Deuteronomio 5:1-33

5  Israelpa llapallan mirayninkunata huñuruspanmi Moises nirqa: —Israelpa mirayninkuna, qamkunaman kunan yachachisqay decretokunatayá chaynataq reglamentokunatayá uyariychik. Chaykunataqa sumaqta yachaspaykichikyá kasukuychik.  —Yupaychasqanchik Tayta Diosmi Horeb Orqopi ñoqanchikwan contratota rurarqa.  Chay contratotaqa rurarqa manam abuelonchikkunallawanchu aswanqa ñoqanchikpiwanmi otaq kaypi llapallanchik huñunasqa kaqkunapiwanmi.  Tayta Diosqariki chay orqopim rupachkaq nina ukumanta kikinpuni rimapayawarqanchik.  Chay tiempopiqa ñoqam karqani Tayta Diospa hinaspa qamkunapa chawpikichikpi chaynapi Tayta Diospa palabrankunata qamkunaman willanaypaq. Qamkunaqa rupachkaq ninata manchakuspaykichikmi orqoman mana seqarqankichikchu. Chaypim Tayta Dios nirqa:  “Ñoqam kani yupaychasqaykichik Tayta Dios, Egipto nacionpi sirviente kasqaykichikmantam horqomurqaykichik.  Ñoqallam Diosqa kani, amam huk dioskunaqa kapusunkichu.  “Amam taytacha-mamachataqa rurankichu imaman rikchakuqtapas, hanaq pachapi kaqman rikchakuqtapas, kay pachapi kaqman rikchakuqtapas nitaq allpapa ukun yakupi kaqman rikchakuqtapas.  Amam qonqorakunkichu chaykunapa ñawpaqninpiqa, amataqmi adorankichu. Ñoqaqa kani yupaychasqayki Tayta Diosmi. Ñoqaqa manam munanichu sapaq diosta adoranaykichiktaqa, chaynata ruraspa cheqniwaqniy tayta-mamakunapa huchallikusqanmantam castigasaqpuni wawa-churinkunata, chay wawa-churinkunapa willkankunata chaynataq chay willkanpa churinkunatapas. 10  Ichaqa kuyawaqniy runataqa otaq kamachikuyniy kasukuq runataqa waranqantin mirayninkunakamam favorecesaq. 11  “Ñoqapa sutiytaqa amam yanqaqa rimankichu. Sutiy yanqa rimaqtaqa castigasaqpunim. 12  “Yupaychasqayki ñoqa Tayta Diospa kamachisqaypi hinam samana punchawniyta respetanki hinaspa ñoqapaq sapaqchanki. 13  Soqta punchaw llamkaspaykim tukuy ruraynikikunata ruranki, 14  qanchis kaq punchawpim ichaqa samanki, chay punchawqa punchawniy kasqanrayku. Chay punchawpiqa amam rurankichu ima ruranatapas. Amataqmi ruranqachu qari churikipas nitaq warmi churikipas nitaq sirvientekipas nitaq sirvientaykipas nitaq bueyesnikipas nitaq asnoykipas nitaq ima animalnikipas nitaq llaqtaykipi yachaq forasteropas. Qam samaptikim sirvientekikunapas samanqaku. 15  Qamqa yuyariyá Egipto nacionpi sirviente kasqaykita, chaymantam yupaychasqayki ñoqa Tayta Dios hatun atiyniywan chaynataq hatun castigowan qamta horqomurqayki. Chayraykumá yupaychasqayki Tayta Dios kamachiki samana punchawta respetanaykipaq. 16  “Yupaychasqayki ñoqa Tayta Diospa kamachisqaypi hinam tayta-mamaykita respetanki chaynapi ñoqapa qonay allpapi allin kanaykipaq hinaspa unay kawsanaykipaq. 17  “Amam pitapas wañuchinkichu. 18  “Amam hukwanqa pierdekunkichu. 19  “Amam suwakunkichu. 20  “Amam runamasikipa contranpiqa llullakunata rimankichu. 21  “Amam munapayankichu runamasikipa warminta, amam munapayankichu runamasikipa wasinta nitaq allpanta nitaq sirviententa nitaq sirvientanta nitaq bueyesninta nitaq asnonta nitaq runamasikipa imantapas.” Diosta Israelpa mirayninkuna manchakusqanmanta (Ex 20:18-26) 22  —Kay palabrakunatam Tayta Dios fuertemanta rimarqa rupachkaq nina ukumanta chaynataq tutayay puyu ukunmanta orqopa ñawpaqnin pampapi llapallanku kachkaptinku. Upallaruspanñataqmi kay palabrakunata qellqarqa iskay tabla rumikunapi hinaspam qowarqa ñoqaman. 23  Tutayay ukumanta lloqsimuq vozta uyarispaykichikmi chaynataq orqotapas rupachkaqta qawachkaptikichikmi ayllukunapa llapallan jefenkuna ancianokunapiwan ñoqaman hamuspa niwarqaku: 24  “Cheqaptapunipas Tayta Diosmi qawaykachiwanchik kanchaynintawan atiyniyoq kayninta. Uyarirunchiktaqmi voznintapas ninapa chawpinmanta. Kunanmi yacharuniku runakunata Tayta Dios rimapayachkaptinpas runakunaqa mana wañurusqanta. 25  Chaywanpas ¿imanasqamá chinkasaqkuqa kay mancharikuypaq ninapa rupasqanwanqa? Sichu yapatawan yupaychasqanchik Tayta Diospa vozninta uyarispaqa seguruch wañurusaqku. 26  Ninapa ukunmanta kawsaq Diospa vozninta ñoqayku hina uyarichkaspaqa manam pipas kawsanmanchu. 27  Chaynaqa qamllayá yupaychasqanchik Tayta Diosman asuykuspa tukuy nimususqaykita uyarimuy hinaspam qamña ñoqaykuman willawankiku chaynapi kamachimususqaykita kasukunaykupaq” nispa. 28  —Chaykuna niwasqaykichiktam Tayta Diosqa uyarichkarqa hinaspam niwarqa: “Uyarirqanim kay runakunapa nisusqaykita, allinpunim chay tukuy nisusqaykiqa. 29  Amalaya chayna sonqoyoqlla kanmanku respetawanankupaq hinaspa sapa punchaw llapallan kamachikuyniykunatapas kasukunankupaq chaynapi paykunapas chaynataq mirayninkupas allin kanankupaq. 30  Rispaykiyá nimuy karpankuman kutinankupaq. 31  Qamqa hinapim ñoqawan kanki hinaptinmi nisqayki tukuy kamachikuyniykunata, decretoykunata chaynataq reglamentoykunatapas chaynapi dueñochakunankupaq qosqay allpapi cumplinankupaq” nispa. 32  Chaynaqa yupaychasqanchik Tayta Diospa tukuy kamachisusqaykichiktayá mana pantaspa kasukuychik. 33  Yupaychasqanchik Tayta Diospa kamachisusqaykichikpi hinayá allinta kawsaychik chaynapi dueñochakunaykichik allpapipas unay watakuna kawsanaykichikpaq.

Willakuykuna