2 Samuel 8:1-18
8 Chaykunapa qepantam Filistea runakunata David venceruspan humillaykachirqa. Paykunamantam Meteg-ama llaqtata qechururqa.
2 Vencerurqataqmi Moab casta tropakunatapas hinaspam pampaman siriykachispan cordelwan tupurqa, cordelwan iskay kuti tupusqapi kaqkunam wañuchisqa karqaku, cordelwan huk kuti tupusqapi kaqkunañataqmi kawsarqaku. Moab casta runakunata David munaychakuptinmi impuestota pagarqaku.
3 Rey Davidqa vencerurqataqmi Rehobpa churin Soba nacionpi Rey Hadad-ezertapas, paytaqa vencerurqa Eufrates Mayu lawpi allpankunata kutichikunanpaq richkaptinmi.
4 Paykunamantam waranqa qanchis pachaknin sillada soldadokunata David presocharurqa. Presocharurqataqmi iskay chunka waranqa chaki-puri soldadokunatapas. Pachak carretallapaqña caballokunata puchuykachispanmi carreta aysaq llapallan caballokunapa ankunta kuchurachirqa.
5 Damasco llaqta lawmantam Aram nacionniyoq tropakuna hamurqaku Soba nacionpa reynin Hadad-ezerta yanapanankupaq, Davidmi ichaqa chay Aram nacionniyoq tropakunamanta wañurachirqa iskay chunka iskayniyoq waranqa soldadokunata.
6 Davidmi soldadonkunapaq cuartelkunata churarurqa Aram nacion Damasco llaqtapi chaymi Aram nacionniyoq runakunaqa Davidta servispanku pagarqaku impuestota. Tayta Diosmi Davidta mayman peleaq riptinpas vencechirqa.
7 Hadad-ezerpa soldadonkunapa apamusqanku qorimanta harkachikuna armankutam David qechururqa hinaspam Jerusalen llaqtaman aparqa.
8 Hadad-ezerpa munaychakusqan llaqtakunamantam otaq Beta llaqtamantawan Berotai llaqtamantam venceruspan nana-nanaq bronceta Rey David apachimurqa.
9 Hadad-ezerpa lliw tropankunata David vencerusqanta Hamat nacionpa reynin Toi yacharuspanmi
10 Rey Davidman kacharqa churin Joramta, paywanmi apachirqa qorimanta, qollqemanta hinaspa broncemanta serviciokunata, kacharqaqa Hadad-ezerwan Rey David guerrapi kaspan vencerusqanmanta rimaykuspa alabamunanpaqmi. Chay Toi sutiyoq reypas Hadad-ezerwanmi guerrapi karqa.
11 Jorampa apamusqan serviciokunatam Tayta Diospaq David sapaqcharqa. Sapaqcharqataqmi munaychakusqan llapallan nacionkunamanta qori-qollqe apamusqankutapas.
12 Sapaqcharqamá Edom nacionmanta, Moab nacionmanta, Amonpa mirayninkunamanta, Filistea runakunamanta, Amalec casta runakunamanta chaynataq Hadad-ezerwan peleaspan qechumusqantapas. Hadad-ezerqa karqa Rehobpa churin Soba nacionpa reyninmi.
13 Davidmi aswan ancha reqsisqa rikurirurqa Aram nacionniyoq tropakunata venceramusqanwan. Vencerurqataqmi chunka pusaqniyoq waranqa Edom nacionniyoq soldadokunatapas Kachi Qechwawan sutichasqa sitiopi.
14 Enteron Edom nacionpi soldadonkunapaq cuartelkunata David churaruptinmi, Edom nacionniyoq llapallan runakunaqa Davidtaña servirqaku. Tayta Diosmi Davidta mayman peleaq riptinpas vencechirqa.
Davidpa tropan kamachiqkunamanta
(2 S 20:23-26. 1 Cr 18:14-17)
15 Davidmi lliw Israel nacionpi gobiernarqa hinaspam allinta ruraspa allin arreglota rurarqa llapallan runankunapaq.
16 Sarviapa wawan Joabmi llapallan tropakunapa kamachiqnin karqa. Ahiludpa churin Josafatñataqmi karqa imapas pasaqkunamanta qellqaq.
17 Ahitobpa churin Sadocpiwan Abiatarpa churin Ahimelecñataqmi karqa sacerdotekuna. Seraiasñataqmi karqa secretario.
18 Joiadapa churin Benaiam kamachirqa Ceret castamantawan Pelet castamanta kaq rey waqaychaq soldadokunata. Davidpa churinkunañataqmi karqa consejaqninkuna.
