Exodo 3:1-22
3 Moisesqa suedron Jetropa+ ovejankunatañam michirqa, Madianpim Jetroqa sacerdote karqa. Huk kutipim Moisesqa intipa siqaykunan law chunniqman ovejakunata michiq rirqa, hinaspam Horeb sutiyuq urquman chayarurqa, chayqa karqa Diospa urqunmi.+
2 Hinaptinmi Jehova Diospa angelnin kichkayuq ratachkaq taksa sachapi+ rikuriykurqa. Allinta Moises qawaykuptinñataqmi chay taksa sachapi ninaqa linwaylla-linwachkasqa, manam sachaqa rupasqachu.
3 Hinaptinmi Moisesqa sunqullanpi nirqa: “¿Imanasqataq wak taksa sachaqa mana rupanchu? Ima kasqanta allinta yachanaypaqyá asuykurusaq”, nispa.
4 Chaymi Jehova Diosñataq Moises asuykusqanta qawaspan chay taksa sachamanta nimurqa: “¡Moises! ¡Moises!”, nispa. Moisesñataqmi nirqa: “Imallam taytáy”, nispa.
5 Hinaptinmi Diosqa nirqa: “Ama asuykamuwaychu. Usutaykita hurqukuy, chay sarusqayki allpaqa ñuqapaq sapaqchasqam”, nispa.
6 Hinaspapas nirqam: “Ñuqaqa abueloyki Abrahanpa,+ Isaacpa+ hinaspa Jacobpa+ Diosninmi kani, ñuqaqa taytaykipapas Diosninmi kani”, nispa. Chaymi Moisesqa Diosta rikuruyta manchakuspan uyanta tapakuykurqa.
7 Jehova Diosqa nirqataqmi: “Ñuqaqa sumaqtam yachani Israelpa miraynin runaykunapa ñakarisqankutaqa, paykunataqa Egiptopi runakunam ñakarichichkan. Uyarirqanitaqmi ñakarichisqa kaspanku ñuqata qayakamuwasqankutapas.+
8 Chaymi ñuqaqa Egipto nacionpi+ ñakarisqankumanta hurqumusaq, hinaspam pusasaq hatun hinaspa allin allpaman. Chay allpaqa tukuy imapa kanan allpam*.+ Chay allpapim yachachkanku* Canaan runakuna, Het runakuna, Amorreo runakuna, Perizita runakuna, Hev runakuna hinaspa Jebus runakuna.+
9 Ñuqaqa Israelpa mirayninkunapa qayakamuwasqankutam uyariruni. Paykunatamá Egipto runakuna llumpayta ñakarichichkan.+
10 Chaymi Egipto nacionta kamachiqman* kachasqayki. Qanmi Egipto nacionmanta Israelpa miraynin runaykunata pusamunki”, nispa.+
11 Moisesñataqmi Diosta nirqa: “¿Pitaq ñuqaqa kani Egiptota kamachiqman rispay Israelpa mirayninkunata pusamunaypaqqa?”, nispa.
12 Diosñataqmi nirqa: “Ñuqam yanapasqayki.+ Egipto nacionmantam runaykunata kay urquman pusamunki ñuqata yupaychawanaykichikpaq. Chayta ruwaptikim yachanqaku ñuqa kamachisqayta”, nispa.+
13 Hinaptinmi Moisesqa Diosta nirqa: “Sichum Israelpa mirayninkunaman rispay niyman ‘ñawpaq abueloykichikkunapa Diosninmi qamkunaman kachamuwachkan’ nispay, hinaptin paykunañataq tapuwanman ‘¿imataq sutinqa?’ nispa.+ Hinaptinqa, ¿ima nisaqtaq?”, nispa.
14 Chaynata niptinmi Diosqa Moisesta nirqa: “ÑUQAM IMAPAS MUNASQAY KASAQ*”, nispa.+ Hinaspam nirqaraq: “Israelpa mirayninkunamanyá nimuy: ‘ÑUQAM IMAPAS KASAQ niqmi qamkunaman kachamuwarqa’”, nispa.+
15 Chaymantapas Diosqa kaqmantam Moisesta nirqa:
“Israelpa mirayninkunatam ninki: ‘Ñawpaq abueloykichik Abrahanpa,+ Isaacpa+ hinaspa Jacobpa+ Jehova Diosninmi qamkunaman kachamuwarqa’, nispa. Chaymi wiña-wiñaypaq sutiy,+ chay sutiwanmi llapallan miraykuna yuyawanqa.
16 Chaynaqa Israelpa mirayninkunaman rispaykiyá punta apaqkunata huñuspa nimuy: ‘Ñawpaq abueloykichik Abrahanpa, Isaacpa hinaspa Jacobpa yupaychasqanku Jehova Diosmi rikuriykuwaspan niwarqa: “Ñuqaqa yachanim imayna tarikusqaykichikta,+ yachanitaqmi Egipto runakunapa imam ruwasusqaykichiktapas.
17 Chayraykum tantiaruni Egipto runakunapa ñakarichisusqaykichikmanta+ hurquspay tukuy imapa kanan allpaman+ pusanaypaq. Chay allpapim yachachkanku Canaan runakuna, Het runakuna, Amorreo runakuna,+ Perizita runakuna, Hev runakuna hinaspa Jebus runakuna”’, nispa.+
18 Punta apaqkunaqa kasusunkim,+ hinaptinmi paykunawan kuska Egipto nacionta kamachiqman rispa ninkichik: ‘Hebreo runakunapa yupaychasqayku Jehova Diosmi+ niykuwanku kimsa punchaw puriyta chunniqman rinaykupaq, chaymanqa Jehova Diosniykupaq animalkunata kañapunaykupaqmi risaqku.+ Chayraykuyá rinaykupaq “arí” niykullawayku’, nispa.
19 Egiptota kamachiqqa manam chayllaqa kacharisunkichikchu, aswanqa hikutasqa kaspanñam.+
20 Ñuqam Egipto runakunata ñakarichisaq atiyniywan imakunatapas ruwaspay. Chaynapi tarikuspanñam kamachiqqa kacharisunkichik.+
21 Chay runakunawanqa tukuy imatam quchisqaykichik, chaynapi tukuy imayuq lluqsinaykichikpaq.+
22 Sapa warmim mañakunqa qurimanta hinaspa qullqimanta alaqakunata, mañakunqataqmi pachakunatapas. Chaykunataqa mañakunqa vecinanmantawan wasinpi yachaq warmimantam. Tukuy chaykunawanmi churikichikkunata churachinkichik. Chaynatam Egipto runakunapa tukuy imankuta apakunkichik”, nispa.+
Willakuykuna
^ Hebreo rimaypiqa nichkan: “Lechepa hinaspa mielpa kanan allpam”, nispam.
^ Utaq: “Tiyachkanku”.
^ Utaq: “Faraonman”.
^ Qaway A4 kaq yachachikuyta.
