SAMARIA lawpim Jesusqa samarinanpaq tiyaykurqa pozopa waqtanpi dibujopi qawasqaykiman hina. Discipulonkunañataqmi llaqtata rirqaku mikuy rantiq. Chay warmiqa yaku horqoqmi hamurqa, paytam Jesusqa nichkan: ‘Yakullayki mamáy’ nispa.

Uyariruspanmi warmiqa admirakurqa. ¿Yachankichu imanasqa? Jesusqa judiom karqa, chay warmiñataq Samaria law llaqtamanta. Yaqa llapallan judiokunaqa Samaria law runakunata cheqninku. ¡Manataqmi rimapayankupaschu! Jesusmi ichaqa tukuy rikchaq runakunata kuyakuqmi. Chaymi nirqa: ‘Sichum reqsiwaq pim yaku mañakusuqnikita hinaspaqa ñoqatachá mañakuwankiman kawsachikuq yakuta hinaptinqa qoykimanmi’ nispa.

Hinaptinmi chay warmiñataq nirqa: ‘Señor, manataq imaykipas kanchu yaku horqonaykipaqqa, pozopas ukuraqtaq. ¿Maymantataq qowankiman chay kawsachikuq yakutaqa?’ nispa.

Chaymi Jesusñataq nirqa: ‘Kay yakuta tomaptikiqa mosoqmantam yakunayachikunki. Chay yaku qosqayqa qonqa wiñay kawsayta’ nispa.

Chaymi warmiñataq nirqa: ‘Señor, qoykuwayá chay yakuta manaña yakunayachikunaypaq, chayna kaptinqa manañach hamusaqchu yaku horqoq’ nispa.

Tomanapaq yakumantapuni Jesuspa rimasqantam chay warmiqa piensarqa. Jesusmi ichaqa rimachkan kawsachikuq yaku hina kasqan Diosmanta cheqap willakuykunamantawan chaynataq munaychakuyninmantapas. Chaymanta yachaymi wiñay kawsaytaqa qonman.

Hinaptinmi Jesus nirqa: ‘Qosaykita qayamuspayá hamuychik kuska’ nispa.

Warmiñataq nirqa: ‘Manam kanchu qosayqa’ nispa.

Chaymi Jesus nirqa: ‘Arí, allintam nirunki, ichaqa pichqañam karqa qosaykiqa, kunan kaqwanñataqmi uywanakuchkanki’ nispa.

Chaymi warmiqa admirakururqa Jesuspa nisqan cheqaplla kasqanmanta. ¿Imaynatataq Jesusqa chaykunata yacharqa? Cheqaptamá Jesusqa Diospa kachamusqan Cristom karqa, hinaptin kikin Diosmi paytaqa kaykunata willan. Rimachkaptinkum discipulonkuna chayaramurqaku hinaspam admirakurqaku Samaria law warmiwan Jesus rimaqta qawaykuspanku.

¿Imatam kaykunamanta yachachwan? Jesusqa kuyapayarqa ima castayoq runakunatapas. Chaynallataqmi ñoqanchikpas kananchikqa; manamá mana allinpaqqa pitapas hapinanchikchu ima castamanta kasqanta qawaspallaqa. Jesusqa munan llapallan runakuna wiñay kawsay qoq yachachikuykunata reqsinankutam. Ñoqanchikpas kallpanchakunanchikmi runamasinchikman chaykunamanta yachachinanchikpaq.