Jueces 17:1-13

17  Efrain Orqokunapim yacharqa Micaia sutiyoq runa.  Paymi mamanta nirqa: —Chay chunka kimsayoq kilo qollqeta suwarachikuspaykim suwata ñakarqanki, chay qollqeqa ñoqapa makiypim kachkan, ñoqamá suwarurqayki —nispa. Chaynata niptinmi maman nirqa: —Wawalláy, Tayta Diosyá bendecisunki —nispa.  Chaymi Micaia sutiyoq runa kutichirqa mamanman chay chunka kimsayoq kilo qollqeta hinaptinmi maman nirqa: Cheqaptapunipas Tayta Diospaqmi sapaqcharqani chay qollqetaqa tallasqa taytachata hinaspa fundisqa taytachata rurachinaykipaq, chaynaqa qanmanñayá qosqayki —nispa.  Micaia chay qollqeta kutiykachiptinmi maman iskay kilo masnin qollqeta plateroman qoykurqa tallasqa taytachatawan fundisqa taytachata rurananpaq, chay taytachakunaqa karqa Micaiapa wasinpim.  Micaiapa wasinpim kapurqa capillan hinaptinmi Diosta adorananpaq efodtawan wasinpaq taytachata rurachirqa hinaspam huknin churinta sacerdote kananpaq churarqa.  Chay tiempokunapiqa Israel nacionpi mana rey kasqanraykum, sapakama munasqankuta rurakuqku.  Juda law Belen llaqtapim yacharqa Leviy ayllumanta kaq huk forastero mozo.  Chay Juda law Belen llaqtamantam lloqsirqa yachananpaq sitio maskaq, paymi richkaspan Efrain orqokunapi kaq Micaiapa wasinman chayarurqa.  Paytam Micaia tapurqa: —¿Maymantataq hamuchkanki? —nispa. Hinaptinmi Leviy casta mozoñataq nirqa: —Juda law Belen llaqtamanta kaqmi kani, ñoqaqa maskachkani yachanaypaq sitiotam —nispa. 10  Chaymi Micaia nirqa: Kay wasiypiyá yachakuy sacerdote kaspa taytay hinaña kanaykipaq. Watanpim pagasqayki tawa chunka onza llasaq qollqeta, qosqaykitaqmi pachaykitapas chaynataq mikuytapas —nispa. 11  Chaymi Leviy casta mozoqa Micaiapa nisqanta “Anri” nispan yacharqa paywan hinaspam Micaiapa churin hinaña karqa. 12  Chay mozota sacerdotenpaq Micaia churaruptinmi wasinpi yacharqa. 13  Micaiam piensarqa: —Kunanqa Tayta Diosqa bendeciwanqañam, ñoqapaqariki kapuwachkan Leviy casta sacerdotem —nispa.

Willakuykuna