Jeremias 19:1-15

19  Tayta Diosmi kaynata niwarqa: —Manka ruraqpata rispaykim allpamanta aysakuta rantiramunki hinaspam qamkuna ukupi ancianokunatawan sacerdote ancianokunata pusaspa  lloqsinkichik Ben-hinom Wayqoman. Chay wayqoqa kachkan “Kallanakuna Punku” nisqankupa chimpanpim. Chaypim ñoqapa nisqaykunata qayarikuq hina  kaynata nimunki: “Juda nacionpi reykunawan Jerusalen llaqtapi yachaqkuna, Llapallan Kamachiq Tayta Diospa otaq Israelpa yupaychasqan Tayta Diospa kayna nisqantayá uyariychik: ‘Kay sitiopa contranpi castigota kachamuptiymi llapallan uyariqkunaqa muspaypi hinaraq rikurinqaku.  Israel castakunaqa ñoqata saqeruwaspaykichikmi kay sitiotapas manaña asuykunaypaq hina rurarunkichik. Qamkunapapas abueloykichikkunapapas chaynataq Juda nacion reykunapapas mana reqsisqanku taytacha-mamachakunamanñam inciensota kañarqankichik. Kay sitiopiqa wañuchirqankichiktaqmi inocente runakunatapas.  Qamkunaqa hatarichirqankichiktaqmi Baal sutiyoq taytachapa capillankunatapas chaynapi chaykunapa hichpanpi churikichikkunata Baalman kañanaykichikpaq. Chaykunata ruranaykichikpaqqa manam kamachirqaykichikchu, manam rimarirqanichu nitaq piensarqanichu.  Chayraykum hamunqa tiempokuna kay sitiota Tofetwan otaq Ben-hinom Wayqowan manaña sutichanankupaq, chaytaqa sutichanqaku Nakana Wayqowanñam.  Kay sitiopim Juda nacion runakunapa chaynataq Jerusalen llaqtayoq runakunapa rimanakusqanta mana kaqman churasaq. Wañunankupaqmi enemigonkuwanña vencechisaq. Ayankutañataqmi alton pawaq animalkunamanña hinaspa monte animalkunamanña qoykusaq.  Kay llaqtataqa tikrarusaq hukmanyananku hinaspa burlakunanku sitiomanñam. Chaynin pasaq runakunapas pasaypaq tuñichisqata qawaspam hukmanyasqallaña burlakunqaku.  Churi-wawankunatapas tayta-mamallankuwanmi mikurachisaq chaynataqmi kikinkupas sapakamataq mikunakunqaku, chaynataqa ruranqaku muyuriqninkumanta enemigonku atacaptin pasaypaq yarqaymanta kasqankuraykum.’ ” 10  —Chaynata rimaruspaykim riqmasiki runakunapa qayllanpi aysakuta pakiparunki 11  hinaspam Llapallan Kamachiq ñoqa Tayta Diospa nisqayta kaynata ninki: “Manaña pipas allichananpaq aysakuta pakichkaq hinam kay runakunatawan kay llaqtata tukurusaq. Manaña maypipas pampanankupaq sitio kaptinmi Tofet Wayqopiña ayankuta pampanqaku. 12  Ñoqa Tayta Diosmá nisqayman hina chaynata rurasaq kay llaqtatapas chaynataq runankunatapas. Tofet Wayqota hinamá kay llaqtataqa rurasaq. 13  Mana asuykunay Tofet Wayqo hinañam kanqa Jerusalen llaqtapi wasikunaqa chaynataq Juda nacion reykunapa wasinkunapas. Chay wasikunapa altosninpimá inciensota kañapurqaku llapallan lucerokunapaq, chaypitaqmi vino ofrendatapas hichapurqaku wakin taytacha-mamachakunapaqpas” nispa. 14  Willananpaq Tayta Diospa kachasqan Tofet Wayqomanta Jeremias kutiruspanmi templopa pationpi sayaykuspan runakunata nirqa: 15  —Israelpa yupaychasqan Llapallan Kamachiq Tayta Diosmi kaynata nin: “Sonqoykichikta rumiyarachispa palabraykunatapas mana kasukusqaykichikraykum kay llaqtapa chaynataq muyuriqninpi llaqtakunapa contranpi rimasqayman hina castigota kachamusaq” nispa.

Willakuykuna