Romanos 8:1-39

  • Chuya espirituwan kawsakuyta hinaspa librasqa kayta haypanamanta (1-11)

  • Diospa churin kasqankumanta Diospa espiritunpa willakusqan (12-17)

  • Unanchasqa kaqkuna Diospa churinkuna librasqa kanankuta suyasqankumanta (18-25)

  • Yanapawaqninchik espiritu kasqanmanta (26, 27)

  • Diospa ñawpaqmantaraq tanteasqanmanta (28-30)

  • Diospa kuyakuyninwan sasachakuykunata vencenamanta (31-39)

8  Chaynaqa manam sentenciasqachu kanku Cristo Jesuswan kuska kaqkunaqa.  Qamtaqa chuya espiritupa* leyninmi librasurqanki huchapa chaynataq wañuypa leyninmanta, chay espirituqa Cristo Jesuswan huklla kaqkunaman vida quqmi.  Huchallikuq kasqanchikrayku Moisespa leyninpa mana ruway atisqantam Diosqa ruwarqa kikin churinta kachamuspan, chaynapi huchata chinkachinanpaq hinaspa runapi kaq huchata castigananpaq, churinqa karqa ñuqanchik hina runam.  Churintaqa kachamurqa Moisespa leyninpi allin kamachikuykuna ñuqanchikpi cumplikunanpaqmi, ñuqanchikqa manam aychaman hinachu purinchik aswanqa chuya espirituman hinam.  Aychaman hina puriqkunaqariki aychaman hinallam piensanku, chuya espirituman hina puriqkunam ichaqa espirituman hinalla piensanku.  Aychaman hinalla piensayqa wañuymanmi apakun, espirituman hina piensaymi ichaqa kawsakuyman hinaspa hawkayayman apakun,  aychaman hinalla piensayqariki Diospa enemigon kaymanmi apakun, manam Diospa leynintaqa kasukunchu, manataqmi chaytaqa ruwanmanchu.  Chaymi aychaman hinalla puriqkunaqa Dios kusichiytaqa mana atinmankuchu.  Chuya espiritu qamkunapi chiqaptapuni kaptinqa manam aychaman hinachu purichkankichik aswanqa espirituman hinam. Ichaqa pipas Cristo hina mana piensaspanqa* manam Cristopachu. 10  Qamkunawan huklla Cristo kaptinqa hucharaykum cuerpoykichikqa wañusqa kachkan, chuya espiritum ichaqa vidata qun allin ruwaqña chaskisqa kasqaykichikrayku. 11  Chayrayku, sichu qamkunapi kanqa wañusqakunapa kasqanmanta Jesusta kawsarichiqpa chuya espiritun, hinaptinqa qamkunapa wañuruqlla cuerpoykichiktapas qamkunapi kaq chay espiritunwanmi kawsarichinqa, payqariki wañusqakunapa kasqanmanta Cristo Jesusta kawsarichiqmi. 12  Chaymi wawqillaykuna ñuqanchikqa mana saqikunanchikchu cuerponchik controlawananchiktaqa nitaq imapas munasqanta ruwanantaqa. 13  Aychaman hina kawsaspaykichikqa wañunkichikpunim, chuya espiritupa yanapakuyninwan cuerpoykichikpa ruwasqankunata wañuchispaykichikmi ichaqa kawsankichik. 14  Diospa chuya espiritunwan llapallan pusasqa kaqkunaqa Diospa chiqap churinkunam. 15  Diospa espiritunqa manam sirviente kanapaqchu nitaq manchakuq kanapaqchu churawanchik, aswanqa yanapawanchikmi Diospa churinkuna hinaña kananchikpaq, chuya espirituwanmi “¡abba* tayta!” nispa qayakunchik. 16  Diospa espiritunmi sunqunchikpi* sutillata qawachin Diospa churinkuna kasqanchikta. 17  Churinkuna kaspanchikqa herenciatapas chaskiqkunam kanchik. Ñuqanchikqa kanchik Diosmanta herencia chaskiqmi hinaspa Cristopa herencia chaskiqmasin. Cristo hina ñakarispaqa paywan kuskataqmi hatunchasqa kasunchik. 18  Chaynaqa, kunan tiempopi ñakarisqanchikqa manam imallapipas tupanchu hamuq tiempopi chaskinanchikpaq Diospa qawachiwananchik suma-sumaq premiowanqa. 19  Llapa unanchasqa kaqkunam ganasllawanña suyachkanku Diospa churinkuna hina qawachisqa kanankuta. 20  Unanchasqa kaqkunaqa mana valeq kawsakuymanmi churasqa karqa, chaynaqa karqa manam munachkaptinchu aswanqa Diospa munayninpim, chayna kaptinpas suyachkankum 21  unanchasqakuna huchapa hinaspa wañuypa sirvienten kasqankumanta librasqa kanankuta, chaynapi Diospa churinkuna hina libreña kanankupaq, chayna librasqa kasqankuqa suma-sumaqmi kanqa. 22  Ñuqanchikqa yachanchikmi hinalla lliw unanchasqakuna kunankama llapallanku ñakarispa “¡ay, ay!” nisqankuta hinaspa kunankama nanaypi llapallanku tarikusqankuta. 23  Manam paykunallachu, ñuqanchikpas utaq espirituta chaskiqkunapas sunqunchikpim “¡ay, ay!” nichkanchik, chay espirituqa herencianchikmanta punta kaqmi, chaynam tarikunchik Diospa churinkuna hinaña kananchikta ganasllawanña suyaspanchik, Diosqa churinkunata hinañam chaskiwasun cuerponchikmanta librasqa kananchikpaq precionta Cristo pagasqanrayku. 24  Diospa hatun bendicionninta suyachkaptinchikmi payqa huchamanta salvaykuwarqanchik. Pipas suyasqanta chaskiruspanqa manañam suyanñachu, ¿imaynamá imapas suyasqanta chaskiruspanqa suyanqaraq? 25  Mana rikusqanchikta suyaspanchikmi ichaqa ganasllawanña pacienciakuspa suyanchik. 26  Chaynallataqmi espiritupas mana kallpayuq tarikuptinchik yanapawananchikpaq ñuqanchikwan kachkan. Ñuqanchikqa yachanchikmi Diosta mañakunanchikta, ichaqa manam yachanchikchu ima nispa mañakuyta, hinaptinmi mana rimachkaspalla “¡ay, ay!” nispa ñakariptinchik espirituqa ñuqanchikta yanapawanchik. 27  Sunqukunata allintapuni riqsiqmi ichaqa yachan espiritupa ima niy munasqanta, chay espirituqa Diospa munayninman hinam Diospa runankunata* yanapan. 28  Yachasqanchikman hinam kuyaqninkunapa allinninpaq Diosqa imatapas ruwan unanchasqankuna llapallanku huklla yanapanakunankupaq, chay kuyaqninkunaqa Diospa munayninman hinam qayasqa kanku. 29  Diosqariki ñawpaqmantaraqmi tantearqa punta chaskisqan runakuna churinman rikchakunankupaq, chaynapi churin achka wawqikunamanta piwi* kananpaq. 30  Chaymantapas, churinman rikchakunankupaq ñawpaqmantaraq chaskisqan runakunataqa qayarqataqmi hinaspam Diosqa mana huchayuqtaña rikurirachin hinaspañataqmi hatuncharqa. 31  Hinaptinqa, ¿ima nisuntaq kaykunamantaqa? Ñuqanchikwan Dios kaptinqa, ¿pitaq contranchikpiqa kanman? 32  Churinpuni ñakarinantapas mana harkakuspan llapallanchikpa rantinchikpi entregaykuqqa, ¿imanasqamá manaqa tukuy imakunatapas quykuwasunchu? ¿Manachu kuyakuyllawanña churinwan kuska quykuwasun? 33  Diospa akllasqankunapa contranpiqa, ¿pitaq imatapas ninman? Paykunaqa Diospaqmi mana huchayuqña rikurirunku. 34  ¿Pitaq paykunata sentencianman? Manamá pipas. Cristo Jesusmi wañurqa, paymi kawsarimurqa hinaspam Diospa alliq* lawninpi kachkan, chaymantapas payqa ñuqanchikpa rantinchikpi sayaqmi. 35  ¿Pitaq Cristopa kuyakuyninmanta rakiwachwan? ¿Ancha-ancha ñakariychu, llakisqallaña kaychu, qatikachasqa kaychu, yarqaymanta kaychu, mana pachayuq kaychu, peligropi kaychu icha wañuchiwananchikpaq amenazasqa kaychu? 36  Chayqa kayna qillqasqa kasqanman hinam: “Qamraykum tukuy tiempo wañuypa patanpi kaniku, wañuchinapaq ovejakunata hinam qawawanku”, nispa. 37  Aswanqa kuyawaqninchik Cristoraykum tukuy kay sasachakuykunata pasaypaqta vencechkanchik. 38  Ñuqaqa kaymantam mana iskayrayanichu: Manam wañuypas, vidapas, angelkunapas, gobiernokunapas, atiypas, kunan tiempopi ima kaqkunapas, hamuq tiempopi ima kaqkunapas, 39  altopi kaqpas, ukupi kaqpas, ni ima unanchasqa kaqkunapas rakiwachwanchu Diospa kuyakuyninmantaqa, kuyakuyninqa señorninchik Cristo Jesuspim kachkan.

Willakuykuna

Utaq: “Diospa atiyninpa”. Qawaytaq: Palabrakuna entiendenapaq listata.
Kaypiqa nichkan: “Cristopa espiritun pi runapipas mana kaptinqa”, nispam.
Kayqa hebreo utaq arameo rimaypim kachkan, abba ninanqa: “Papalláy”, ninanmi.
“Sunqunchikpi” nispanqa, runa imayna kasqanmantam rimachkan. Griego rimaypiqa: “Pneuma”, ninmi.
“Diospa runankunata”, utaq: “Chuya runakunata”.
Utaq: “Punta churi”.
Utaq: “Paña”.