Yachachikuypa kasqanman rinapaq

Yachachikuyman rinapaq

 114 KAQ WILLAKUY

Mana allin ruraykuna chinkananmanta

Mana allin ruraykuna chinkananmanta

¿IMATAM kaypi qawachkanki? Yuraq caballokunapi tropakunatam. Musyariy maymanta hamusqankuta. ¡Chay caballokunaqa hanaq pachamanta puyupa hawanta kallpamuchkanku! ¿Hanaq pachapichu caballokuna kanman?

Manam, kaykunaqa manapuni ciertopaq caballokunachu. Yachanchikmiki caballokuna puyupa hawanta mana kallpasqanta, ¿aw? Bibliam ichaqa willawanchik hanaq pachapi caballokunamanta. ¿Imanasqataq?

Ñawpapimiki caballokunawan guerrakunapi peleaqku. Bibliaqa hanaq pachamanta caballokunapi runakuna uraykamuqmanta willaspanqa qawachinmi kay Pachapi runakunapa contranpi peleananpaq Diospa hatarisqanta. ¿Imataq chay guerrapa sutinqa? Armagedon, chaypimá mana allin ruraqkunata pasaypaqta puchukachinqa.

Jesusmi Armagedon guerrapiqa peleanqa. Yuyariy, Jehová Diosmi Jesustaqa akllarqa Gobiernonpa reynin kananpaq. Chaymi Jesusqa umanpi coronayoq kachkan. Hinaptin makinpi apasqan espadañataq qawachin Diospa enemigonkunata puchukachinanta. ¿Hukmanyarunchikmanchu Diosqa mana allin ruraqkunata puchukachinanmanta yachaspanchik?

10 kaq willakuyta maskay. ¿Imatam qawachkanki? Sinchi paramá mana allin runakunata puchukachirqa. ¿Pitaq chay Sinchi parataqa chayarachimurqa? Jehová Diosmá. Qawaytaqyá 15 kaq willakuytapas. ¿Imatataq chaypiqa qawachkanki? Jehová Diosmi ninawan Sodoma chaynataq Gomorra llaqtatapas puchukachichkan.

33 kaq willakuytaña qaway. Qawayá Egipto nacionpa tropankunawan caballonkuna imayna tarikusqankuta. ¿Pitaq yakuwanqa paykunata pampaykachirqa? Jehová Diosmá. Llaqtanta yanapaspanmi chaytaqa rurarqa. Chaymanta maskay 36 kaq hinaspa 76 kaq willakuykunata. Chaypim qawanki Jehová Diosqa llaqtantapas mana allin ruraqkuna kaptinku puchukanankupaq saqesqanta.

Hinaptinqa, manamá hukmanyachiwananchikchu kay Pachapi mana allin ruraqkunata puchukachinanpaq Jehová Dios angelninkunata kachamuptinqa. ¿Imataq chaymantaqa kanqa? Qatiqnin willakuypim yachasunchik.