Yachachikuypa kasqanman rinapaq

Yachachikuyman rinapaq

 94 KAQ WILLAKUY

Warmachakunata Jesuspa kuyasqanmanta

Warmachakunata Jesuspa kuyasqanmanta

QAWAY Jesusqa warmachatam abrazaykuchkan. Payqa cheqaptamá warmachakunatapas kuyan. Jesusta qawaq runakunañataqmi apostolninkunam. ¿Imatam Jesusqa paykunata nirqa?

Jesuswan apostolninkunaqa karumanta kutimuspankum chayllaraq chayaramunku. Paykunaqa kikinkupuram ñampi atipanakurqaku. Chaymi illamusqankumanta chayaramuspanku Jesusqa tapurqa: ‘¿Imamantataq atipanakustin hamurqankichik?’, nispa. Jesusqa yachanmi imamanta atipanakusqankuta ichaqa paykunata tapurqa willakunankupaq.

Apostolkunam ichaqa upallalla karqaku, ñanpi kikinkupura pim aswan reqsisqa kasqanmanta atipanakusqankumanta. Wakin apostolkunaqa aswan reqsisqa kaytam munanku. ¿Imaynatataq Jesusqa ninqa ancha reqsisqa kayta munayqa mana allin kasqanta?

Jesusqa warmachata qayaspan apostolninkunapa qayllanpi sayachirqa. Hinaspam discipulonkunata nirqa: ‘Cheqaptapunim nikichik: Warmakuna hina mana kaspaykichikqa manam yaykunkichikchu Diospa munaychakusqanmanqa. Chaynaqa kay warma hina humillakuqmi Diospa munaychakusqanpiqa aswan allin reqsisqa kanqa’ nispa. Yachankichu, ¿imanasqataq chaynataqa nirqa?

Warmachakunaqa manamá piensankuchu hatunchakuypi nitaq ancha reqsisqa runa kaypipas. Chaymi apostolkunaqa warmachakunamanta yachaspanku manam hatunchakunankuchu nitaq atipanakunankuchu.

Wakin kutikunapipas, Jesusqa warmachakunata llumpayta kuyasqantam qawachirqa. Chay killakunallapim wakin runakunaqa warmachankunata apamurqaku Jesusta qawaykunankupaq. Hinaptinmi apostolkunaqa Jesusman asuykunankuta harkakurqaku. Jesusmi ichaqa nirqa: ‘Ama harkaychikchu wawakuna ñoqaman hamunanta, kay wawakuna hina kaqkunapaqmi Diospa munaychakusqanqa’ nispa. Hinaspam warmachakunata abrazaykuspan bendeciykurqa. ¡Mayna sumaqmi warmachakunata Jesuspa kuyasqanta yachayqa! ¿aw?