Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

Romanos 14:1-23

  • Mana juzganakunamanta (1-12)

  • Hukkunata mana urmachinamanta (13-18)

  • Hawkalla hinaspa huk sunqulla kanapaq kallpanchakunamanta (19-23)

14  Iñiyninpi mana allin kaq runata kusikuywan chaskiychik, ichaqa amayá sapakamapa ima piensasqanmanta juzganaykichikpaqchu.  Iñiyninpi allin kaq runaqa tukuy imatam mikun, iñiyninpi mana allin kaq runam ichaqa verdurallata mikun.  Mikuqqa amayá mana mikuqtaqa pinqachunchu, mana mikuqpas amayá mikuqtaqa pinqachunchu, Diosmi paytaqa allinta chaskiykun.  ¿Pitaq qamqa kanki hukpa sirviententa juzganaykipaqqa? Patronninpaqmi sayasqapas utaq urmasqapas kachkan. Chiqaptapunim payqa sayarichisqa kanqa, Jehova* Diosqa atinmanmi sayarichiytaqa.  Wakinmi huk punchawta aswan allinpaq qawan, wakinñataqmi ima punchawtapas chaynallata qawan. Sapakamayá ama iskayrayachunchu imapas tanteasqanmantaqa.  Ima punchawtapas allinpaq qawaq runaqa Jehova Diospaqmi qawan. Mikuqpas Jehova Diospaqmi mikun, payqa Diostam agradecekun, mana mikuqpas Jehova Diospaqmi mana mikunchu, chaywanpas Diostam agradecekun.  Manam mayqinninchikpas kikillanchikpaqchu kawsanchik nitaq kikillanchikpaqchu wañunchik.  Kawsaspaqa kawsanchik Jehova Diospaqmi, wañuspapas wañunchik Jehova Diospaqtaqmi. Hinaptinqa, kawsaspapas utaq wañuspapas Jehova Diospam kanchik.  Cristoqa wañukurqa hinaspa kawsarimurqa wañuqkunapapas chaynataq kawsaqkunapapas señornin kananpaqmi. 10  Chaynaqa, ¿imanasqataq wawqikita juzganki? Utaq, ¿imanasqataq wawqikita pinqanki? Ñuqanchikqa llapallanchikmi juzgasqa kananchikpaq Diospa qayllanpi kasunchik. 11  Qillqasqam kachkan: “Jehova Diosmi nin: ‘Ñuqa kawsasqayman hinam, qayllaypi llapallan runakuna qunqurakunqaku hinaspam llapallan runakuna sutillata yachanqaku Dios kasqayta’”, nispa. 12  Chaynaqa, sapakamam kikinchikmanta Diosman cuentata qusunchik. 13  Hinaptinqa, amañayá kikinchikpuraqa juzganakusunchu, aswanqa tukuy atisqanchiktayá ruwasun pitapas mana urmachinapaq, iñiqmasinchikpa ñawpaqninpipas amayá ima sasachaqnintapas churasunchu. 14  Ñuqaqa señor Jesuspa qatiqnin kasqayraykum mana iskayrayanichu kikillanmanta imapas mana qanrachasqa kasqanmantaqa, imatapas millakuypaq qawaq runallapaqmi imapas millakuypaqqa kachkan. 15  Sichu mikusqaykiwan wawqiki mana allin tarikuptinqa manañam kuyakuyman hinañachu purichkanki. Amayá mikusqaykiraykuqa wawqikipa iñiynintaqa chinkachiychu, payraykumiki Cristoqa wañukurqa. 16  Chaynaqa ruwasqaykichik allin kaptinpas amayá ruwaychikchu, chay ruwasqaykichikrayku mana allinta qamkunamanta rimananku kaptinqa. 17  Diospa munaychakuyninman* yaykuyqa manam mikuymantachu nitaq tomaymantachu, aswanqa chuya espiritupa* yanapakuyninwan allin ruwaq kaymantam, hawkalla kaymantam hinaspa kusisqa kawsakuymantam. 18  Chayna kaspan Cristota sirviente hina serviqqa, Diospa chaskisqan hinaspa runakunapapas allin qawasqanmi. 19  Chayraykuyá hinalla ruwasun hawkalla kanapaq imapas yanapawaqninchik kaqkunata hinaspa kikinchikpura kallpanchanakunapaq kaqkunata. 20  Amayá Diospa ruwasqantaqa mikuyraykullaqa tuñichiychu. Chiqaptamá tukuy imapas limpio, ichaqa manam allinchu pi runapas mikusqanwan hukta urmachiptinqa. 21  Wawqiki mana urmananraykuqa allinmi kanman aychata amaña mikuyniki, vinota amaña tomayniki hinaspa imatapas amaña ruwayniki. 22  Iñiynikiqa Diospa qayllanpiyá qamllapaq kachun. Kusisqamá imapas ruwasqanmanta kikinta mana juzgakuq runaqa. 23  Iskayrayaspan mikuspanmi ichaqa huchayuqña kachkan iñiyman hina mana mikusqanrayku. Imapas iñiyman hina mana kaspaqa hucham.

Willakuykuna

Qaway: Palabrakuna entiendenapaq listata.
Utaq: “Gobiernonman”. Qawaytaq: Palabrakuna entiendenapaq listata.
Utaq: “Diospa atiyninpa”. Qawaytaq: Palabrakuna entiendenapaq listata.