Yachachikuypa kasqanman rinapaq

Yachachikuyman rinapaq

 41 KAQ WILLAKUY

Bronce culebrata rurasqankumanta

Bronce culebrata rurasqankumanta

KASPIPI arwisqa culebraqa, ¿cheqapchu kanman? Manam. Broncemantam rurasqa kachkan. Moisestam Jehová Diosqa nirqa kaspipi churaykunanpaq chayta qawaspanku runakuna mana wañunankupaq. Pampapi wakin culebrakunam ichaqa kawsachkanku. Runakunata kachuspa wañuchirqaku. ¿Yachankichu imanasqataq chayna karqa?

Diospa contranpi chaynataq Moisespa contranpi runakuna quejakusqankumanta. Paykunam nirqaku: ‘¿Imapaqtaq Egipto nacionmanta horqomuwarqankiku kay chunniqpi wañunaykupaqqa? Manam mikuypas nitaq yakupas kanchu. Amirunikuñam kay mana gustasqayku mikuytapas’ nispa.

Maná nisqa sutiyoq mikuyqa allinninkupaqmi. Chayqa Jehová Diospa milagronmi karqa. Milagrowantaqmi yakutapas qorqa. Runakunañataqmi Diospa cuidasqanta mana agradecekunchu. Chaymi Jehová Diosqa kachaykamurqa venenoyoq culebrakunata runakunata castigananpaq. Culebrakuna runakunata kachuptinku achkallaña wañukunku.

Chayraq chay runakunaqa Moisesman rispanku nirqaku: ‘Huchallikurunikum Jehová Diospa contranpi hinaspa qampa contraykipi rimaspayku. Mañakuyá payta kay culebrakunata ñoqaykumanta chinkachinanpaq’, nispa.

Chaymi Moisesqa paykunapaq mañakurqa. Hinaptinmi Moisesta Jehová Dios nirqa kay broncemanta culebrata rurananpaq. Kaspipa puntanman churananpaqpas hinaspa pitapas culebrakuna kachuptinqa chayta qawanankupaq nirqa. Diospa nisqanman hinam Moisesqa rurarqa. Hinaptinmi culebrakunapa kachusqan runakuna chay bronce culebrata qawaspanku sanoyarqaku.

Kaykunamanta yachasqanchikqa allinninchikpaqmi kanman. Llapallanchikmi culebrakunapa kachusqan Israel runakuna hina kanchik. Musyariy, llapallan runakunam onqospa, machuyaspa wañunku. Kayna sasachakuyqa kachkan Adanwan Eva punta kaq runakuna Jehová Diosta qepanchasqankumanta, hinaptinmi ñoqanchikqa paykunapa churinkunam kanchik. Jehová Diosmi ichaqa sumaq arreglota rurarqa wiñay kawsayta haypananchikpaq.

Churin Jesucristotam Jehová Diosqa Allpaman kachamurqa. Achka runakuna mana allin runapaq hapispanku Jesusta qerupi warkururqaku. Jehová Diosmi ichaqa Jesusta kachamurqa salvawananchikpaq. Paypi iñispa rurasqanta qatikuspanchikqa wiñay kawsayta haypanchikmanmi. Chaymantañam kaykunamantaqa astawan yachasunchik.

Numeros 21:4-9; Juan 3:14, 15, NM.