WATAKUNAM hinalla pasachkan... ¡10 wata, 20 wata, 30 wata, 39 wata! Israel runakunam ichaqa hinallaraq chunniqpi kachkanku. Chay watakunapim Jehová Diosqa llaqtanta cuidarqa. Maná nisqa sutiyoq mikuyta mikuchispa. Punchawpi sayanpa puyuwan pusarqa, tutañataq sayanpa ninawan. Chaynallataq pachankupas manam tukurqachu nitaqmi chakinkupas nanarqachu.

Egipto nacionmanta lloqsisqankumantaqa 40 watapa punta killanña. Cades sutiyoq llaqtaman Israel runakunaqa kaqllata kutirurqaku. Kaypim kachkarqaku yaqa 40 wata ñawpaqta 12 wateqaqkunata Canaan allpaman kachaptinku. Kay llaqtapim Moisespa panin Mariaqa wañukurqa. Ñawpaqpi hina kaypiqa sasachakurqaku.

Runakunaqa yakuta mana tarispanku Moisesman quejakurqaku: ‘Amalaya wañukuchwan karqa. ¿Imapaqtaq Egipto nacionmanta pusamuwarqankiku kay mana imapa kanan sitioman? Kaypiqa manam tarpuchwanchu imatapas. Manam kanchu higospas, uvaspas, granadapas nitaq tomanaykupaq yakupas’ nispa.

Moiseswan Aaronqa Diosman asuykuna karpaman mañakuq pasarqaku, hinaptinmi Jehová Diosqa Moisesta nirqa: ‘Runakunata huñuychik. Paykuna qawachkaptinmi qaqata rimapayanki. Hinaptinmi chay qaqamanta lloqsimuq yakuta runakuna tomanqaku chaynataq animalkunapas’ nispa.

Chaymi Moisesqa runakunata huñuruspan nirqa: ‘¡Uyariychik llapa mana kasukuqkuna! ¿Yaqachum Aaronwan kay qaqamanta yakuta pawarachimusaqku?’, nispa. Hinaptinmi Moisesqa tawnanwan iskaykama qaqata waqtarurqa, chaymi achka yaku pawaramuptin runakunapas chaynataq animalkunapas tomarqaku.

Jehová Diosmi ichaqa Moisespaq chaynataq Aaronpaqpas piñakururqa. ¿Yachankichu imanasqataq? Moiseswan Aaronqa nirqaku paykuna qaqamanta yakuta pawachinankuta. Ichaqa Jehová Diosmi chaytaqa rurarqa. Hinaspa chay pasasqanmanta cheqapta mana willakuptinku Jehová Diosmi paykunata castigananpaq nirqa: ‘Canaan allpamanqa llaqtayta mana yaykuchinkichikchu’ nispa.

Chayllaraq Israel runakunaqa Cades llaqtamanta lloqsirurqaku. Hinaptinmi Hor sutiyoq orqoman chayarurqaku. Aaronmi wañukurqa chay orqopa puntanpi 123 watanpi kachkaspa. Aaronpa wañukusqanmantam Israelpa mirayninkuna 30 punchaw waqarqaku. Aaronpa churin Eleazarñam Israel nacionpi sacerdotekunapa jefenqa karqa.

Numeros 20:1-13, 22-29; Deuteronomio 29:5.