1 Corintios 6:1-20
6 Qamkunapura imatapas allichanaykichik kaptinqa,+ ¿imanasqataq rinkichik Diospi mana iñiq autoridadkunamanraq? ¿Imanasqataq mana rinkichikchu Diospa runankunamanqa?
2 Icha, ¿manachu yachankichik Diospa runankuna runakunata juzgananta?+ Kay runakunata qamkuna juzganaykichik kaptinqa, ¿manachu allichayta atiwaqchik chaykunata?
3 ¿Manachu yachankichik angelkunatapas juzgananchikta?+ Hinaptinqa, ¿imanasqataq kunan tiempopi ima sasachakuykunatapas mana allichachwanchu?
4 Kunan tiempopi ima sasachakuykunatapas allichana kaptinqa,+ ¿imanasqataq Diospi mana iñiq autoridadkunamanraq rinkichik sasachakuynikichikkunata allichanaykichikpaq? Paykunaqa iñiqkunapa mana allinpaq hapisqanmi kanku.
5 Kaytaqa nimuchkaykichik pinqakunaykichikpaqmi. ¿Manachu qamkuna ukupi kan yachayniyuq runa qamkunapura imapas kaptin allichananpaq?
6 ¿Imanasqataq Diospi mana iñiq autoridadkunamanraq iñiqmasikichikkunata pusankichik?
7 Chiqaptapunipas qamkunapura quejanakuynikichikqa manam allinnikichikpaqchu. ¿Imanasqataq mana aguantaykunkichikchu mana allin ruwasuqnikichiktaqa?+ Aswan allinqa kanman qamkunapa imaykichikwanpas qipakuykuyninmi.
8 Iñiqmasikichiktaraqmi qamkunaqa mana allinkunata ruwankichik hinaspa engañankichik.
9 ¿Manachu yachankichik mana allin ruwaq runakunaqa Diosña kamachiptin* mana kanankuta?+ Amayá pantaychikchu. Diosña kamachiptinqa manam kanqachu huchapakuqkunaqa*,+ taytacha-mamacha yupaychaqkunaqa,+ hukwan pierdekuqkunaqa*,+ qari kachkaspa warmi hina kaqkunaqa+ nitaq qarimasinwan kakuqkunaqa.+
10 Diosña kamachiptinqa manataqmi kanqachu suwakunapas, imatapas llumpayta munapayaqkunapas,+ sinkakuqkunapas,+ runamasin kamiqpas* nitaq engañowan qichuqkunapas.+
11 Chaynam wakiqnikichikqa karqankichik, ichaqa Diosmi mayllasurqankichik,+ chuyanchasurqankichik+ hinaspa allin ruwaqpaqña+ chaskiykusurqankichik señor Jesucristopa sutinpi chaynataq Diosninchikpa atiyninwan.
12 Tukuy ima munasqaytam ruwayman, ichaqa manam llapallanchu allinqa.+ Tukuy ima munasqaytam ruwayman ichaqa manam imawanpas aysachikusaqchu.
13 Mikuyqa wiksapaqmi, wiksañataqmi mikuypaq, ichaqa iskaynintam Diosqa pasaypaqta chinkachinqa.+ Cuerpoqa manam huchapakuypaqchu, aswanqa señorninchikpaqmi,+ señorñataqmi cuerpopaq.
14 Diosmi señorninchikta kawsarichirqa,+ chaynallataqmi ñuqanchiktapas atiyninwan+ wañuymanta kawsarichiwasun.+
15 ¿Manachu yachankichik cuerpoykichikqa Cristopa* cuerponwan huklla kasqanta?+ ¿Cristopa cuerponwan huklla kasqaykichikmanta hurquruspaychu chuchumika* warmiwan hukllawarusqaykichik? ¡Manam!
16 ¿Manachu yachankichik chuchumikaman hukllawakuqqa huk cuerpollaña kasqanta? Diosmi nin: “Iskayninkum hukllaña kanqaku”, nispa.+
17 Señorman hukllawakuqmi ichaqa yuyayninpi* paywan hukllaña kanku.+
18 Huchapakuymanta lluptiychik.+ Runapa huk rikchaq hucha ruwasqanqa cuerponmanta sapaqmi, huchapakuqmi ichaqa kikinpa cuerponpa contranpi huchallikun.+
19 ¿Manachu yachankichik cuerpoykichikqa qamkunapi kaq Diospa atiyninpa* wasin hina+ kasqanta? Chay atiytaqa Diosmantam chaskirqankichik.+ Qamkunaqa manam kikillaykichikpaqñachu kankichik+
20 Diosninchik preciowan rantisusqaykichikrayku.+ Chaynaqa cuerpoykichikwanyá+ Diosta hatunchaychik.+
Willakuykuna
^ Utaq: “Waqllikuqkunaqa”.
^ Huchapakuytam griego rimaypi “porneia” ninku. Qaway kay palabrapa ima ninan kasqanta.
^ Qaway “Diospa gobiernon” niqpa ima ninan kasqanta.
^ Utaq: “Nanay simiwan rimaqpas”, “runamasin insultaqpas”.
^ Utaq: “Diospa akllasqanpa”.
^ Utaq: “Qullqipaq piwanpas kakuq”.
^ Utaq: “Espiritupi”. Qaway kay palabrapa ima ninan kasqanta.
