¿RIKUCHKANKICHU pikunamanmi Dinaqa watukuq richkan? Canaan lawpi yachaq sipaskunata qawaqmi richkan. ¿Kusikunmanchu taytan Jacobqa chay rurasqanwan? Kay tapukuyta kutichinaykipaqqa musyariy, imatataq piensarqaku Abraham hinaspa Isaacpas Canaan lawpi warmikunamanta.

¿Munarqachu Abrahamqa churin Isaac Canaan lawpi sipaswan casarakunanta? Manam. ¿Munarqakuchu Isaacwan Rebecaqa churin Jacob Canaan lawpi warmiwan casarakunanta? Manam. ¿Yachankichu imanasqataq?

Canaan lawpi runakunaqa taytacha-mamachakunata yupaychaqkuna kasqankuraykuyá. Paykunaqa manam allin runakunachu karqaku casarakunankupaq nitaq amigonkuna kanankupaqpas. Chaymi Jacobqa manamá kusikurqachu warmi churin Canaanpi sipaskunapa amistadninta maskaptinqa.

Sasachakuytam Dinaqa maskarqa. Dibujopi, ¿qawachkankichu chay Cananeo qari imaynam Dinata qawasqanta? Sutinmi Siquem. Huk punchawmi sipaskunata Dina watukuchkaptin Siquem runa Dinata abusarurqa. Kayqa mana allinmi karqa, warmi-qari puñunankupaqqa casarakunankum. Siquem runa Dinata mana allinta rurarusqanmantam astawan sasachakuykuna karqa.

Dinata pasasqanmanta turinkuna yacharuspankuqa anchatam piñakururqaku. Chaymi iskaynin turinkuna Simeonwan Leviy ancha-anchata piñakuruspanku espadankuta hapispa qonqayllamanta llaqtaman yaykururqaku. Wawqenkunawanmi paykunaqa Siquemta hinaspa llapallan runakunata wañurachirqaku. Jacobqa anchata piñakururqa churinkuna chay mana allinta rurasqankumanta.

¿Imaynatamá kay sasachakuypi tarikurqaku? Diospa kamachikuyninkunata mana kasukuq runakunawan Dina juntanakusqanmantam. Ñoqanchikpas manach chayna amistadkunata maskasunchu, ¿aw?

Genesis 34:1-31.