Romanos 14:1-23
14 Diospa munayninmanta manaraq sumaqta yachaq iñiqmasikichiktaqa kusikuywanyá chaskiychik,+ ichaqa sapakamapa ima piensasqaykichiktaqa* amayá mana allinpaqqa hapiychikchu.
2 Diospa munasqanta allinta yachaq runaqa tukuy imatam mikun, manaraq sumaqta yachaqmi ichaqa verdurakunallata mikun.
3 Imapas mikuqqa amayá mana mikuqtaqa pinqachunchu, mana mikuqpas amataqyá imapas mikuqtaqa pinqachunchu,+ Diosmi paytaqa allinta chaskiykun.
4 ¿Pitaq qamqa kanki hukpa serviqninta juzganaykipaqqa?+ Patronllanmi ninman allin utaq mana allin ruwasqantapas.+ Chiqaptapunim payqa Jehova* Dios yanapaptin paypa chaskisqan kanqa.
5 Wakinmi huk punchawta aswan allinpaq hapinku,+ wakinñataqmi ima punchawtapas chaynallapaq hapinku.+ Sapakamayá ama iskayrayachunchu imapas tantiasqanmantaqa.
6 Ima punchawtapas aswan allinpaq hapiq runaqa Jehova* Diostam hatunchan. Ima mikuqpas Jehova* Diostam hatunchan mikusqanmanta agradecekusqanrayku,+ mana ima mikuqpas Jehova* Diostam hatunchan mana mikuspapas agradecekusqanrayku.+
7 Manam mayqinninchikpas kikinchik hatunchasqa kanapaqchu kawsanchik+ nitaq kikinchik hatunchasqa kanapaqchu wañunchik.
8 Kawsaspaqa kawsanchik Jehova*+ Diosta hatunchanapaqmi, wañuspapas wañunchik Jehova* Diosta hatunchanapaqmi. Hinaptinqa, kawsaspapas utaq wañuspapas Jehova* Diospam kanchik.+
9 Cristoqa* wañukurqa hinaspa kawsarimurqa wañuqkunapaqpas chaynataq kawsaqkunapaqpas munasqanta ruwananpaqmi.+
10 Chaynaqa, ¿imanasqataq wawqikita juzganki?+ Utaq, ¿imanasqataq wawqikita pinqanki? Ñuqanchikqa llapallanchikmi juzgasqa kananchikpaq Diospa qayllanpi kasunchik.+
11 Qillqasqam kachkan: “Jehova* Diosmi nin: ‘Ñuqapa kawsakusqayqa chiqapmi,+ chaynam chiqaptapuni qayllaypi llapallan runakuna ñawpaqniypi qunqurakunqaku, hinaspam Dios kasqayta yachanqaku’, nispa”, niq.+
12 Chaynaqa, sapakamatam imayna kawsakusqanchikman hina Diosqa juzgawasun.+
13 Hinaptinqa, amañayá kikinchikpuraqa juzganakusunchu,+ aswanqa tukuy atisqanchiktayá ruwasun iñiqmasinchikkuna Diosmanta mana karunchakunankupaq utaq mana huchallikunankupaq*.+
14 Ñuqaqa señor Jesuspa qatiqnin kasqayraykum mana iskayrayanichu ima mikuypas Diospaqqa allinlla* kasqanmanta, ima mikuytapas mana allinpaq hapiq runallapaqmi chay mikuyqa millakuypaq kachkan.+
15 Sichu mikusqaykiwan iñiqmasiki hukmanyaptinqa manañam iñiqmasikitaqa kuyachkankiñachu.+ Amayá mikusqaykirayku iñiqmasiki Diosmanta karunchakunantaqa munaychu, payraykumiki Cristoqa wañukurqa.+
16 Chaynaqa amayá allinkuna ruwasqaykichikmanta hukkuna mana allinta rimanankutaqa munaychikchu.
17 Diospa gobiernonpi* kanapaqqa manam ima mikusqanchikmantachu+ nitaq ima tomasqanchikmanchu, aswanqa Diospa atiyninwan* allin ruwaq kaymantam, hawkalla kaymantam hinaspa kusisqa kawsakuymantam.
18 Chayna kaspan Cristota serviq runaqa Diospa chaskisqan hinaspa runakunapapas allin qawasqanmi.
19 Chayraykuyá hinalla ruwasun hawkalla kanapaq imapas yanapawaqninchik kaqkunata+ hinaspa kikinchikpura kallpanchanakunapaq kaqkunata.+
20 Amayá mikuyraykullaqa Diospa ruwasqantaqa tuñichiychu.+ Chiqaptamá tukuy imapas limpio, ichaqa manam allinchu pi runapas mikusqanwan runamasinta Diosmanta karunchaptinqa*.+
21 Iñiqmasiki Diosmanta karunchakunan kaptinqa allinmi kanman aychata amaña mikuyniki, vinota amaña tomayniki chaynataq imatapas karunchananpaq kaqtaqa amaña ruwayniki.+
22 Ichaqa chaykunamanta imam piensasqaykiqa* qampaqwan Diosllapaqyá kachun. Imapas ruwasqayki allin kasqanmanta mana iskayrayaspaykiqa kusisqam kanki,
23 iskayrayastin imatapas mikuspam ichaqa huchayuqpaqña hapisqa kanki iskayrayastin mikusqaykirayku. Imatapas iskayrayastin ruwayqa hucham.
Willakuykuna
^ Ichapas kanman: “Sapakamapa iskayrayasqaykichiktaqa”, niqpas.
^ Qaway A5 kaq yachachikuyta.
^ Qaway A5 kaq yachachikuyta.
^ Qaway A5 kaq yachachikuyta.
^ Qaway A5 kaq yachachikuyta.
^ Qaway A5 kaq yachachikuyta.
^ Qaway A5 kaq yachachikuyta.
^ Qaway A5 kaq yachachikuyta.
^ Utaq: “Diospa akllasqanqa”.
^ Qaway A5 kaq yachachikuyta.
^ Griego rimaypiqa nichkan: “Pitapas mana urmarachinapaq chaynataq urmarunanpaq ñawpaqninpi imatapas mana churanapaq”, nispam.
^ Utaq: “Chuya”.
^ Qaway “Diospa gobiernon” niqpa ima ninan kasqanta.
^ Griego rimaypiqa nichkan: “Hukta urmachiyninqa”, nispam.
^ Utaq: “Piensasqaykimanta mana iskayrayasqaykiqa”.
