Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

Santiago 5:1-20

  • Apukuna imayna kanankumanta (1-6)

  • Ñakariykunapi kaspapas allinta takyaspa pacienciakuqta Dios bendecisqanmanta (7-11)

  • ‘Arí’ nispaqa cumplinamanta (12)

  • Iñiyniyuq runapa Diosta mañakusqan atiyniyuq kasqanmanta (13-18)

  • Pipas huchallikuruptin kutimunanpaq yanapanamanta (19, 20)

5  Yaw apukuna, qipa punchaw ñakarinaykichikmantayá waqaspa qaparkachaychik.  Tukuy kapuqnikichikmi ismurun, pachaykichikpas puyusqam kachkan.  Llapa qurikichikpas hinaspa qullqikichikpas lliwñam akarun, chayna kasqanmi qawachinqa mana allin kasqaykichikta, hinaspam aychaykichiktapas tukurunqa. Tukuy ima huñusqaykichikpas qamkunapaqmi tukupay punchawkunapi nina hina kanqa.  Cosechaykichikpi llamkaqkunamanmi mana pagapurqankichikchu, chay mana pagapusqaykichik qullqim qayakuchkan, chaymantapas cosechaqkunapa qaparispanku yanapakuy mañakusqankutam tropakuna kamachiq Jehova* Dios uyarirun.  Kay pachapim qamkunaqa tukuy imayuq kawsarqankichik hinaspam aychaykichik kusichiypi purirqankichik, wañuchisqa kanaykichik punchawpipas qamkunaqa hinallam puquchkankichik.  Mana huchayuq runatam tumparqankichik hinaspa wañurachirqankichik, ¿manachu payqa qamkunapa contraykichikpi kachkan?  Chaynaqa wawqi-panillaykuna, señorninchik chayaramuspa kaypi kanan* tiempokamayá pacienciakuychik. Chakrapi llamkaqpas suyanmi chakrapi tarpusqan rurunanta, payqa pacienciawanmi suyan punta chayamuq paratawan puquy parata.  Chaynayá qamkunapas pacienciakuychik, sunquykichikpas amayá iskayrayachunchu, hichpallañam kachkan señorninchik chayaramuspa kaypi kanan* tiempoqa.  Wawqi-panillaykuna, amayá qamkunaqa piñanakuychikchu, chaynapi ama juzgasqa kanaykichikpaq, punkullapiñam kachkan juzgawaqninchik señorqa. 10  Diosmanta willakuqkunam* yanqamanta ñakarispa pacienciakurqaku, paykunam Jehova Diospa sutinpi rimarqaku, wawqi-panillaykuna paykunapa imayna kasqantayá qatipakuychik. 11  Ñakariykunapi aguantaqkunatam ninchik: “Paykunaqa kusisqallañam kanku”, nispa. Uyarirqankichikmi Job sutiyuq runapa ñakariykuna aguantasqanmanta, yachankichiktaqmi Jehova Dios payta bendecisqantapas. Arí, Jehova Diosqa llumpay kuyapayakuqmi hinaspapas llakipayakuqmi. 12  Wawqi-panillaykuna, tukuy imamantapas astawanqa amayá hanaq pacharaykupas, kay pacharaykupas, nitaq imaraykupas juraychikchu. Aswanqa ‘arí’ nispaqa cumpliychikyá, ‘manam’ nispapas manam nisqaykichikman hinayá ruwaychik, chaynapi Dios mana juzgasunaykichikpaq. 13  ¿Sasachakuykunawanchu mayqannikichikpas ñakarichkan? Chayna kaspanqa Diostayá tukuy tiempo mañakuchun. ¿Mayqannikichiktaq kusisqa kachkan? Chaynaqa salmokunatayá Diospaq takichun. 14  ¿Mayqannikichiktaq unquchkan*? Chaynaqa iñiqkuna* ukupi punta apaqkunatayá* qayachun, chaynapi Jehova Diospa sutinpi chay unquqta aceitewan untaykuspa Diosta mañapunankupaq. 15  Iñiyniyuq runapa Diosta mañakusqanqa unquq runatam sanoyachinqa, Jehova Diospas sayarichinqam, huchanpas pampachasqam kanqa. 16  Chaynaqa, ama pinqakuspayá huchaykichikta willanakuychik hinaspapas llapallaykichikpaqyá Diosta mañakuychik, chaynapi sanoyanaykichikpaq. Allin ruwaq runapa tukuy sunquwan Diosta mañakusqanqa ancha atiyniyuqmi. 17  Eliaspas ñuqanchik hina sentimientoyuq runam karqa, chayna kaspanpas tukuy sunqunwanmi Diosta mañakurqa mana paramunanpaq, chaymi kimsa wata suqta killan mana paramurqachu. 18  Huktawan Diosta mañakuptinñataqmi paraykamurqa hinaptinmi chakrapas rururqa. 19  Wawqi-panillaykuna, mayqinnikichikpas chiqap iñiymanta karunchakuruptin, huknikichikñataq kutichimuptinqa, 20  chay pantay ñanmanta kutichimuqmi chay huchallikuqta wañuymanta salvaykunqa, hinaptinmi huchallikuqpa maynaña huchantapas Diosninchik pampachaykunqa.

Willakuykuna

Qaway: Palabrakuna entiendenapaq listata.
Griego rimaypiqa: “Parousia”, ninmi. Chay ninanqa: “Ladonpi tarikuy”, ninanmi. Qawaytaq: Palabrakuna entiendenapaq listata.
Griego rimaypiqa: “Parousia”, ninmi. Chay ninanqa: “Ladonpi tarikuy”, ninanmi. Qawaytaq: Palabrakuna entiendenapaq listata.
Utaq: “Profetakunam”. Qawaytaq: Palabrakuna entiendenapaq listata.
Kaypiqa rimachkan iñiyninpi unqusqanmantam.
Utaq: “Congregacion”. Qawaytaq: Palabrakuna entiendenapaq listata.
Utaq: “Ancianokunatayá”. Qawaytaq: Palabrakuna entiendenapaq listata.