Josueymi dirigen Canaan nacionta munaychakunankupaq. Jehová Diosmi juezkunata churan enemigonkunamanta llaqtanta librananpaq

CANAAN lawman israelitakuna manaraq yaykuchkaptinkum, Jehová Diosqa Abrahanman prometerqaña chay allpata mirayninman qonanpaq. Josuey dirigiptinmi israelitakunaqa Prometesqa Allpaman yaykunankupaqña kachkarqaku.

Diosmi tantearurqa Canaan runakuna qalaypaq mana allin kasqankurayku chinkachisqa kanankupaq. Chaymi Jehová Diosqa israelitakunata nirqa, Canaan lawpi kaq llapallan llaqtakunata pasaypaqta chinkachinankupaq.

Ichaqa manaraq yaykuchkaptinkum, Josueyqa iskay wateqaqkunata kacharqa. Paykunam Jerico llaqtaman yaykuruspanku Rahab sutiyoq warmipa wasinpi samapakurqaku. Israelitakuna kasqankuta yachachkaspanpas wasinpim pakaykurqa. ¿Imanasqa? Rahabqa yacharqam Jehová Dios milagrokunata ruraspan llaqtanta librasqanta, chaymi paypi iñirqa. Rahabmi wateqaqkunata prometechirqa, Jerico puchukachisqa kaptin paytawan familianta mana wañuchinankupaq.

Chaymantam, israelitakunaqa Canaanman yaykuspa Jerico llaqtata puchukachirqaku. Jehová Diosmi perqankunata tuñirachirqa, hinaptinmi Israel tropakuna runakunata wañuchirqaku, Rahabwan familianmi ichaqa salvakurqaku. Chaynatam 6 watapi Josueyqa tropankunawan, Prometesqa Allpa lawpi yaqa llapallan llaqtakunata munaychakurqaku. Hinaspam chay allpakunata Israel ayllukuna rakinakurqaku.

Wañukunanpaqña kachkaspam Josueyqa lliw israelitakunata huñururqa. Yuyarichirqam Jehová Dios abuelonkunapaq ima rurasqanta, nirqataqmi Diosta hinalla kasukunankupaqpas. Ichaqa, Josueywan yanapaqninkuna wañukuptinkum israelitakunaqa Diosta qepanchaspanku taytacha-mamachakunataña yupaychayta qallaykurqaku. Qatiqnin 300 watakunapim Diospa kamachikuyninkunata achka kutipi mana kasukurqakuchu. Diosñataqmi saqerqa Filistea runakunawan huk enemigonkunapas ñakarichinanta. Ichaqa yanapakuyta mañakuptinkum huk libraqta qorqa. Llapanpiqa 12 libraqkunam karqaku, suticharqakum juezkuna nispa.

Chay tiempomanta Bibliapi willakuq librom, Otoniel juezmanta willakuspan qallarin, tukunñataqmi pimantapas aswan kallpasapa Sanson juezmanta willakuspan. Jueces libroqa allintapunim kayta yachachiwanchik: Jehová Diosta kasukuspaqa allintam kawsasun, mana chayqa sasachakuykunapim tarikusun.

(Josuey; Jueces; Levitico 18:24, 25.)