Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

Santiago 4:1-17

  • Runakunapa imayna kawsasqanta mana kuyanamanta (1-12)

    • Diablopa contranpi churakuymanta (7)

    • Diosman asuykunamanta (8)

  • Hatun tukuq mana kanamanta (13-17)

    • “Jehova Dios munaptinqa” nispa ninamanta (15)

4  ¿Maymantataq hamun qamkuna ukupi liryanakuykuna hinaspa atipanakuykunaqa? ¿Manachu chaykunaqa hamun aychaykichikpa munasqanmanta? Aychaykichikpa munasqanqa ukuykichikpim peleachkan allin munasqaykichikwan.  Imata munaspapas manam haypankichikchu, qamkunaqa runamasikichiktam wañuchichkankichik, hinaspam hukpa kaqninta munapayachkankichik ichaqa manam chay munasqaykichiktaqa tarinkichikchu, qamkunaqa hinallam liryanakuchkankichik hinaspa atipanakuchkanchik. Diosta mana mañakusqaykichikraykum imapas munasqaykichiktaqa mana tarinkichikchu.  Mañakuspapas manam chaskinkichikchu mana allinta ruwanaykichikpaq mañakusqaykichikrayku, mañakuchkankichikqa aychaykichikpa munasqallanta ruwanaykichikpaqmi.  Yaw Diosta qipanchaqkuna*, ¿manachu yachankichik runakunapa mana allin kawsasqanta kuyaruspaqa Diospa enemigonña kasqaykichikta? Pipas runakunapa imayna kawsasqanta kuyaruqqa Diospa enemigonmi rikurirun.  Icha, ¿yanqachu Diospa qillqan nin: “Sunqunchikpi imayna kasqanchikraykum envidiakuspa hinalla imatapas munapayachkanchik”, nispa?  Envidiakuq kaymantaqa Diosninchikpa ancha kuyawasqanchikmi aswan allinqa, chaymi Diospa qillqan nin: “Diosqa hatun tukuqkunapa contranpim kachkan ichaqa ancha kuyakuynintam qawachin humilde kaqkunamanqa”, nispa.  Chaynaqa Diostayá tukuy imapi kasukuychik, hinaspayá diablopa contranpi churakuychik, hinaptinqa qamkunamantam diablo ayqikunqa.  Diosman asuykuptikichikqa paypas asuykusunkichikmi. Yaw huchasapakuna, mana allin ruwasqaykichikmantayá chuyanchakuychik, iskayrayaqkunapas sunquykichiktayá chuyanchaychik.  Chaynallataqyá llakikuychik, pesakuychik hinaspa waqaychik. Asikunaykichikmantaqa pesakuychikyá, kusikunaykichikmantaqa muspaypi hinayá kaychik. 10  Jehova* Diosninchikpa qayllanpiyá mana kaqpaqpas hina kasqaykichikpaq hapikuychik, hinaptinqa hatunchasunkichikmi. 11  Wawqi-panillaykuna, iñiqmasikichikmantaqa amayá mana allintaqa rimaychikchu. Pipas iñiqmasinmanta rimaqqa utaq juzgaqqa, leypa contranpim rimachkan hinaspam leyta juzgachkan. Leyta juzgaspaqa manam leypa kamachisqantachu ruwachkanki, aswanqa juezñam rikurirunki. 12  Chullallam leyta quq Diosqa, payllataqmi juezpas, paymi salvawachwanpas chaynataq chinkarachiwachwanpas, hinaptinqa, ¿pitaq qamqa kanki runamasikita juzganaykipaqqa? 13  Uyariychikyá, “kunanmi utaq paqarinmi risunchik kay llaqtata utaq wak llaqtata hinaspam watantin negociota ruwamuspa qullqita ganakamusunchik” nispa rimaqkuna. 14  Qamkunaqariki manam yachankichikchu paqarin punchaw imam pasarusunaykichiktaqa. Qamkunaqa kankichik huk rato rikuriramuspa chinkaruq puyu hinallam. 15  Chayna ninaykichikmantaqa kaynatam niwaqchik: “Jehova Dios munaptinqa kawsaspachiki kayta utaq wakta ruwasunchik”, nispa. 16  Qamkunam ichaqa hatun tukuchkankichik hinaspam kikillaykichikmanta alabakunkichik, chayna hatun tukuyqa manam allinchu. 17  Chaynaqa pipas allinkuna ruwayta yachachkaspa mana ruwaspanqa huchallikuchkanmi.

Willakuykuna

Kaypiqa nichkan: “Hukwan pierdekuqkuna”, nispam.
Qaway: Palabrakuna entiendenapaq listata.