JEROBOAMPA wañukusqan qepataqa 10 ayllukunapi norte law Israel nacionpi gobiernaqkunaqa mana allin ruraqmi karqaku. Astawan mana allin ruraqqa Acab sutiyoq reymi karqa. ¿Yachankichu imanasqa? Jezabel sutiyoq mana allin ruraq reina qosanta umachaptinmi.

Jezabelqa manam Israel casta warmichu. Sidon llaqtapi reypa warmi churinmi karqa. Payqa Baal sutiyoq taytachata servispa adorarqa, hinaspa qosan Acabta chaynataq Israel runakunatapas Baal taytachata adoranankupaq umacharqa. Jezabelqa Diospa willakuqninkunata achkallataña wañurachirqa Jehová Diosta cheqnispan. Wakin willakuqkunaqa mana wañunankupaqmi machaykunapi pakakurqaku. Imatapas Jezabel munaptinqa, munasqanta rurananpaq pitapas wañuchinmanmi.

Rey Acabmi huk punchaw llakisqa kachkarqa. Chaymi Jezabelqa tapurqa: ‘¿Imanasqataq llakisqa kachkanki?’ nispa.

Chaymi Acabñataq nirqa: ‘Nabot sutiyoq runapa uvas huertanta rantikuruyta munarqani. Ichaqa manam qoykimanchu nispam niwarqa’ nispa.

Chaymi warmin Jezabelqa nirqa: ‘Nabotpa uvas huertantaqa ñoqam qosqayki’ nispa.

Hinaptinmi Nabotpa yachasqan llaqtapi autoridadkunaman Jezabelqa cartata qellqaspa nirqa: ‘Mana allin runakunatayá maskaychik Nabot sutiyoq runapa contranpi llullakuspa: Diostawan reytam insultarqanki ninankupaq. Llaqtamanta hawaman pusaspaykichikmi rumiwan choqaspa wañurachinkichik’ nispa.

Nabot sutiyoq runa wañurusqanta Jezabel yacharuspanmi Acabta nirqa: ‘Rispaykiyá Nabotpa huertanta dueñochakamuy’ nispa. ¿Manachu chayna mana allinta rurasqanmanta Jezabelta castiganmanku?

Chaymi Jehová Diosqa Jehu sutiyoq runata kacharqa Jezabelta castigananpaq. Jezabelñataqmi Jehu chayamusqanta yacharuspan ñawinkunata pintakuruspan ima sumaqllataña allichapakururqa. Hinaptinmi Jehu chayaramuspa Jezabelta ventanapi qawarispan, reypa wasinpi serviqkunata nirqa: ‘Chay warmita wischuykamuychik’ nispa. Paykunañataq kasukurqaku, dibujopi qawasqaykiman hina wischuykamuptinku supa-aparurqa. Chaynatamá mana allin ruraq Jezabel sutiyoq reinaqa wañurqa.

1 Reyes 16:29-33; 18:1-4; 21:1-16; 2 Reyes 9:30-37.