Deuteronomio 26:1-19

26  —Dueñochakunaykichikpaq yupaychasqanchik Tayta Diospa qosunaykichik allpaman yaykuspaqa hinaspa chaypiña yachaspaqa,  chay allpapi qespisqanmantam cosechasqaykichik punta rurunkunata canastapi apankichik yupaychasqanchik Tayta Diospa akllasqan llaqtaman.  Chaypim servikuq sacerdoteman asuykuspa ninkichik: “Yupaychasqanchik Tayta Diospa qayllanpim kunan rimarini abuelonchikkunaman prometisqan allpapiña kasqayta” nispa.  Hinaptinmi sacerdote canastata chaskisuspaykichik yupaychasqanchik Tayta Diospa altarninpa ñawpaqninman churanqa.  Chaymantam yupaychasqanchik Tayta Diospa qayllanpi ninkichik: “Ñawpaq abuelonchikkunaqa karqaku Aram lawmanta purikuq as runakunallam. Egipto nacionman ripukuqkunañataqmi chaypi mirarurqaku hatun atiyniyoq ancha achka kanankukama.  Ichaqa Egipto nacionniyoq runakunam maqawarqanchik. Ñakarichiwaspanchikmi mana llakipayarikuspa servichikuwarqanchik.  Chaymi abuelonchikpa yupaychasqan Tayta Diosta mañakurqanchik hinaptinmi payqa uyariykuwarqanchik, qawarqataqmi hatun llakikuypi kasqanchiktapas, tukuypi llamkasqanchiktapas chaynataq ñakarichiwasqanchiktapas.  Chaymi hatun atiyninwan, manchakuypaq señalkunawan chaynataq admirakuypaq milagrokunawan Egiptomanta horqomuwarqanchik  hinaspam kayman pusamuwaspanchik tukuy imapapas kasqan allpata qowarqanchik. 10  Chayraykum kunan apamuni Tayta Diospa qowasqan allpapa punta rurunkunata” nispa. —Yupaychasqanchik Tayta Diospa qayllanpi canastata churaykuspam qonqorakunkichik. 11  Chaymantam fiestata rurankichik qamkunamanpas chaynataq familiaykichikmanpas yupaychasqanchik Tayta Diospa tukuy allinkuna qosusqaykichikmanta. Qamkunawan kuskataqmi kusikunqaku qamkunawan yachaq Leviy ayllu runakunapas chaynataq forasterokunapas. Diezmokuna qonankumanta 12  —Sapa kimsa wata cumplikuptinmi tukuy kapuqnikikunamanta qonki diezmoykita, tukuy imapas cosechasqaykimantam rakispa diezmoykita qonki, chaykunataqa qonki Leviy casta runakunamanmi, forasterokunamanmi, mana piyniyoqkunamanmi chaynataq viudakunamanmi, chaynapim llaqtaykipi saksanankukama mikunqaku. 13  Chaykunata qospaykim yupaychasqanchik Tayta Diospa qayllanpi ninki: “Cosechasqaykunamanta sapaqchanay diezmoykunatam wasiymanta horqospay aypurqani Leviy casta runakunaman, forasterokunaman, mana piyniyoqkunaman chaynataq viudakunamanpas, tukuy chaykunatam kamachiwasqaykita cumplirqani. Tukuy kamachisqaykikunata mana qonqaspaymi kasukurqani. 14  Chay sapaqchasqay diezmokunamantaqa manam mikurqanichu wañuchikuypi kaspaypas nitaq qanman mana asuykamunaypaq hina kaspaypas nitaqmi wañuqkunamanpas ofrecerqanichu. Yupaychasqay Dios Taytalláy, tukuy kamachiwasqaykita kasukuspaymi cumplirqani. 15  Yachasqayki hanaq pachamanta qawarimuspaykiyá Israelpa miraynin runaykikunata bendeciykuwayku, bendeciykuytaqyá qowasqaykiku tukuy imapa kasqan allpatapas, abueloykuman juraspa prometesqaykiman hina” nispa. Israelpa mirayninkuna Tayta Diospaq sapaqchasqa kasqankumanta 16  —Yupaychasqanchik Tayta Diosmi kunan kamachisunki kay decretokunata hinaspa kay reglamentokunata ruranaykipaq. Chaynaqa tukuy sonqoykiwan tukuy yuyaynikiwanyá kasukuy. 17  Kunanmi nirqanki yupaychasqanchik Tayta Diosqa Diosniki kasqanta. Prometerqankitaqmi paypa munasqanman hina kawsanaykipaq chaynataq decretonkunata, kamachikuyninkunata, reglamentonkunatapas wiñaypaq kasukuspa cumplinaykipaq. 18  Chaynaqa kunanmi Tayta Dios nisunkichik prometekusqanman hina qamkunaqa runankunaña kasqaykichikta, chaynaqa kasukunaykichikmi tukuy kamachikuyninkunata. 19  Wakin nacionkuna hatarichisqanmantapas qamkunatam ancha alabasqa nacionpaq hoqarisunkichik hinaptinmi ancha reqsisqa suma-sumaqpaq qawasqa kankichik. Tayta Diospa nisqanpi hinam payllapaqña sapaqchasqa nacion kankichik.

Willakuykuna