Yachachikuypa kasqanman rinapaq

Yachachikuyman rinapaq

Yachachikuykunapa tukupaynin

Yachachikuykunapa tukupaynin

“Iñiywan hinaspa pacienciawanyá Diospa promesan chaskiqkunapa rurasqanta ruraychik” (HEBREOS 6:12).

1, 2. ¿Imanasqataq chaylla kallpanchakunanchik astawan iñiyniyoq kanapaq? Rikchanachiyman hina rimarimuy.

¡MAYNA allinmi iñiyniyoq kayqa! Iñiymanta uyarispaqa chayllam piensanchik ancha allin kasqanpi. Iñiytaqa tupachichwanmi imatapas utqaylla ruwaywan. ¿Imanasqataq utqayman ruwananchik? Manaraq iñiyniyoq kaspaqa iñiyniyoq kanapaqmi utqaylla kallpanchakuna, iñiyniyoqña kaspapas hinallam utqaylla kallpanchakunanchik iñiyninchikpi allinta takyanapaq. ¿Imanasqataq astawan kallpanchakunanchik?

2 Kay rikchanachiypi piensariy, rupaypi puramente yakunayasqa richkawaq mana yakuyuq qalaypaq chunniq karu ñanninta. Yakuta tariruspaqa tomaykuspachá apakusqayki yakutaqa anchata cuidanki rupaywan mana waspirunanpaq. Kay tiempopiqa mana yakuyuq qalaypaq chunniqpi hinam tarikunchik mana iñiyniyoq runakunapa kasqanpi. Chaymi anchata kallpanchakunanchik iñiyninchikpi hinalla takyanapaq, mana chayqa yaku hinam waspirunman otaq chinkarunman. Yaku mana kaptinqa wañuruchwanmi chaynallataqmi iñiyninchik chinkaruptinqa manam atichwanchu Jehova Diospa amistadnin kayta (Rom. 1:17).

3. ¿Imaynatataq Jehova Diosqa yanapawanchik iñiyniyoq kanapaq? ¿Imakunatam chaypaqqa ruwananchik?

3 Diosqa yachanmi iñiyniyoq kayqa ancha allin kasqanta, yachantaqmi kay tiempopiqa iñiyninchikpi takyayqa sasa kasqantapas. Chaymi astawan iñiyniyoq kanapaq Palabranpi qellqachirqa payman sonqo iñiyniyoq runakunamanta. Apostol Pablopa qellqasqanwanmi kaynata kallpanchawanchik: ‘Aswan iñiywan hinaspa pacienciawan Diospa promesan chaskiqkunapa ruwasqantayá ruwaychik otaq qatikuychik’, nispa (Heb. 6:12). Jehova Diospa organizacionninpas kallpanchawanchikmi kay libropi yachamusqanchikman hina Diosman sonqo runakunapa iñiyninkuta qatipakunapaq. ¿Imatataq chaypaqqa ruwananchik? Punta kaq: hinallam kallpanchakunanchik iñiyninchikpi takyanapaq, iskay kaq: hamuq tiempopi Diospa promesankuna cumplikunanpim yuyaymananchik.

4. ¿Imatam Satanasqa ruwarun runakunapa iñiyninwan? ¿Imanasqam Satanastaqa mama manchakunanchikchu?

4 Astawan iñiyniyoq kanapaqyá hinalla kallpanchakusun. Iñiyniyoq kayninchiktam yanqacharuyta munan kay pachapi kamachiq Satanas. Paymi allpantinpi yaqa lliw runakunapa iñiyninta chinkarachin. Iñiyninchikpi hinalla takyanapaqpas manam facilchu. Satanasqa ñoqanchikmanta aswan atiyniyoqmi, ichaqa manam manchakunanchikchu. Atichwanmi iñiyniyoq kaytaqa chaynataq hinalla iñiyniyoq kanapaq kallpanchakuytapas. Jehova Diosqa cheqap  iñiyniyoqkunapa amistadnin kaytam munan. Paypa yanapayninwanqa Satanas Diablotam atipasun, manam karunchawasunchu Diosninchikmantaqa (Sant. 4:7). Iñiyninchikta Satanas mana chinkarachinanpaqmi hinalla kallpanchakunanchik astawan iñiyniyoq kanapaq hinaspa tukuy sonqonchikwan Jehova Diospi confianapaq. ¿Imaynata chayta ruwachwan?

5. ¿Imaynatam ñawpa tiempopi Diosman sonqo runakuna iñiyniyoq kayta atirqaku?

5 Diosta serviqkunaqa manam iñiyniyoqñachu nacerqaku. Iñiyniyoqqa karqaku Jehova Dios chuya espiritunwan yanapaptinmi (Gal. 5:22, 23). Paykunaqa Diospa yanapaynintam mañakurqaku, Diosñataqmi mañakusqankuman hina iñiyninkupi kallpancharqa. Ñoqanchikpas Jehova Diostayá mañakusun chuya espiritunwan yanapawananchikpaq, payqa qowasunmi mañakusqanchikman hina kawsaptinchikqa (Luc. 11:13). Ichaqa, ¿imatawanraqtaq ruwachwan?

6. ¿Imaynatam astawan yanapachikuchwan Diosman sonqo runakunamanta yachaspa?

6 Kay libropiqa Diosman sonqo wakin runakunapa iñiyllankumantam yacharunchik. Bibliapiqa astawanraqmi kachkan (leey Hebreos 11:32). Allinmi kanman sapallanchikpi estudiaspa paykunamanta sumaqta yachayqa. Sapa willakuymantam yachanapaq kachkan achka yachachikuykuna. Yanqa-yanqallata leespaqa manachá atisunchu paykuna hina iñiyninchikpi takyaytaqa. Diosman sonqo runakunamanta yachasqanchikwan vidanchikpi yanapachikunapaqqa paykunamantam qellqanchikkunapi maskaspa allinta yachananchik imay tiempopi kawsasqankumanta. Chaynata estudiaspaqa paykunamantam astawan yachasun ‘ñoqanchik hina sentimientoyoq’ kasqankumanta (Sant. 5:17). Chaywanqa yachasuntaqmi ima sasachakuywanpas imayna sientekusqankumanta.

7-9. a) ¿Ima ninmankutaq ñawpa tiempopi Jehova Diosta serviqkunaqa kay tiempopi yupaychanankupaq niptinku? b) ¿Imata ruwaspam iñiyninchikpi allinta takyasun?

7 Chaymantapas iñiyninchikpim allinta takyasun Jehova Diospa kamachiwasqanchikkunata kasukuspa. Chaymi Biblia nin: ‘Iñiyninchikqa manam valenchu allin kaqkunata mana ruwaptinchikqa’, nispa (Sant. 2:26). Ñawpa tiempopi Diosta serviq runakunaqa mayna kusikuywanchá kasukunmanku karqa kay tiempopi Jehova Diospa kamachisqankunataqa.

8 Piensariy kaypi, ima ninmantaq karqa Abraham kaynata payta niptinku: “Kunanmantaqa Jehova Diostam yupaychanki iñiqmasikikunawan kuska sumaq Salonkunapi chaynataq hatun asambleakunapi, manañam rumimanta ruwasqa altarkunapiñachu Diostaqa yupaychanki”, nispa. Payqa, maynatachá kusikunman chayta uyarispan hinaspa ñawpa tiempomantaraq Diospa prometesqankuna imayna cumplikusqanmanta yachaspan (leey Hebreos 11:13). Otaq Eliasta kaynata ninmanku: “Baal taytacha yupaychaqkunata wañuchinaykimantaqa chaynataq Diosta qepanchaq gobernantepa sasachasqan tarikunaykimantaqa wasin-wasinta rispañam Diospa allin noticianmanta willakuspa  runakunata consuelanki chaynata suyakuyniyoq kanankupaqpas yanapanki”, nispa. Mana iskayrayaspankuchá paykunaqa tukuy sonqonkuwan chaylla kasukunmanku karqa.

9 Chaynaqa iñiyninchikpi hinalla takyanapaqyá kallpanchakusun ñawpa tiempopi Diosman sonqo qarikuna chaynataq warmikuna imayna servisqankuman hina Diosta servispa. Chaynata ruwaptinchikqa kay libropa yachachikuyninkunapa qallariyninpi yachamusqanchikman hinam paykunaqa amistadninchik hina kanqaku. Chaymantapas kawsarimuptinkum paykunawanqa astawanraq amistadta armasun.

10. ¿Imamantam kusikusun sumaq huertayasqa Allpa pachapiqa?

10 Suyakuyninchikpim hinalla hapipakunanchik. Diosman sonqo runakunaqa Jehova Diospa prometesqankuna cumplikunanpim suyarqaku. ¿Chayna suyakuyniyoqchu ñoqanchikpas kanchik? Piensariy, ¡mayna kusikuypaqchá kanqa Diosta serviq runakuna kawsarimuptinku chaskiykuyqa! (Leey Hechos 24:15.) ¿Ñachu piensarunkiña imakunamanta tapunaykipaq?

11, 12. ¿Imakunamantam kawsarimuptinku tapuwaq? a) Abelta. b) Noeyta. c) Abrahamta. d) Rutta. e) Abigailta. f) Esterta.

11 Ichapas Abelta tapuwaq tayta-maman imayna kasqankumanta otaq Eden huertaman yaykunapaq sitiota cuidaq querubinkunawan rimasqanmanta. Noeytaqa yaqapaschá tapuwaq ichapas nefilim hatunkaray runakuna manchakusqanmanta otaq arcapa ukunpi huk watapuni animalkunata imayna cuidasqanmantapas. Abrahamtaqa tapuwaqpaschá Ur llaqtata imayna sonqowan saqesqanmanta otaq cheqaptachu Jehova Diosmanta Sem yachachirqa.

12 Ñawpa tiempopi Diosman sonqo warmikunatapas yaqapaschá tapuyta munanki. Ichapas Rutta tapuwaq Jehova Diosta servinanpaq ima kallpanchasqanmanta. Abigailtañataq tapuwaq Davidta yanapasqanmanta qosan Nabalman willay manchakusqanmanta. Estertawan Mardoqueotañataq ichapas tapuwaq judiokuna librasqanku qepata vidanku imayna kasqanmantapas.

13. a) ¿Imakunamantam ichapas tapuwasun Diosman sonqo runakuna kawsarimuspanku? b) ¿Munankichu ñawpa tiempopi Diosman sonqo runakuna reqsiykuyta?

13 Paykunapas tukuytachá tapuwasun. ¡Mayna kusikuywanchá willasun tukupay tiempo imayna kasqanmanta hinaspa sasachakuykuna kaptin Dios llaqtanta imayna yanapasqanmantapas! Paykunaqa, ¡maynatachá kusikunqaku Diospa lliw prometesqankuna imayna cumplikusqanmanta yachaspankuqa! Chaymantapas paykuna kawsarimuptinkuchá reqsiykuspanchik anchata kusikusun. Ichaqa chay tiempo chayamunankamayá iñiyninkupi yuyaymanasun. Iñiyninkuta qatipakuspaqa paykunawan kuskam wiña-wiñaypaq Jehova Diosta servisunchik.