Jesusmi qatiqninkunaman rikurin kallpanchananpaq hinaspa mosoq kamachikuykunata qonanpaq

JESUSPA wañusqanmanta kimsa punchaw pasaruptinmi, paypa qatiqnin warmikuna sepulturanman rispanku kichasqata tarirurqaku. Punkun tapaq rumitam asurachisqaku, sepulturapipas manam imapas kasqachu.

Hinaptinmi iskay angelkuna rikuriykuspan, huk kaqnin nirqa: “Qamkunaqa [. . .] Nazaretmanta kaq Jesustam maskachkankichik, payqa kawsarirunñam”, nispa (Marcos 16:6). Utqayllam warmikunaqa apostolkunaman willaq rirqaku. Ñan risqankupim Jesuswan tuparurqaku, hinaptinmi nirqa: “Ama manchakuychikchu, wawqeykunamanyá willamuychik Galilea lawman rinankupaq, chaypiñam tupasaqku”, nispa (Mateo 28:10).

Chaymantam, iskay qatiqninkuna Jerusalenmanta Emaus lawman richkaptinku, huk runa paykunaman asuykuspan tapurqa imamanta rimasqankuta. Chay runaqa kikin Jesusmi karqa, ichaqa manam reqsirqakuchu rikchaynin mana chaynalla kasqanrayku. Paykunam llakikuywan nirqaku Yachachiqninkumanta rimasqankuta, chay runañataqmi Mesiasmanta Bibliapa lliw nisqanta yachachiyta qallaykurqa. Arí, Jesuspim cumplikurqa Mesiasmanta lliw willakuykuna. * Parlasqanku runa espiritu cuerpoyoq Jesus kasqanta musyakuruptinkum chinkarurqa.

Chay iskay qatiqninkunam Jerusalenman kutispanku apostolkunaman rirqaku, paykunaqa punkunkuta wichqakuspankum huñunakuchkarqaku. Pasakusqanmanta willachkaptinkum, llapallanku admirakurqaku Jesus chaypi rikuriykuptin. Jesusmi nirqa: “¿Imanasqataq ñoqa kasqaymanta iskayrayachkankichik?”, nispa. Nirqataqmi: “Qellqasqaman hinamá ñoqa Cristoqa ñakarispa hinaspa wañuspa kimsa punchawninman kawsarimunay karqa”, nispa (Lucas 24:38, 46).

40 punchawkunapim Jesusta achka kutita rikurqaku. Hukpim 500 masnin runakuna rikurqaku. Chaypichá qatiqninkunaman kay allinpuni kamachikuyta qorqa: “Llapallan nacionpi runakunaman rispayá willamuychik qatiqniykunaña kanankupaq [. . .]. Yachachimuychikyá qamkunaman tukuy ima kamachisqayta kasukunankupaq. Sapa punchawmi ñoqaqa qamkunawan kasaq kay pacha puchukanankama”, nispa (Mateo 28:19, 20).

Pasakunanpaqña 11 apostolninkunawan huñunakuspam nirqa: “Chuya Espiritu qamkunaman hamuptinmi atiyta chaskinkichik. Chaymi ñoqamanta willakunkichik [. . .] kay pachapa cantonkama”, nispa (Hechos 1:8). Chaymantam cieloman hoqarikuyta qallaykurqa, hinaptinmi puyukunapi chinkaykurqa.

(Mateo 28; Marcos 16; Lucas 24; Juan 20, 21; 1 Corintios 15:5, 6.)

^ par. 6 Mesiasmanta Bibliapa willakusqankuna Jesuspi cumplikusqantam tarinki kay folletopa 14, 15 hinaspa 16 yachachikuyninkunapi, tarinkitaqmi ¿Imatapunim Bibliaqa yachachin?, niq libropa sapaq yachachikuyninpi “Jesucristo suyasqa Mesiasmanta”.