Exodo 40:1-38

40  Tayta Diosmi Moisesta nirqa:  —Punta killapa punta kaq punchawninpim sayachinki ñoqaman asuykuna karpata.  Hinaspam chayman churanki Chunkantin Kamachikuy waqaychana baulta, chay baulpa kanan cuartoqa rakinaq telawan rakinasqam.  Chay karpamantaqmi apaykunki mesatapas hinaspam chaypa hawanpi churanki churana kaqkunatapas. Candelerotapas apaykuspaykim mecheronkunatapas sumaqta arreglanki.  Incienso kañana qorimanta altartapas baulpa ñawpaqninpim churanki, churankitaqmi yachanay karpapa punkunpi kananpaq telatapas.  Yachanay karpapa otaq ñoqaman asuykuna karpapa punkunpa ñawpaqninpitaqmi lliw kañana altartapas churanki.  Churankitaqmi lavatoriotapas karpamanta altarman rinapi, chay lavatoriopim yakutapas churanki.  Rurankitaqmi karpapa muyuriqninpi patiotapas, churankitaqmi patiopa punkunpi cortinatapas.  —Untana aceitewanmi ñoqapa yachanay karpaman tallinki, tallinkitaqmi chaypi tukuy ima kaqkunamanpas chaynataq ñoqapaq sapaqchasqa lliw serviciokunamanpas. Chaynapimá ñoqapaq sapaqchasqa kanqa. 10  Tallinkitaqmi lliw kañana altarmanpas, lliw servicionkunamanpas, chaypimá ñoqapaq sapaqchanki altarta hinaptinmi altarqa kanqa ñoqallapaqña. 11  Aceitetaqa tallinkitaqmi lavatoriomanpas hinaspa tiyananmanpas. Chaynapim ñoqapaq sapaqchanki. 12  —Aarontawan churinkunatam ñoqaman asuykuna karpapa punkunman asuykachinki hinaspam chaypi bañachinki. 13  Serviwananpaq pachakunawan Aaronta pachachispaykim paymanpas aceiteta tallinki, chaynapim sapaqchapuwanki sacerdotey kananpaq. 14  Churinkunatapas asuykachispam camisonkunawan pachachinki. 15  Paykunatapas taytanta hinam sacerdoteykuna kananpaq aceitewan tallinki. Aceitewan tallisqaykiraykum wiñaypaq sacerdoteykuna kanqaku lliw mirayninkupipas —nispa. 16  Moisesqa Tayta Diospa tukuy kamachisqanta hinamá rurarqa. 17  Chaynapim iskay kaq watapa punta kaq killanpi hinaspa chay killapa punta kaq punchawninpi Diospa yachanan karpaqa sayachisqa hinaspa armasqa karqa. 18  Moisesmi sayachirqa Diospa yachanan karpata, churarqam toqosqa tiyanakunatapas. Sayachirqam marcokunatapas hinaspam ustuchirqataq qeronkunatapas. Sayachirqataqmi pilarninkunatapas. 19  Diospa yachanan karpapa hawanmanpas taparqam cortinakunawan hinaspam chaypa hawanman qatanta churarqa, chaynataqa rurarqa Moisesman Tayta Diospa kamachisqanpi hinam. 20  Churarqataqmi Chunkantin Kamachikuytapas baulpa ukunman, ustuchirqataqmi varillankunatapas chaywan apanankupaq, chaypa hawanmanñataqmi huchakuna pampachana tapata churarqa. 21  Chaymantam baulta apaykurqa Diospa yachanan karpaman hinaspam cuarto rakinaq telata churarqa Chunkantin Kamachikuy waqaychana baul harkananpaq, chaynataqa rurarqa Moisesman Tayta Diospa kamachisqanpi hinam. 22  Diosman asuykuna karpamanmi mesata apaykurqa karpapa *ichoq lawninpi churananpaq, chay mesaqa karqa cuarto rakinaq telapa hawa lawninpim. 23  Mesapa hawanpim patanarqa Diospa tantankunatapas, chaynataqa rurarqa Moisesman Tayta Diospa kamachisqanpi hinam. 24  Chay karpamanmi candelerotapas churarqa Diospa yachananpa *alleq lawninpi otaq mesapa chimpanpi. 25  Tayta Diospa ñawpaqninpim mecherokunatapas Moises ratachirqa Tayta Diospa kamachisqanpi hina. 26  Chay karpamantaqmi churarqa qorimanta altartapas, chayqa karqa cuarto rakinaq telapa ñawpaqninpim. 27  Chaypa hawanpim kañarqa especeriamanta inciensota imaynam Moisesman Tayta Diospa kamachisqanpi hina. 28  Churarqataqmi Diospa yachanan karpapa punkunpi telatapas. 29  Lliw kañana altartapas Diospa yachanan karpapa punkunman churaspanmi chaypa hawanpi animalta kañarqa lliwta, kañarqataqmi kawsaykunamanta ofrendatapas, imaynam Moisesman Tayta Diospa kamachisqanpi hina. 30  Churarqataqmi lavatoriotapas karpamanta altarman rinapi, chay lavatoriopim churarqa yakuta mayllakunankupaq. 31  Chay lavatoriomantam yakuta horqorqaku Moisespas, Aaronpas hinaspa churinkunapas chaynapi makinkutawan chakinkuta mayllakunankupaq. 32  Chaynatamá mayllakuqku Diosman asuykuna karpaman yaykuspanku, mayllakuqkutaqmi altarman asuykuspankupas imaynam Moisesman Tayta Diospa kamachisqanpi hina. 33  Moisesqa rurarqataqmi Diospa yachanan karpapa hinaspa altarninpa muyuriqninpi patiotapas hinaspam churarqa cortinatapas patiopa punkunpi. Chaynatam Moises tukurqa chaykuna rurayta. Diosman asuykuna karpapa hawanpi puyu rikurisqanmanta (Nm 9:15-23) 34  Karpata puyu tapaykuptinmi Tayta Diospa kanchaynin huntaykurqa chay yachananman. 35  Chaymi Moises karpaman mana yaykuyta atirqachu chaypa hawanpi puyu kasqanrayku. Tayta Diospa kanchayninmi huntarurqa yachanan karpaman. 36  Diospa yachananmanta puyu hoqarikuruptinñataqmi samasqankumanta Israelpa mirayninkuna pasaqku maymi rinankuta. 37  Puyu mana hoqarikuptinqa manam riqkuchu hoqarikunan punchawkama. 38  Ichaqa Tayta Diospa puyunmi punchawqa kaq yachanan karpapa hawanpi, tutañataqmi hina chaypa hawanpitaq kaq kancharichkaq nina chaynapi Israelpa castankunata riptinku kanchananpaq.

Willakuykuna

Ichoq lloqe,
Alleq paña.