Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

Romanos 6:1-23

  • Cristopi bautizakuspa musuqmanta kawsakuymanta (1-11)

  • Cuerponchikpi hucha munaychakunanta mana saqikunamanta (12-14)

  • Huchapa sirvienten kanamantaqa Diospa sirvientenña kanamanta (15-23)

    • Huchapa pagon wañuy kasqanmanta hinaspa Diospa regalonñataq kawsakuy kasqanmanta (23)

6  Chaynaqa, ¿ima nisuntaq? ¿Hinallachu huchallikusun Diospa ancha kuyakuynin aswanraq kananpaq?  ¡Manamá! Huchapaq wañuruchkaspañaqa, ¿imaynamá hinallaqa huchapiraqqa kawsasun?  Icha, ¿manachu yachankichik Cristo Jesuspi llapallanchik bautizakuqkunaqa paypa wañusqanpi bautizakusqanchikta?  Paywanmi pampasqa karqanchik wañusqanpi bautizakusqanchikwan, chaynapi wañusqakunapa kasqanmanta hanaq pacha taytapa atiyninwan Cristopa kawsarimusqanman hina, ñuqanchikpas musuq kawsakuypiña purinanchikpaq.  Sichu paypa wañusqanman hina wañuruspanchikqa ñuqanchikpas paypa kawsarimusqanman hinam kawsarisunchik, chaykunawanmi ñuqanchikqa paywan huklla kachkanchik.  Ñuqanchikqa yachanchikmi ñawpaq vidanchik paywan kuska qirupi* clavowan takasqa kasqanta, chaynapi huchallikuq cuerponchik manaña imatapas ruwayta atinanpaq, hinaptin manaña huchapa sirvienten kananchikpaq.  Pipas wañukuqqa huchanmantam pampachasqaña rikurirun.  Chaymantapas, Cristowan wañuruspanchikqa paywan kawsananchikmantam mana iskayrayanchikchu.  Ñuqanchikqa yachanchikmi Cristo manaña wañunanta, payqariki wañusqakunapa kasqanmantam hatariramun, paytaqa manañam wañuyqa munaychakunchu. 10  Payqa huchata chinkachinanpaqmi huk kutillata wañukurqa, manañam haykapipas wañunqañachu, kawsakuyninmi ichaqa Diospaqña. 11  Chaynallataqyá qamkunapas huchapaqqa wañusqa hinaña kaychik, Diospaqyá ichaqa Jesucristorayku kawsakuychik. 12  Chaynaqa amañayá saqikuychikchu wañuruqlla cuerpoykichikpi hucha munaychakunantaqa, chaynapi cuerpoykichikpa munasqanta mana ruwanaykichikpaq. 13  Amataqyá cuerpoykichiktaqa* quychikchu mana allinkunata ruwanapaq herramientakunata* hinaqa, aswanqa Diosmanyá qukuychik wañusqakunapa kasqanmanta kawsarimuqkuna hina, chaynallataqyá vidaykichiktapas Diosman quychik allinkunata ruwanapaq herramientata hina. 14  Huchaqa manam munaychakusunaykichikchu, qamkunaqa manam leypiñachu kachkankichik, aswanqa Diospa ancha kuyakuyninpiñam. 15  Hinaptinqa, ¿ima nisuntaq? ¿Leyta kasukunapaq manaña obligasqa kaspachu Diospa ancha kuyakuyninta chaskisqanchikrayku huchata ruwasun? ¡Manamá! 16  ¿Manachu yachankichik kasukuq sirviente hina pimanpas entregakuspaqa, chay kasukusqaykichikpa sirvienten kasqaykichikta? Kawaqchikmi wañuyman apaq huchapa sirvienten utaq allin ruwayman apaq kasukuypa sirvienten. 17  Ichaqa Diospa munayninpim huk tiempopi huchapa sirvienten kachkaspaykichikpas, chaskisqaykichik yachachikuykunata sunqumantapuni kasukuqña rikurirunkichik. 18  Arí, huchamantam librasqaña karunkichik, chaymi allin ruwaypa sirvientenña rikurirunkichik. 19  Hucharayku mana kallpayuq kasqaykichikraykum ñuqaqa rimachkani runapa rimayninpi. Imaynam ñawpaqta sirvienteta hina cuerpoykichikta qurqankichik millakuypaq ruwaykunaman, hinaspa mana allin ruwaykunaman chayna mana allinkunata ruwanaykichikpaq, chaynayá kunanqa cuerpoykichikta quychik allin ruwaypa sirvientenña kananpaq, chaynapi chuya kawsakuypiña kanaykichikpaq. 20  Huchapa sirvienten kaspaykichikqariki librem karqankichik allinkuna ruwaymantaqa. 21  Hinaptinqa, ¿imatataq chay tiempopi tarirqankichik? Tarirqankichikqa kunan pinqakusqaykichik ruwaykunatam. Chay ruwaykunaqa wañuymanmi apakun. 22  Kunanmi ichaqa huchamanta librasqaña kasqaykichikrayku hinaspa Diospa sirvientenña kasqaykichikrayku cosechachkankichik chuya kawsakuytaña, chaymantañataq wiñay kawsayta. 23  Huchapa pagonqariki wañuymi, Diospa regalonmi ichaqa señorninchik Cristo Jesusrayku wiñaypaq kawsakuy.

Willakuykuna

Utaq: “Kaspipi”. Qawaytaq: Palabrakuna entiendenapaq listata.
Kaypiqa nichkan: “Cuerpoykichikpa partenkunataqa”, nispam.
Kaypiqa nichkan: “Armakunata”, nispam.