Levitico 15:1-33

15  15:1-2Israelpa mirayninkunaman ninanpaqmi Moisestawan Aaronta Tayta Dios kaynata nirqa: —Pi qaripas qeya ispaywan kaspaqa manam asuykuwanmanchu  ——.  Chay onqoywan kasqanraykum ispakuyta atiptin otaq ispakuyta mana atiptinpas chay runaqa millakuypaqña kanqa, chay runaqa manam asuykuwanmanchu.  —Qeya ispaywan onqoq runapa puñusqan camaqa llapallanmi millarikuypaq kanqa. Maypim tiyasqankunapas millarikuypaqmi kanqa.  —Chay onqoqpa camanta tupaykuqpas pachankunata taqsakuspanmi bañakunqa, payqa tutaykuqkamam mana asuykuwanmanchu.  —Qeya ispaywan kaqpa tiyasqanpi tiyaykuqpas pachankunata taqsakuspanmi bañakunqa, payqa tutaykuqkamam mana asuykuwanmanchu.  —Qeya ispaywan kaq runata pipas hapikuspanqa pachanta taqsakuspanmi yakuwan bañakunqa. Payqa tutaykuqkamam mana asuykuwanmanchu.  —Sichu qeya ispaywan kaq runa asuykamuwananpaq hina kaq runaman toqaykuptinqa chay toqaykachikuq runam kikinpa pachankunata taqsanqa hinaspam bañakunqa, payqa tutaykuqkamam mana asuykuwanmanchu.  —Qeya ispaywan kaq runapa sillakusqan tiyananpas millarikuypaqmi kanqa. 10  —Qeya ispaywan kaqpa tiyasqanta pipas tupaykuqqa tutaykuqkamam mana asuykuwanmanchu. —Onqoqpa tiyasqankunata apaqpas pachankunata taqsakuspanmi bañakunqa, payqa tutaykuqkamam mana asuykuwanmanchu. 11  —Qeya ispaywan kaq runa pitapas tupaykunqa makinta mana mayllakuchkaspan hinaptinqa chay llapchaykachikuq runam pachankunata taqsanqa hinaspam bañakunqa. Payqa tutaykuqkamam mana asuykuwanmanchu. 12  —Qeya ispaywan kaqpa hapisqan allpa mankataqa pakirunkichikmi, kullumanta kaqkunatañataqmi mayllarunkichik. 13  —Pipas qeya ispaywan kachkaspan sanoyaruq runaqa qanchis punchawtaraqmi suyanan chuyanchakunanpaq, chaymantañam pachankunata taqsaspan kallpaq yakupi bañakunqa, chaynata ruraruspanqa asuykamuwanmanñam. 14  Pusaq kaq punchawninmanmi apamunqa iskay qoqñukunata otaq iskay mallqo palomakunata hinaspam hamunqa ñoqa Tayta Diospa qayllayman, apamuwanqaqa asuykamuwananku karpapa punkunmanmi hinaspam qoykunqa sacerdoteman. 15  Sacerdotem presentawanqa hukninta huchamanta ofrendata hina, huknintañataq lliw kañanapaq ofrendata hina, chaynata ruraptinmi ñoqa Tayta Dios pampachasaq chay runata qeya ispaywan kasqanmanta. 16  —Runa puñuchkaptin qari kayninmanta kikillanmanta imapas lloqsiptinqa bañakuspanmi tutaykuqkama mana asuykuwanmanchu. 17  —Pachakunamanpas otaq ima qaramanpas chay runamanta lloqsiq sutuykuptinqa chaykunaqa taqsasqam kanqa, chay pachaqa otaq chay qarakunaqa manañam servikunqachu tutaykuqkama. 18  —Sichu warmiwan qari puñuruspaqa, chay qarimanta lloqsisqanraykum iskayninku bañakunqaku hinaspam tutaykuqkama mana asuykuwanmankuchu. Warmikunapi rikuriq millakuypaq kaqkunamanta 19  —Pi warmipas yawarpakuywan onqospanqa qanchis punchawmi ama asuykuwanqachu. —Payta tupaykuq runapas tutaykuqkamam ama asuykuwanqachu. 20  —Yawarpakuywan kaqpa waqtapasqanpi kaqkunaqa millarikuypaqmi kanqa. Millarikuypaqtaqmi kanqa imapi tiyasqanpas. 21  —Pipas paypa waqtapaykusqan tupaykuqqa pachankunatam taqsanqa hinaspam kikinpas bañakuspantaq tutaykuqkama mana asuykuwanmanchu. 22  —Pipas chay warmipa tiyasqan tupaykuqqa pachankunata taqsakuspanmi bañakunqa hinaspam tutaykuqkama ama asuykuwanqachu. 23  Chay warmipa camanta otaq tiyasqankunata pipas llachpaykuqqa tutaykuqkamam ama asuykuwanqachu. 24  —Pi qaripas warmiwan puñuchkaptin chay warmi yawarpakuyta qallaykuptinqa chay qaripas chay warmi hinam qanchis punchawpuni ama asuykuwanqachu. 25  —Sichu warmipa yawarnin hamunqa killanwan mana onqonan tiempopi otaq killanwan onqonan punchawkuna tukuruchkaptinpas hinallaraq yawarnin hamuptinqa amam asuykuwanqachu, payqa kanqa killanwan onqosqanpi hinam. 26  —Chaynataqmi imapim waqtapasqankunapas millarikuypaqtaq kanqa, chaynaqa kanqa killanwan kaspa waqtapasqanpi hinam, chaynataqmi tiyasqankunapas millarikuypaqtaq kanqa killanwan kaspa tiyasqanpi hina. 27  —Pipas chaykunata tupaykuqqa amam asuykuwanqachu, pachantapas taqsakuspanmi bañakunqa hinaspam tutaykuqkama ama asuykuwanqachu. 28  —Yawarpakuyninmanta sanoyaruspanñataqmi qanchis punchawta suyanqa, chaymantañam payqa asuykuwanman. 29  Pusaq kaq punchawpiñataqmi sacerdoteman apamunqa iskay qoqñukunata otaq iskay mallqo palomakunata, apamunqaqa asuykamuwananku karpapa punkunmanmi. 30  Sacerdotem hukninta presentawanqa hucharayku ofrendapaq, huknintañataqmi presentawanqa lliw kañana ofrendapaq. Ñoqa Tayta Diospa qayllaypi chaynata sacerdote ruraptinmi chay warmi chuyanchasqa kanqa yawarpakuyninmanta. 31  Chaynatam Israelpa mirayninkunataqa chuyanchankichik tukuy millakuypaq kaqninkunamanta, chaynataqa rurankichik paykunapa chawpinpi yachanay karpata millakuypaqta ama rurarunankupaqmi hinaspapas ama wañurunankupaqmi. 32  Chaykunamá chay yachachikuykuna pi qaripas qeya ispaywan onqoptinqa otaq puñuchkaptin qari kayninmanta imapas kikillanmanta lloqsiptinqa. Chayna kaqkunaqa manam asuykuwanmanchu. 33  Chaykunamá yachachikuykuna killanwan kaq warmikunapaqpas. Hina chay yachachikuykunallam kanqa qaripaqpas hinaspa warmipaqpas paykunata chaykuna pasaptinqa chaynataq killanwan kaq warmiwan puñuq runapaqpas.

Willakuykuna