Abrahamqa Diostam kasukun. Iñiyninraykum Jehová Diosqa prometen miraynin achkallaña kananpaq

SINCHI paramantaqa ñam 350 watakunaña pasarun. Abrahamqa Ur sutiyoq reqsisqa llaqtapim yacharqa, chay llaqtaqa Irak lawpim kachkan. Payqa iñiyniyoq runa kaptinpas, Diosman sonqo kasqanmi pruebaman churakurqa. Qawasunyá.

Jehová Diosmi nirqa llaqtanta saqespan Canaan lawman ripunanpaq. Abrahamqa mana iskayrayaspam kasukurqa. Hinaspam illarqa señoran Sarawan, sobrinon Lotwan chaynataq wasinpi llapallan kaqkunawanpas. Canaanman chayaruspanqa karpakunallapim yacharqa. Diosmi Abrahanwan contratota rurarqa: prometerqam lliw runakuna paynintakama bendecisqa kananmanta, hinaspa mirayninkuna hatun nacion kaspan Canaan allpata dueñochakunankumantapas.

Abrahanwan Lotqa achka ovejayoq hinaspa vacayoqmi rikurirurqaku. Abrahamqa qokuykuq kaspanmi sobrinonta nirqa munasqan allpata akllakunanpaq. Lotqa Jordan mayupa sumaqllaña qechwantam akllakurqa, hinaspam Sodoma llaqtapa hichpallanpi yacharqa. Ichaqa chay llaqtapi runakunaqa mana allin kaspankum millaypaq huchapakusqankuwan Jehová Diosta piñachirqaku.

Rakinakuruptinkum, Jehová Diosqa Abrahamta prometerqa cielopi lucerokuna hina miraynin achkallaña kananmanta. Abrahamqa Diospim iñirqa, ichaqa señoran Saram mana wachakuq karqa. Chaymi, Abraham 99 watanpi hinaspa Sara yaqa 90 watanpi kachkaptin, Diosqa nirqa wawa-churiyoq kanankumanta. Arí, Saraqa qari wawatam wachakurqa hinaspam Isaacwan suticharqaku. Abrahampa huk churinkuna kaptinpas, Eden huertapi prometesqa Libraqqa Isaacpa mirayninmantam kanan karqa.

Chaykamaqa, familianwanmi Lotqa Sodoma llaqtapi hinalla yacharqaku. Payqa allin runa kasqanraykum qepancharqa chay runakunapa huchapakusqankuta. Chaymi Sodoma llaqtata Dios manaraq chinkachichkaptin, puntata angelninkunata kacharqa Lotman willananpaq. Kay angelkunam Lotta nirqaku qepankuta mana qawarispanku familianwan lluptinankupaq. Hinaptinmi Diosqa cielomanta ninatawan azufreta paraykachimurqa, chaypim Sodoma hinaspa Gomorra llaqtakunapi mana allin runakuna wañurqaku. Lotwan iskaynin warmi-churinkunam librakurqaku. Señoranmi ichaqa qepata qawarirurqa, yaqapaschá kapuqninkunata saqesqanrayku. Chaymi wañururqa.

(Genesis 11:10–19:38.)