Jueces 14:1-20

14  Sansonmi Timnat llaqtaman rispan chaypi Filistea casta sipasta rikururqa.  Chay llaqtamanta kutimuspanmi tayta-mamanman willarqa kaynata: —Rikuramunim Timnat llaqtapi Filistea casta sipasta, ama hina caspayá paywan casarachiwaychik —nispa.  Hinaptinmi tayta-maman nirqa: —¿Manachu warmi kan ayllunchikpi otaq llapallan nacionninchikpi paywan casarakunaykipaq? ¿Imanasqamá mana señalasqa Filistea casta runakunamanta warmiwanqa casarakuyta munanki? —nispa. Sansonñataqmi taytanta nirqa: —Chay sipasmi sonqoyta suwaruwan, paywanyá casarachiwaychik —nispa.  Tayta mamanqa manam yacharqachu Sansonpa munasqanqa Tayta Diosmanta kasqanta. Tayta Diosqa Filistea casta runakunata imaynam castigaruytam maskachkarqa, chay tiempopim Filistea casta runakunaqa Israel castakunapi munaychakuchkarqa.  Sansonmi tayta-mamanpiwan Timnat llaqtaman rirqaku. Timnat lawpi uvas huertakunaman chayaruptinmi huk malta leon Sansonman pawaykurqa qaparkachastin.  Tayta Diospa Espiritun Sansonta yanapaptinmi huk cabrachata tisapachkaq hina mana imallawan tisaparurqa. Tayta-mamanmanqa manam willakurqachu chay rurasqanmanta.  Chayaruspanmi sipasta rimapayarqa hinaptinmi chay sipasqa Sansonpa sonqonpaq hina karqa.  Iskay kimsa punchawmanta warmiwan casarakunanpaq kutispanmi, ñanmanta rakikururqa wañuchisqan leonpa cuerponta qawananpaq. Qawaykuptinmi leonpa cuerponpi kachkasqa nana-nanaq abeja chaynataq miskinpas.  Chayta horqoykuspanmi mikustin ñanta rirqa. Tayta mamanta hayparuspanmi paykunamanpas qoykurqa mikunankupaq, ichaqa manam willakurqachu chay miskitaqa leonpa cuerponmanta horqomusqanta. 10  Sansonpa taytanmá hamurqa maypim sipaspa kasqanman hinaptinmi Sanson chaypi convidota rurarqa mozokunapa costumbrenman hina. 11  Filistea runakuna Sansonta rikuruspankum kimsa chunka compañaqninkunata akllarurqaku paywan kananpaq. 12  Chaymi compañaqninkunata Sanson nirqa: —Ñoqam kunan nisqaykichik huk watuchita, sichu qamkuna qanchis punchaw convido fiestakama imam ninanta tariruptikichikqa, ñoqam qosqaykichik linomanta kimsa chunka pachakunatawan kimsa chunka fiesta pachakunata. 13  Mana adivinayta atispam ichaqa qamkuna qowankichik linomanta kimsa chunka pachakunata hinaspa kimsa chunka fiesta pachakunata —nispa. Hinaptinmi paykunañataq nirqa: —Niwaykuyá chay watuchikita —nispa. 14  Hinaptinmi paykunaman nirqa: Mikuqmantam mikuy lloqsiramun,kallpayoqmantam miski lloqsiramun. Hinaptinmi paykuna mana atirqakuchu kimsa punchawpi chay watuchi adivinayta. 15  Tawa punchawmantam Sansonpa warminta chay mozokuna nirqaku: —Tapupayay qosaykita kay watuchipa imam ninanta willawanankupaq, mana chayna kaptinqa qamtam taytaykipa familiantawan kañarusqaykiku. ¿Kaymanqa convidaramuwarqankiku suwaruwanallaykikupaqchu? —nispa. 16  Chaymi Sansonpa warmin paypa qayllanpi waqaspa nirqa: —Cheqniyllam-cheqniwanki, manam kuyawankichu, llaqtamasiykunaman nisqayki watuchipa imam ninantaqa manam willawankichu —nispa. Sansonñataqmi nirqa: —¿Taytaymanpas nitaq mamaymanpas mana willachkaspaychu qanmanñataq willaruykiman? —nispa. 17  Ichaqa Sansonpa warminmi paypa qayllanpi waqarqa convidopa qanchis kaq punchawninkama. Sansonpa warmin ruegapayasqanraykum convidopa qanchis kaq punchawninpi willaykurqa watuchipa imam ninanta chaymi payñataq llaqtamasinkunaman willaykurqa. 18  Chay qanchis kaq punchawpim manaraq inti seqaykuchkaptin chay llaqtapi runakuna Sansonta nirqaku: Mielmantapas aswan miskiqa¿imaraqtaq kanman?Leonmantapas aswan kallpayoqqa¿imaraqtaq kanman? Chaymi Sansonñataq paykunata nirqa: —Vaquillaywan yapuruspaykichikmi watuchiypa imam ninanta yacharunkichik —nispa. 19  Tayta Diospa Espiritun Sansonta yanapaptinmi Ascalon llaqtaman rispan paykunapa castanmanta kimsa chunka qarikunata wañurachimurqa. Paykunamanta qechumusqanwanmi watuchin adivinaqkunaman fiesta pachakunata qoykurqa hinaspam sinchi piñasqa taytanpa wasinman kutikurqa. 20  Sansonpa warmintañataqmi casararachirqaku Sansonpa huk kaqnin compañaqninwanña.

Willakuykuna