¿IMANASQATAQ Jerico llaqtapa murallanqa tuñichkan? Yaqapas bomba toqyasqanman hinam tuñichkan. Chay tiempopiqa manam karqaraqchu bombakunapas nitaq cañonkunapas. ¡Chaypas Jehová Diospa milagronmi! Qawasunchik imaynam chayqa karqa.

Jehová Diosmi Josueyta nirqa: ‘Soldadoykikunawanmi huk kutita sapa punchaw llaqtata muyumunkichik. Chaynatam rurankichik soqta punchaw. Apaychik contrato baulta. Ñawpaqnintam rinqaku qanchis sacerdotekuna carneropa waqranmanta cornetankuta tocastin.’

‘Qanchis kaq punchawpim llaqtata muyurimunkichik qanchis kutita. Cornetata unay neqta tocaptinku, llapallaykichik sinchita qaparinkichik. ¡Hinaptinmi llaqtapa murallanqa tuñirunqa!’, nispa.

Hinaptin, Josueyqa llaqtantinmi Jehová Diospa nisqanman hina rurarqaku. Jerico llaqtata muyurinankukama upallallam rirqaku. Cornetankuta tocasqallanku chaynataq muyuriqkunapa sarusqallankum uyarikurqa. Israel runakunapa enemigokuna Jerico llaqtapiqa mancharikurqakuchá. ¿Rikuchkankichu chay guindo waskata ventanapi warkusqata? ¿Pipam chay wasiqa? Rahabmá iskay wateqaqkunapa nisqanta kasukurqa. Wasin ukupim ayllunwan suyachkanku.

Hinaptinmi, qanchis kaq punchawpi qanchis kutikama muyuramuspankuña cornetankuta tocarqaku chaynataq soldadokuna qapariptinku murallaqa tuñiykamurqa. Chaymanta Josuey nirqa: ‘Wañuchiychik llaqtapi kaqkunata hinaspa kañaychik tukuy chaypi kaqkunata, aswanqa qorimanta, qollqemanta, broncemanta hinaspa fierromanta kaqkunaqa Jehová Diospa tesoronman yapasqam kanqa’ nispa.

Hinaptinmi iskaynin wateqaqkunata Josueyqa nirqa: ‘Wasinmanta horqomuychik Rahab warmita chaynataq llapallan aylluntapas’ nispa. Paykunallam salvakurqaku, wateqaqkunapa prometesqankuman hina.

Josuey 6:1-25.