Exodo 23:1-33

  • Israelpa mirayninkuna kamachikuykuna chaskisqankumanta (1-19)

    • Allin ruwaymanta chaynataq mana allin kaqkuna mana ruwaymanta (1-9)

    • Samana punchawmanta hinaspa Diospaq huñunakuykunamanta (10-19)

  • Israelpa mirayninkunata Diospa angelnin pusasqanmanta (20-26)

  • Maymanta maykama Diospa qunan allpa kananmanta (27-33)

23  Diosqa nirqataqmi: “Amam llullakuspaqa imatapas willakunkichikchu.+ Rimaspaykichikqa amam mana allin runamanqa sayapakunkichikchu.+  Mana allin runakunataqa achkallaña kaptinpas amam qatipakunkichikchu, amataqmi achka runakunaman sayapakunaykichikraykullaqa* imapas rikusqaykichikmanta llullakuspaqa willakunkichikchu.  Pipas quejapi kaptinqa amam wakcha kasqanraykullaqa sayapakunkichikchu.+  Chiqnisuqnikichikpa toronta utaq asnonta tarikuspaykichikqa kutichipunkichikmi.+  Chiqnisuqnikichikpa cargayuq asnon pampapi laqakuruptinqa amam qawayllaqa-qawakunkichikchu, aswanqa cargantam paskaykaysinkichik.+  Wakcha runa quejapi kaptinqa allinllatam allichanaykichik.+  Amam yanqamantaqa pitapas tumpankichikchu,+ amataqmi mana huchayuq runa wañunanpaqqa imatapas ninkichikchu, llullakuq runaqa huchayuqmi kanqa.  Amam qullqitaqa chaskikunkichikchu pimanpas sayapakunaykichikpaqqa, qullqi chaskikuq runaqa mana yuyayniyuqñam, allin runapa rimasqantapas pantarachinmi.+  Huklaw llaqtayuq runakunataqa amam ñakarichinkichikchu. Qamkunaqa yachankichikmi runapa llaqtanpi kayqa sasa kasqanta,+ qamkunapas Egipto nacionpim ñakarirqankichik. 10  Suqta watam chakraykichikpi tarpunkichik.+ 11  Qanchis kaq watapiñataqmi ama tarpunkichikchu chakraykichik samananpaq. Chay chakrapi kipataqa wakchakunam mikunqaku, puchusqankutañataqmi purun animalkuna mikunqa. Chaynallatam ruwanaykichik uvas chakraykichikwanpas chaynataq aceitunas chakraykichikwanpas. 12  Suqta punchawmi llamkankichik, qanchis kaq punchawpiñataqmi samankichik, samanqataqmi toroykichikpas, asnoykichikpas, serviqnikichikpa wawanpas chaynataq huklaw llaqtayuq runapas.+ 13  Amam qunqankichikchu kamachisqaykunata kasukuytaqa.+ Amam taytacha-mamachakunapa sutintaqa rimankichikchu nitaq qayakunkichikchu.+ 14  Watapim kimsa kutita hatun huñunakuykunata ñuqapaq ruwankichik.+ 15  Huknin hatun huñunakuymi mana levadurayuq tantata ruwana punchaw.+ Chaytaqa kamachisqayman hinam abib* killapi yuyarinaykichik, qanchis punchawpuni mana levadurawan ruwasqa tantata mikuspa.+ Chay killapim Egiptomanta lluqsimurqankichik. Amam hinallaqa hatun huñunakuyniykunamanqa asuykamunkichikchu.+ 16  Huknin hatun huñunakuyqa cosecha qallariy hatun punchawmi*. Chaytaqa yuyarinaykichik tarpusqaykichikmanta punta rurunta huñuspaykichikmi.+ Chaymantapas ruwanaykichikpaq huknin hatun huñunakuyñataqmi cosecha tukuy hatun punchaw*, chaytaqa yuyarinaykichik lliw tarpusqaykichikta huñuspaykichikmi.+ 17  Llapallan qarikunam watapi kimsa kutita ñuqa Jehova Diosman asuykamuwananku.+ 18  Animalta ñuqapaq nakaspaykichikqa amam yawarnintaqa imapas levadurawan ruwasqa kaqtawan kuskataqa quwankichikchu. Amataqmi quwanaykichik animalpa wirantaqa paqarintinkamaqa churankichikchu. 19  Ñuqa Jehova Diospa wasiymanmi allinnin kaq punta rurukunata apamuwankichik.+ Amam uña cabrachataqa mamanpa lechenpiqa yanunkichikchu.+ 20  Qunay allpaman risqaykichikpi imamantapas harkasunaykichikpaqmi angelniyta kachamusaq,+ chaynapi akllasqay allpaman hawkalla chayanaykichikpaq.+ 21  Chay kachamusqay angelniytaqa uyarinaykichikmi, hinaspapas kasukunaykichikmi.+ Payqa ñuqapa sutiypim hamunqa, mana kasukuptikichikqa manam pampachasunkichikchu. 22  Angelniypa lliw nisqanta hinaspa kamachisqaykunata kasukuptikichikqa chiqnisuqnikichikkunatam chiqnisaq, wañuchisunaykichikpaq hatariqkunatapas wañuchisaqmi. 23  Angelniymi ñawpaqnikichikta rispan pusasunkichik Het runakunapa, Perizita runakunapa, Canaan runakunapa, Amorreo runakunapa, Hev runakunapa hinaspa Jebus runakunapa allpanman. Ñuqañataqmi chay runakunata wañuchisaq.+ 24  Amam taytacha-mamachankumanqa kumuykunkichikchu nitaq yupaychankichikchu, amataqmi chaypi yachaq* runakunapa ima ruwasqankutapas ruwankichikchu.+ Aswanqa taytacha-mamachankutam hinaspa suytu ruminkutam ñutupankichik.+ 25  Ñuqa Jehova Diosta yupaychawaptikichikqa+ mikuytawan yakutam qusqaykichik.+ Ñuqa yanapaptiymi mana imawanpas unqunkichikchu.+ 26  Warmikunapas manam malparinqakuchu nitaq qulluqchu kanqaku.+ Ñuqam una-unayta kawsachisqaykichik. 27  Risqaykichik allpaman manaraq chayachkaptikichikmi ñuqaqa chaypi runakunata manchakuymanta katkatatachisaq.+ Chiqnisuqnikichik llaqtapi runakunatam muspayninkupi hina kachisaq, hinaptinmi manchakuymanta ayqikunqaku.+ 28  Manaraq chayachkaptikichikmi ñuqaqa chaypi runakunata manchakuymanta kachisaq.+ Qawachkaptikichikmi qarqusaq Hev runakunata, Canaan runakunata chaynataq Het runakunatapas.+ 29  Ichaqa manam huk watallapichu chay runakunataqa qarqusaq, chaynapi chunniruptin purun animalkuna miraruspa ama sasachasunaykichikpaq.+ 30  Aswanqa chay allpaman chayaspa miranaykichikkamam as-asmanta chay runakunataqa qarqusaq.+ 31  Allpaykichikmi kanqa Puka lamar quchamanta Hatun lamar quchapa patankama* hinaspa chaki chunniqmanta Eufrates mayukama.+ Chaypi yachaq runakunata makikichikman churaptiymi qamkuna qarqunkichik.+ 32  Amam paykunawanqa imata ruwanaykichikpaqpas tantianakunkichikchu* nitaq taytacha-mamachankuta yupaychanaykichikpaqpas ninkichikchu.+ 33  Amam allpaykichikpiqa chay runakunaqa yachanqakuchu, chaynapi ama huchallichisunaykichikpaq. Taytachankunata yupaychaspaykichikqa sasachakuypim kankichik”, nispa.+

Willakuykuna

Utaq: “Achka runa rimasqanraykullaqa”.
Utaq: “Semanantin fiestam”. Utaq: “Pentecostes fiestam”.
Utaq: “Ramada ruwana fiesta”.
Utaq: “Tiyaq”.
Utaq: “Filistea runakunapa lamar quchankama”.
Utaq: “Pactotaqa ruwankichikchu”. Qaway “pacto” niq palabrapa ima ninan kasqanta.