7). Diosqa warmitam unancharqa qosanta yanapananpaq hinaspapas munanmi kuyananta chaynataq respetananta (Genesis 2:18). Señoraykita anchata kuyaspaykiqa manam kikikipa munasqallaykitachu ruwanki, aswanqa pay kusichiytam munanki (Efesios 5:25-29).

Jehova Diosqa munanmi señorakuna qosankuta anchata respetanankuta hinaspa yanapanankutapas (1 Corintios 11:3; Efesios 5:33). Qosayki imatapas tanteaptinqa sonqomanta yanapay (Colosenses 3:18). Chayta ruwaspaykiqa qosaykitawan Jehova Diostam kusichinki (1 Pedro 3:1-6).

¿IMATAM RUWAWAQ?

  • Señoraykita otaq qosaykita tapuy allin qosa otaq señora kanaykipaq imakunapi hinalla kallpanchakunaykimanta. Uyariytaq ima nisusqaykitapas hinaspa kallpanchakuy nisqanman hina ruwanaykipaq

  • Manam chayllaqa entiendenakuwaqchikchu, chaymi pacienciakunayki

2 KUYASQAYKITA QAWACHIY

BIBLIAM NIN: Señoraykipa otaq qosaykipa allinninta maskay (Filipenses 2:3, 4). Jehova Diosqa munanmi serviqninkuna kuyakuq kanankuta, chaynam señoraykiwan otaq qosaykiwanpas kanayki (2 Timoteo 2:24). Imatapas ninaykipaqqa allintam tanteanayki, Bibliam nin: “Nanay simikunam rimanku espadawan tuksichkaq hina. Yuyayniyoq runakunapa rimasqanmi ichaqa hampi hina”, nispa (Proverbios 12:18). Jehova Diospa chuya espiritunmi yanapasunki kuyakuywan rimanaykipaq ​(Galatas 5:22, 23; Colosenses 4:6).

¿IMATAM RUWAWAQ?

  • Diospa yanapakuyninta mañakuy señoraykiwan otaq qosaykiwan imatapas manaraq tanteachkaspayki hinaspa hawkalla kanaykipaqpas

  • Allinta piensay ima ninaykimanta hinaspa imayna ninaykimantapas

 3 HUKLLAÑAM KANKICHIK

BIBLIAM NIN: Huk qariwan warmi casarakuspankuqa ‘huk runa hinallañam kanku’ (Mateo 19:5). Ichaqa wakinpim tanteasqaykichik mana chaynallachu kanqa. Chaymi allin kanman tanteasqaykichik tupananpaq kallpanchakuynikichik (Filipenses 2:2). Huk sonqolla kaynikichikqa ancha allinpunim imatapas tanteanaykichikpaq. ¿Imaynatam chayta ruwawaqchik? Bibliam nin: “Allin consejowanmi ima ruway munasqapas allinqa qespin”, nispa (Proverbios 20:18, Chuya Qellqa, revisión 2012). Imatapas tanteaspaykichikqa Bibliapa nisqanta kasukuychik (Proverbios 8:32, 33).

¿IMATAM RUWAWAQ?

  • Ama imapas ruwaykunallamantachu rimaychik, aswanqa imayna tarikusqaykichikmanta

  • Imatapas manaraq tanteachkaspayki, señoraykita otaq qosaykita tapuy

^ par. 4 Bibliam nin Diospa sutinqa Jehova kasqanta.