Esdras 5:1-17
5 Chaymanta qipatam Diosmanta willakuq* Ageowan+ Zacariasqa+ Judapiwan Jerusalenpi yachaq* runakunawan Diospa sutinpi rimarqaku. Paykunawanmi Dios karqa. Zacariasqa Idopa+ willkanmi karqa.
2 Chaymi Sealtielpa churin Zorobabel+ hinaspa Jeozadacpa churin Jesua+ Diospa wasinta Jerusalen llaqtapi kaqmanta ruwayta qallaykurqaku.+ Diosmanta willakuqkunapas paykunatam yanaparqaku.+
3 Chay punchawkunapim Tatenai, Setar-bozenai hinaspa yanapaqninkuna Juda runakunawan rimaq rirqaku, hinaspam nirqaku: “¿Pitaq kamachisurqankichik kay wasita pirqapanaykichikpaq?”, nispa. Tatenaiqa karqa Eufrates mayupa inti siqaykunan lawpi kamachiqmi.
4 Nirqakutaqmi: “¿Pikunataq kay wasita ruwachkanku?”, nispa.
5 Chaywanpas Juda runakunapa punta apaqninkunata Dios yanapasqanraykum hinalla pirqarqaku.+ Kamachiq Darioman willachiptinku pay imata nimunankamam mana harkakurqakuchu.
6 Kamachiq Dariomanmi cartata qillqarqaku Eufrates mayupa waklawninpi yachaqkunapa kamachiqnin Tatenai hinaspa chaylaw llaqtachakunapi kaq Setar-bozenaiwan wakin gobernadorkuna. Chay qillqasqanku cartapa copianmi kaypi kachkan.
7 Kaypim nisqaku:
“Kamachiq Dario,
rimaykamullaykikum.
8 Ñuqaykum Juda llaqtata riruniku, hinaspam qawaramuniku Diospa wasinta hatun rumikunawan pirqasqankuta. Pirqankunamanpas qirukunatam* churachkanku. Utqaymanmi ruwachkanku runakuna anchata kallpanchakusqankurayku.
9 Chaymi punta apaqkunata nirqaniku: ‘¿Pitaq kamachisurqankichik kay wasita pirqapanaykichikpaq?’, nispa.+
10 Tapurqanikutaqmi paykunapa sutintapas qanman qillqamunaykupaq.
11 Paykunañataqmi niwarqaku: ‘Ñuqaykuqa hanaq pachatawan kay pachata kamachiq Diostam yupaychaniku. Kay ruwasqayku wasiqa ñam ñawpaqta karqaña, chaytaqa Israel runakunapa ancha riqsisqa kamachiqninmi ruwachirqa.+
12 Ñawpaq taytaykum Diosta piñachirqaku,+ chaymi Caldea lawpi Babilonia nacionta kamachiq Nabucodonosorpa+ makinman churaykurqa. Hinaptinmi kay wasita chinkarachirqa,+ hinaspam runakunatapas Babiloniaman pusakurqa.+
13 Ichaqa Babilonia nacionta Ciro kamachiyta qallaykuspanmi kamachirqa Diospa wasin kaqmanta hatarichisqa kananpaq.+
14 Kamachirqataqmi Babiloniapi yupaychana wasimanta serviciokunata hurqumunankupaqpas.+ Chay quri-qullqimanta serviciokunataqa Nabucodonosormi Jerusalenpi Diospa wasinmanta* hurqururqa. Cirom chay serviciokunata Sesbazarman* qurqa kutichinanpaq,+ paytam Juda runakunata kamachinanpaq churarqa.+
15 Paytam Ciro nirqa: “Kay serviciokunata Jerusalen llaqtapi Diospa wasinpaq kutichiy. Hinaspam Diospa wasinta maymi kasqanpi ruwankichik”, nispa.+
16 Sesbazarmi Jerusalen llaqtaman hamuspan Diospa wasinpa cimientonta churachirqa.+ Chaymantapacham ruwachkaniku, ichaqa manaraqmi qispichinikuchu’, nispa.+
17 Chaynaqa kamachiqllayku Dario, allin rikchakusuptikiqa kamachiqkunamanta rimaq librotayá qawaykamuchunku, chaynapi Diospa wasinta ruwanapaq Ciropa kamachisqanta yachanapaq.+ Hinaspapas ima tantiasqaykitayá willamuwayku. Chay libroqa Babiloniata kamachiqpa quri-qullqinta churananpim kachkan”, nispa.
Willakuykuna
^ Utaq: “Profeta”. Qaway kay palabrapa ima ninan kasqanta.
^ Utaq: “Tiyaq”.
^ Utaq: “Kaspikunatam”.
^ Utaq: “Templomanta”.
^ Esdras 2:2 hinaspa Esdras 3:8 nisqanman hinaqa yaqachusmi payqa Zorobabel.
