Diosmi puchukachin llapallan mana allin runakunata, ichaqa Noeytawan familiantam salvan

KAY pachapi runakuna mirasqankuman hinam mana allinkunaqa mirarurqa. Enoc runallachá kay Pachapiqa Diosta servirqa, paymi willakurqa mana allin runakunata Jehová Dios puchukachinanmanta. Ichaqa chay willakusqanmi runakunapa huknin rinrinta yaykuruspan huknintañataq lloqsirurqa, mana allinkunaqa astawanmi yapakururqa. Wakin angelkunapas Diostam qepancharurqaku, hinaspam hanaq pachata saqespa runaman tikrakuruspanku achka warmikunawan casarakurqaku. Chaymi nacerqa nefilim sutiyoq hatunkaray kallpasapa runakuna, paykunam astawan kay Pachapi mana allinkunata huntarachirqaku. ¡Maynatachá Diosqa chayta qawaspan llakikurqa!

Enoc wañukuptinqa karqataqmi allin ruraq Noey runapas. Paymi aylluntin kallpanchakurqaku Diosta agradanankupaq. Huk kutim Jehová Dios tantearurqa lliw mana allinkunata sinchi parawan puchukachinanpaq. Ichaqa manam munarqachu animalkunapas nitaq Noeypas wañunanta. Chaymi nirqa hatu-hatun buqueta otaq arcata rurananpaq. Noeyqa aylluntinmi hinaspa tukuy rikchaq animalkunapas buquemanmi yaykunanku karqa salvakunankupaq. Noeyqa Diosta kasukuspanmi yaqa 40 otaq 50 watakunapi buqueta rurarqa. Chaymantapas runakuna ‘salvakunankupaqmi willakurqa’ (2 Pedro 2:5). Nirqam Sinchi para hichpaykamusqanmanta, ichaqa manam pipas kasurqachu. Hinaptinmi Noeyqa aylluntin hinaspa animalkunapas buqueman yaykunanku karqa. Buquepa punkunta Dios wichqaruptinmi parayta qallakaykamurqa.

40 punchaw, 40 tutan sinchita paramusqanraykum kay Pachaman yaku huntarurqa. Lliw mana allin runakunam wañururqaku. Killakuna pasaptinmi yakuqa asllayarurqa, buqueñataqmi hatun orqopa puntanpi tiyarurqa. Noey aylluntin buquemanta lloqsiruptinkuqa huk watañam pasarurqa. Agradecekuspanmi Noeyqa, Jehová Diospaq ofrendata kañarqa. Diosmi prometekurqa, kay Pachapi kawsaqkunata manaña haykapipas sinchi parawan puchukachinanpaq. Chaytam qawachirqa chirapata rikurichispan. Chirapata rikuspankum runakunaqa yuyarinanku karqa Diospa prometesqanta.

Sinchi para pasaruptinmi Diosqa mosoq kamachikuykunata qorqa. Saqerqam animalkunapa aychanta mikunankupaq, ichaqa manam mikunankuchu karqa yawarta. Kamachirqataqmi enteron pachaman runakuna huntanankupaq. Ichaqa mana kasukuspankum huk llaqtallapi achka runakuna huñunakururqaku hinaspam Nimrod runa kamachiptin hatu-hatun torre rurayta qallaykurqaku. Ichaqa Diosmi saqerachirqa. ¿Imaynata? Chay Babel otaq Babilonia sutiyoq llaqtapi runakunapa rimayninkuta pantarachispan. Mana entiendenakuspankum rurasqankuta saqespa tukuy lawman cheqerurqaku.

(Genesis 6-11; Judas 14, 15 versiculokunamanta.)