2 Reyes 1:1-18

1  Rey Acabpa wañukusqan qepallantam Moab nacionniyoq runakuna hoqarikururqa Israel nacionpa contranpi.  Samaria llaqtapi yachaq Rey Ocoziasmi palacionpa altosnin ventanamanta wichiykamuspan onqorurqa chaymi runankunata qayaspan nirqa: —Rispaykichikyá Ecron llaqtapi Baal-zebub sutiyoq taytachata tapumuychik kay onqosqaymanta sanoyasaqchus icha manachus.  Hinaptinmi Tisbe llaqtayoq Eliasta Tayta Diospa angelnin nirqa: —Riyá Samaria llaqtapi yachaq reypa kachasqan runakunawan tupamuq hinaspayá nimuy: “Israel nacionpiqa manachum karqa Dios chaynapi Ecron llaqtapi kaq Baal-zebub sutiyoq taytachataraq tapuchimunaykichikpaq” nispa.  Hinaspapas nimuytaqyá ñoqa Tayta Diospa kayna nisqayta: “Onqosqayki camaykimantaqa manañam hatarinkiñachu aswanqa wañunkipunim” nispa. Chaymi Elias chaynata nimurqa.  Kachasqan runakuna reyman kutiruptinmi paykunata tapurqa: —¿Imanasqataq kutiramunkichik? —nispa.  Chaymi paykuna nirqa: —Huk runawan tuparuptiykum niwarqaku: “Kachamusuqnikichik reyman kutirispayá Tayta Diospa niwasqanta kaynata nimuychik: ‘¿Israel nacionpiqa manachum karqa Dios chaynapi Ecron llaqtapi kaq Baal-zebub tayta- chataraq tapuchimunaykichikpaq? chaynaqa onqosqayki camaykimantaqa manam hatarinkiñachu, aswanqa wañunkipunim’ nispa.”  Hinaptinmi reyñataq paykunata tapurqa: —Tupasqaykichik hinaspa chayna willasuqnikichik runaqa ¿imaynataq karqa? —nispa.  Chaymi paykunañataq nirqa: —Payqa karqa pelomanta pachayoqmi chaynataq qaramanta rurasqa correawan weqawninpas watasqam —nispa. Chaymi reyñataq nirqa: —Payqa Tisbe llaqtayoq Eliasmi —nispa.  Hinaspam capitanta pichqa chunka runankunatawan kacharqa. Eliasñataqmi tiyachkarqa moqopi chaymi capitan niykurqa: —Diospa runan, qamtam rey nimusunki: “Hamuway” nispa. 10  Chaymi pichqa chunka kamachiq capitanta Elias nirqa: —Diospa runan kaptiyqa cielomanta nina uraykamuspayá qamtawan pichqa chunka runaykikunata ruparuchun —nispa. Cielomanta Diospa kachamusqan nina uraykamuspanmi capitantawan pichqa chunka runankunata ruparurqa. 11  Reymi kacharqa huk capitantaña pichqa chunka runankunatawan. Paypas Eliastam nirqa: —Diospa runan, qamtam rey nimusunki: “Chaylla hamuway” nispa. 12  Chaymi Eliasñataq nirqa: —Diospa runan kaptiyqa cielomanta nina uraykamuspayá qamtawan pichqa chunka runaykikunata ruparuchun —nispa. Cielomanta Diospa kachamusqan nina uraykamuspanmi capitantawan chaynataq pichqa chunka runankunata ruparurqa. 13  Yapatawanmi kacharqa kimsa kaq capitanta pichqa chunka runankunatawan chaymi Eliaspa kasqanman chayaruspan paypa qayllanpi qonqorakuykurqa hinaspam ruegakurqa: —Diospa runan, ruegakuykim vidallaytawan kay pichqa chunka serviqnikikunapa vidanta allin ñawikiwan qawarinaykipaq. 14  Ñam iskay kutikamaña cielomanta nina uraykamuspan punta hamuq capitankunatawan pichqa chunka runankunata ruparun. Vidallaykutaqa allin ñawikiwanyá qawariy —nispa. 15  Hinaptinmi Eliasta Tayta Diospa angelnin nirqa: —Paywan riy, amayá paytaqa manchakuychu —nispa. Chaymi Elias hatarispan capitanwan kuska reyman rirqa. 16  Chayaruspanmi reyta nirqa: —Tayta Diosmi kaynata nisunki: “Ecron llaqtapi Baal-zebub taytachata tapuchimunaykipaqqa ¿manachum Israel nacionpiqa karqa Dios paypa imam ninanta tapuchimunaykipaq? chaynaqa onqosqayki camaykimantaqa manam hatarinkiñachu aswanqa wañunkipunim” nispa. 17  Eliaswan Tayta Diospa nichisqanman hina Ocozias wañuruptinmi paypa wawqen Joramña gobiernarqa Ocoziasqa mana churiyoq kasqanrayku. Gobiernaytaqa qallarirqa Josafatpa churin Joram iskay watamanña Juda nacionpi gobiernachkaptinmi. 18  Ocoziaspa wakin rurasqankunaqa Israel nacion reykunapa wakin rurasqanmanta willakuq libropim qellqasqa kachkan.

Willakuykuna