BUQUEMAN mana yaykuq runakunaqa, hina kaq vidallankupim kawsakuchkarqaku. Manaraqmi creerqakuchu sinchi Para chayamunanta. Supa-supaytachá asikurqaku. Ichaqa qonqayllamantam upallarurqaku.

Chayllam cielomanta yaku taqtaykusqa hina parayta qallaykurqa. ¡Cheqaptamá Noeyqa rimarqa! Manañam pipas buquemanqa yaykuyta atirqañachu. Jehová Diosmi buquepa punkuntaqa allinta wichqarurqa.

Chayllam Allpapiqa yaku qocharurqa. Hatun mayukuna hinaraqmi yakupas rikurirurqa. Yakukunaqa qaparispanmi sachakunata hinaspa hatun rumikunatapas aparqa. Runakunaqa mancharikuspanku orqokunaman qespirurqaku. ¡Maynataraqchá ñakakurqaku mana kasukusqankumanta hinaspa buquepa punkun kichasqaraq kachkaptin mana yaykusqankumantapas! Manañamá yaykuytaqa atirqakuñachu.

Yakum aswan-aswanta yapakururqa. Cielomantam tawa chunka punchaw tawa chunka tutan paramurqa. Llumpa-llumpayta huntaruspanmi alto orqokunatapas hayparqa tapaykunankama. Diospa nisqanman hina, buqueman mana yaykuq runakuna hinaspa animalkunapas wañururqaku. Buque ukupi kaqkunallam salvakurqaku.

Noeywan churinkuna buqueta ruraspankuqa allintam rurarqaku. Yaku hoqariruptinmi buqueqa yakupa hawanpi muyurqa. Chaymantam para usyaruptin Intiqa kanchaykamurqa. ¡Waw! Yakullam enteron Allpata pamparusqa. Yakukunapa hawanpiqa buquellam muyurqa.

Hatunkaray runakunaqa manam kasqañachu. Manañam runakunata ñakarichinmankuñachu. Llapallanku wañururqaku mamankunawan wakin runakunapiwan. Taytankutaqa, ¿imataq pasarqa?

Hatunkaray runakunapa taytankuqa manam ñoqanchik hina runakunachu karqa. Angelkunam karqaku, paykunaqa runakuna hina kawsanankupaqmi kay Allpaman hamurqaku. Chaymi sinchi Para chayaramuptin mana wakin runakunawanchu wañurqaku. Runa cuerponkuta saqeruspanku angelkuna hinaña hanaq pachaman kutikurqaku. Ichaqa manañam Diosninchikpa angelninkunañachu karqaku. Aswanqa Satanaspa angelninkunañam rikurirurqaku. Kay angelkunatam Bibliaqa sutichan supaykuna nispa.

Diosmi wayrata pukuchimuptin yakukuna asllayayta qallaykurqa. Pichqa killa pasaruptinña buqueqa orqopi tiyarurqa. Achka punchawtaraqmi suyarqaku orqokunatapas qawanankupaq. Yakukunam aswan-aswan asllayarqa.

Noeyqa cuervo sutiyoq pawaq animaltam kacharirqa. Chaymi kayman-chayman pawarqa mana maypipas tiyananpaq tarispa. Kaynatam sapa kuti rurarqa hinaspa buquepa qatanman kutimuspan tiyaykurqa.

Noey yakukuna asllayarusqanta yachayta munaspanmi palomata kacharirqa. Chay palomaqa mana maypi tiyananpaq tarispam kutikaramurqa. Chaymanta kaqllamantam Noeyqa palomata kacharirqa, hinaptinmi kutiramurqa aceitunas sachapa rapinta apamuspa. Yakukunaqa asllayarusqaña. Huktawan palomata Noey kachariptinmi palomaqa manaña kutimurqañachu.

Diosmi Noeyta kaynata nirqa: ‘Buquemanta lloqsiy. Lloqsichuntaqyá aylluykikunapas hinaspa animalkunapas.’ Wata masraqmi buque ukupi karqaku. ¡Maynataraqchá kusikurqaku mana wañuspanku hinalla Allpapi kawsakunankupaq salvakusqankumanta!

Genesis 7:10-24; 8:1-17; 1 Pedro 3:19, 20.