QAWAY angelqa carcelpa punkunta kichaspam Jesuspa apostolninkunata kacharichkan. Yachasunchikyá imanasqataq paykunaqa carcelpi kachkanku.

Jesuspa discipulonkuna chuya espirituta chaskisqankumantaqa manam unayraqchu karqa. Hinaptinmi Jerusalenpi temploman Pedrowan Juanqa huk punchaw tarden lawta rirqaku. Chaypim, punkupa waqtanpi nacesqanmantapuni suchu runa karqa. Runakunam paytaqa sapa punchaw apaqku temploman yaykuq runakunapa limosnata mañakunanpaq. Pedrotawan Juanta rikuruspanmi limosnata mañakurqa. ¿Imatam paykunaqa rurarqaku?

Paykuna sayaykuspanku qawarurqaku. Pedroñataqmi nirqa: ‘Manam kanchu qollqeyqa, aswanqa kapuqllaytam qoyki. ¡Jesucristopa sutinpiyá puriy!’ nispa. Hinaspa Pedro alleq makinmanta hapiykuspa aysariruptillanmi chay runaqa hukta pawarispalla qallaykurqa puriyta. Chay admirakunapaq milagroqa runakunata kusirichirqa.

Pedroñataqmi runakunaman nirqa: ‘Jesusta kawsarichimusqan Diospa atiyninwanmi kay milagrota ruraruniku’ nispa. Pedrowan Juan runakunaman rimachkaptinraqmi sacerdotekuna hamururqa. Paykunam piñasqa kachkarqaku Jesucristo kawsarimusqanmanta Pedro hinaspa Juan runakunaman nisqankuwan. Chaymi paykunata hapiruspanku carcelman hinarurqaku.

Paqarinnintinta sacerdotekunapa jefenkunañataqmi paykunawan kaqkunapiwan huñunakurqaku. Hinaspanmi Pedrotawan Juanta chaynataq sanoyachisqan runatapas pusachimuspanku tapurqaku: ‘¿Pipa sutinpitaq kaykunata rurankichik?’ nispa.

Pedroñataqmi nirqa Jesusta kawsarichimusqan Diospa atiyninwan chayta rurasqankuta. Sacerdotekunaqa manam ima ruraytapas atirqakuchu chay admirakunapaq milagrota qawaspanku. Chaymi apostolkunata amenazarurqaku Jesusmanta amaña rimanankupaq, hinaspa kachaykurqaku.

Qatiqnin punchawkunapiqa, apostolkunaqa hinallam Jesusmanta willakurqaku chaynataq onqoqkunatapas sanoyachirqaku. Chay milagrokunamanta huklaw llaqtakunapipas yacharurqaku. Chaymi Jerusalenpa hichpan llaqtakunamantapas achka runakuna hamuqku onqoqninkuta apamuspanku apostolkuna sanoyachinankupaq. Hinaptinmi sacerdotekunapa jefenkuna envidiakuspanku apostolkunata carcelman hinarurqaku. Ichaqa kaymi pasarqa.

Qawasqaykipi hina chay tutam Jehová Diospa angelnin carcelta kicharuspa nirqa: ‘Temploman rispaykichikyá runakunaman willakamuychik’, nispa. Chaymi achikyaruptillan sacerdotekunapa jefenkuna paykunawan kaqkunapiwan kacharqaku apostolkunata carcelmanta pusamunankupaq, ichaqa manam tarimurqakuchu. Chaymantam templopi tariramuspanku huñunakunanku Cortenkuman pusarurqaku.

Hinaptinmi sacerdotekunapa jefenkuna nirqaku: ‘Ñam kamachirqaykikuña Jesusmantaqa ama yachachinaykichikpaq. Ichaqa Jerusalenpi lliw runakunata yachachichkankichik’ nispa. Hinaptinmi apostolkuna nirqaku: ‘Runakunamanta puntataqa Diostam kasukuna’ nispa. Hinaspanmi hinallata predicaqku. ¡Chayna rurasqankuqa allinmi qatikunanchikpaq!