Zacarias 7:1-14

7  Rey Dario tawa watamanña gobiernachkaptinmi chay tawa kaq watapa isqon kaq killanpi otaq Quisleu killapi hinaspa chay killapa tawa kaq punchawninpi ñoqa Zacariasman Tayta Dios rimapayawarqa.  Chay punchawkunapim Betel llaqtapi yachaqkuna kacharqaku Sarezer sutiyoq runatawan Regem-melec sutiyoq runata. Paykunataqa runankunatawanmi kacharqaku Tayta Diospa yanapakuynin mañakamunankupaq  chaynataq Llapallan Kamachiq Tayta Diospa templonpi kaq sacerdotekunatapas hinaspa Diosmanta willakuqkunatapas kaynata tapumunankupaq: —¿Hinaraqchum waqasaqku hinaspa ayunasaqku pichqa kaq killapiqa imaynam watan-watan rurasqaykuman hina? —nispa.  Chaymi Llapallan Kamachiq Tayta Dios rimapayawaspan niwarqa:  —Qamqa nacionnikipi llapallan runakunamanyá sacerdotekunamanwan kaynata nimuy: “Qamkunaqa qanchis chunka watamantaraq chay pichqa kaq killapi hinaspa qanchis kaq killapi ayunastin waqaspaykichikqa manam ñoqapaqchu rurarqankichik.  Mikukuspaykichikpas upyakuspaykichikpas kikillaykichikpaqmi chaykunataqa rurarqankichik” nispa.  ¿Manachum Tayta Diosqa ñawpaqmantaraq willakuqninkunawan hina kaynata rimarirqa? Chaynataqariki rimarirqa Jerusalen llaqtapi yachaqkuna hawkalla hinaspa achkallaña kawsakuchkaptinkum, hina chaynallam kawsakuchkarqaku muyuriqnin llaqtakunapi yachaqkunapas chaynataq Neguev lawpi yachaqkunapas hinaspa waqtakunapi yachaqkunapas. Mana kasukuq kasqankurayku preso pusasqa kasqankumanta  7:8-9Chaymantam Llapallan Kamachiq Tayta Diosqa ñoqa Zacariasman rimapayawaspan kaynata willachiwarqa: —Qamkunaqa allin arreglota runamasikichikwan ruraspayá kuyapayakuqña hinaspa llakipayakuqña kaychik  ——. 10  Amayá ñakarichiychikchu viudakunataqa nitaq mana tayta-mamayoqkunatapas nitaq forastero runakunatapas nitaq wakchakunatapas, amataqyá piensaychikchu runa masikichikwan mana allinlla ruranakuytaqa. 11  Qamkunaqa manam uyariyta munarqankichikchu, llapallaykichikmi qepanchakuruwaspaykichik mana kasukuqña karqankichik hinaspam upa tukururqankichiktaq. 12  Rumi sonqo rikuriruspaykichikmi mana munarqankichikchu Llapallan Kamachiq ñoqa Tayta Diospa yachachikuyniykuna hinaspa kamachikuyniykuna kasukuyta. Chaykunataqa espirituypa yanapakuyninwanmi ñawpaqmantaraq willachirqani ñoqamanta willakuqkunawan. Chayraykum Llapallan Kamachiq ñoqa Tayta Diosqa llumpa-llumpayta piñakuruspay 13  kaynata nirqani: “Imaynam qamkunapas qayachkaptiy mana uyariwayta munarqankichikchu, chaynam ñoqapas qayakuwaptikichikqa manataq uyarisqaykichikchu. 14  Chayraykum qamkunataqa wayra-parapa apasqanta hina cheqerachirqaykichik mana reqsisqaykichik nacionkunaman, chaynapim nacionnikichikpas tikrakururqa mana pipapas purinan chunniqmanña. Sumaqllaña naciontam qamkunaqa tikrarurqankichik purmachkaq nacionmanña” nispa.

Willakuykuna