waranqantin waranqantin runakunam babiloniamanta Jerusalenkama karu illana kaptinpas rirqaku. Chayaruptinku ichaqa Jerusalenqa mana runapa yachanan purmasqa kasqa. Chaymi Israel casta runakunaqa yapamanta llapallanta hatarichinanku.

Puntataqa, hatarichirqakumá allin tiyaq altarta. Chaypa hawanpi Jehová Diospaq animalkunata wañuchispanku kañapurqaku. Qatiqnin killakunallapim Israel casta runakunaqa templo hatarichiyta qallarirqaku. Hinaptinmi hichpallankupi kaq nacionkunapi enemigonkunaqa hukmayachispanku harkaruyta munarqaku. Chaymantam chay runakunaqa Persia nacionpi kaq reywan decretota rurachirqaku templo hatarichisqankuta sayachinankupaq.

Babiloniamanta Israel casta runakuna kutimusqankumantaqa 17 watañam pasarurqa. Diosmi willakuqnin Hageota chaynataq Zacariastapas kacharqa Israel runakuna llaqtankuta hatarichinankupaq. Diospi hapipakuspanku kasukurqaku. Manaña llamkanankupaq kamachichkaptinkupas paykunaqa templo qespichiypi hinallam kallpanchakurqaku.

Chaymi, Persia nacionpa huknin llaqtachanpi gobiernaq Tatnai hamuspan tapurqa imanasqam templota hatarichisqankuta. Hinaptinmi Israel runakunañataq nirqaku Babilonia nacionpi kamachikuq rey Cirom kaynata nirqa: ‘Jerusalen llaqtaman rispa Jehová Diospaq templota hatarichipuychik’ nispa.

Hinaptinmi Tatnaiqa Babiloniaman cartata apachispa tapurqa cheqaptachu rey Ciroqa kawsachkaspanraq chaynata kamachinman karqa. Hinaptinmi Persia nacionpa reyninqa cartaykuspam rey Ciropa nisqanqa ciertopaq kasqanta nirqa. Nirqataqmi kaynatapas: ‘Ama michakuychikchu judiokunapa Diospa templon chaypi ruranankuta. Ñoqataqmi kamachimuykichik yanapanaykichikpaq’ nispa. Templota qespichirqaku yaqa tawa watapi, hinaptinmi judiokunaqa kusikurqaku.

Templota qespichisqankumantaqa 48 watapiñam kachkanku hinaptin tiempopa risqanman hina Jerusalen llaqtapiqa wakcham runakunaqa karqaku, hinaspa llaqtapas chaynataq templopas manam kusikunapaqchu karqa. Hinaptinmi Babilonia nacionpi Israel castamanta Esdras runaqa yacharurqa Diospa templon arreglanapaq kasqanta. Hinaptin, ¿yachankichu imatam payqa rurarqa?

Esdrasqa Persia nacionpa reynin Artajerjesman rirqa, hinaptinmi chay allin ruraq reyqa regalokunata Esdrasman qorqa Jerusalenman apananpaq. Esdrasqa Babilonia nacionpi kaq Israel casta runakunatam Jerusalenman rispanku yanapanankupaq nirqa, chaymi 6.000 runakuna rinankupaq nirqaku. Hinaptinmi achka qori-qollqetawan tukuy ima allin kaqkunata aparikuspanku pasakurqaku.

Esdrasqa risqanku llaqtakunapi mana allin runakuna kasqanmanta hukmayasqa kachkarqa. Chay runakunachiki apasqanku qori-qollqenkuta suwaruspanku paykunatapas wañurachinmanku. Chaymi dibujopi qawasqaykiman hina, Esdrasqa runakunata huñururqa. Hinaspanmi Jehová Diosta mañakurqaku Jerusalenman chayanankukama cuidaykunanpaq.

Jehová Dios paykunata cuidaptinmi tawa killa illaruspanku Jerusalenman chayarurqaku. ¿Manachu kayqa qawachiwanchik Jehová Diosqa paypi hapipakuqkunataqa cuidasqanta?

Esdras 2:1-8:36.