Malaquias 1:1-14

1  Israel nacionpa contranpim ñoqa *Malaquiasman Tayta Dios kaynata willawarqa:  —Ñoqa Tayta Diosqa kuyaykichikmi hinaptinmi qamkunañataq tapuwankichik: “¿Imaynatataq kuyawankikuqa?” nispa. Hinaptinmi ñoqa Tayta Diosñataq nini: “Qamkunataqa kuyaykichik imaynam Jacobta kuyasqayman hinam. Esaumi karqa Jacobpa wawqen ichaqa Jacobtam ñoqaqa kuyarqani  Esautañataqmi cheqnirqani. Esaupa yachanan orqokunatapas purmarachirqanim hinaspam chakrankunatapas tikrarurqani purun atoqkunapa yachananmanña.”  —“Tuñirachiwaptinchikpas purmachisqa nacionninchiktaqa huktawanmi hatarichisunchik” nispa Esaupa miraynin Edom nacionniyoqkuna rimaptinkupas Llapallan Kamachiq ñoqa Tayta Diosmi kaynata niyman: “Huktawan hatarirachiptikichikpas ñoqaqa huktawanmi purmarachisaq. Nacionnikichikqa sutichasqa kanqa Mana Allinpa Kanan Nacionwanñam hinaspa Tayta Diospa Wiñaypaq Piñakunan Nacionwanñam” nispa.  Israel casta runakunañataqmi chaykunata qawaspa ninkichik: “Israel nacionpa linderonkuna mantapas aswan hatunraq kaspam Tayta Diosqa tukuy hinastinpi munaychakun” nispa. Sacerdotekunata Tayta Dios qaqchasqanmanta  —Llapallan Kamachiq ñoqa Tayta Diosmi sacerdotekunaman kaynata nini: Huk warmaqa respetanmi taytanta, huk sirvientepas respetantaqmi patronninta. Chaynaqa sichum taytaykichik kaptiyqa ¿imanasqamá manaqa yupaychawankichikchu? Sichum patronnikichik kaptiyqa ¿imanasqamá manaqa respetawankichikchu? Sacerdotekunaqa despreciawaspaykichikmi tapukunkichikraq: “¿Imaynanpitaq ñoqaykuqa despreciarqaykiku?” nisparaq.  Qamkunaqa altarniypipas ofrecewankichik millakuypaq mikuykunatam hinaspam tapuwankichikraq: “¿Imaynanpitaq millakuypaqtaqa rurarqaykiku?” nispa.  Qawasqaykichikman hinaqa ¿allinchum ñawsa animalkuna, wistu animalkuna hinaspa onqoq animalkuna ofrecewaynikichikqa? Hinaptinqa chayna animalkunatayá pusaychik qamkuna gobiernaqman. ¿Kusikuywanchum payqa chaskiykususpayki imallapipas favorecesunki? Chaynatam nini ñoqa Tayta Dios.  Chaynaqa mañakuwaychikyá qamkunamanta llakipayarikunaypaq. Ichaqa chayna mana valeq ofrendakunata apamuwaspaykichikqa amayá piensaychikchu imallapipas favorecenaytaqa. Chaynatam nini Llapallan Kamachiq ñoqa Tayta Dios. 10  ¡Ima allinraq kanman huk kaqnikichik temploypa punkunta wichqaruptikichikqa, chaynapi amaña pipas yanqapaq altarniyta ratachinanpaq. Qamkunawanqa manam kusisqachu kachkani, manañam ofrendaykichiktapas chaskisqaykichikchu. 11  Ñoqataqa intipa qespimunan lawmanta qallaykuspam intipa seqaykunan lawkama lliw nacionkunapi hatunchawanku, yupaychawanankupaqpas inciensokunatam kañapuwanku hinaspam qowankutaq suma-sumaq ofrendakunatapas, chaynapim ñoqaqa tukuy nacionkunapi reqsisqa kani. Chaynatam nini Llapallan Kamachiq ñoqa Tayta Dios. 12  Qamkunam ichaqa piñachiwachkankichik: “Tayta Diospa mesanqa millakuypaqmi, millakuypaqtaqmi chaypa hawanpi kaq mikuyninpas” nispa. 13  Chaywanpas qamkunam despreciawasparaq ninkichik: “¡Mayna amiruypaqñam kaykunaqa!” nispa. Chaynatam nini Llapallan Kamachiq ñoqa Tayta Dios. Qamkunaqa apamuwachkankichik suwasqa animalkunatam otaq wistu animalkunatam otaq onqoq animalkunatam. Hinaptinqa ¿yaqachum chaykunataqa chaskisqaykichik? Chaynatam nini ñoqa Tayta Dios. 14  Kanchanpi allin orqo animalta ñoqa Señor Diosman prometekuwachkaspan onqoq animal ofrecewaqniy runaqa ñakasqayá kachun. Ñoqaqariki kani hatu-hatun reymi chaynataq tukuy nacionniyoq runakunapa respetasqanmi. Chaynatam nini Llapallan Kamachiq ñoqa Tayta Dios.

Willakuykuna

1:1 Hebreo simipi Malaquias ninanqa: “willakuq” ninanmi.