Jonas 1:1-17

1  Amitaipa churin Jonasta Tayta Dios rimapayaspanmi kaynata nirqa:  —Ninive sutiyoq hatun llaqtaman rispayá chaypi yachaqkunapa contranpi willakamuy: Paykunapa mana allin rurasqankuqa castiganapaq hinaña kasqantam qawachkani —nispa.  Ichaqa Jonasmi Tayta Diosta mana kasukuspan Tarsis lawman ayqekunanpaq Jope llaqtaman pasakurqa. Tarsis lawman lloqsiq buqueta chaypi tariruspanmi payqa pagaykuspan viajaqkunapa kasqan buqueman yaykurqa Tayta Diosmanta ayqekunapaq.  Ichaqa Tayta Diosmi lamar qochapi hatarirachirqa llumpa-llumpay wayrata. Lamar qochapi llumpa-llumpay wayra-para hatariruptinmi buquepas pakipakurunanpaqña kachkarqa.  Buquepi llamkaqkunapas mancharisqallaña kaspankum diosninkuman sapakama qaparirqaku. Buquepi cargakunatapas manaña llasananpaqmi yakuman wischuykurqaku. Jonasmi ichaqa buquepa uku lawninman yaykuruspan miskillataña puñukuchkarqa.  Chaymi buquepi llamkaqkunapa kamachiqnin asuykuspan Jonasta nirqa: —¿Imanasqataq qamqa puñukuchkanki? ¡Hatarispaykiyá diosnikita mañakuy! Icharaqpas ñoqanchikmanta tanteariptin mana wañuruchwanchu —nispa.  Buquepi llamkaqkunañataqmi ninakurqaku: —Suerteta choqaspayá yachasunchik piraykum kay mana allinkuna hamuwasqanchikta —nispa. Chaymi suerteta choqaptinku tuparurqa Jonasman.  Chaymi Jonasta nirqaku: —Willawaykuyá ¿imanasqataq kay mana allinkunaqa hamuruwanchik? ¿Imapi llamkaqtaq qamqa kanki? ¿Maymantataq qamqa hamuchkanki? ¿Maylaw llaqtayoqtaq qamqa kanki? ¿Maylaw nacionniyoqtaq qamqa kanki? —nispa.  Chaymi Jonasñataq nirqa: —Ñoqaqa kani Hebreo castamanta kaqmi. Ñoqaqa hanaq pachapi kaq Tayta Dios yupaychaqmi kani. Payqariki lamar qochapas hinaspa chaki allpapas unanchaqmi —nispa. 10  Tayta Diosmanta ayqesqanta Jonas willaykuptinmi paykunañataq llumpay mancharisqallaña nirqaku: —¿Imanasqamá kaytaqa rurarqanki? —nispa. 11  Lamar qocha aswan-aswan hoqarikamuptinmi paykunaqa Jonasta tapurqaku: —¿Imatataq qanwanqa rurasaqku lamar qocha hawkayaykunanpaq? —nispa. 12  Chaymi Jonasñataq nirqa: —Lamar qochamanyá wischuykuwaychik hinaptinqa lamar qochaqa hawkayarunqañam. Ñoqaraykumiki kay wayra-paraqa qamkunapa contraykichikpi hatariramun —nispa. 13  Chaymi buquepi llamkaqkuna sasachakuyllawanña yakuta qachirqaku chaki allpaman chayanankupaq. Ichaqa lamar qocha aswanraq hoqarikamuptinmi mana atirqakuchu. 14  Chaymi paykunaqa Tayta Diosta qayakuspanku kaynata nirqaku: —Tayta Dios, kay runapa vidanraykuqa amayá ñoqaykutaqa wañurachiwaykuchu. Mana huchayoq kaptinqa amayá culpawaykuchu paypa wañunanmantaqa. Tayta Dios, qanmi imatapas rurarqanki munasqaykiman hina —nispa. 15  Chaynata nispankum Jonasta hoqariruspa lamar qochaman wischuykurqaku. Chayraqmi lamar qochaqa hoqarikuyninmanta hawkayarurqa. 16  Buquepi llamkaqkuna chayta qawaykuspam llumpayllataña manchakurqaku Tayta Diosta. Animalkunata wañuchispam Tayta Diosman ofrecerqaku, prometekurqakutaqmi paytaña servinankupaqpas. 17  Ichaqa Tayta Diosmi alistasqan hatun challwawan Jonasta millpurachirqa chaynapim Jonasqa kimsa punchaw hinaspa kimsa tutan challwapa ukunpi karqa.

Willakuykuna