Romanos 13:1-14

  • Autoridadkunata kasukunamanta (1-7)

    • Impuestokuna paganamanta (6, 7)

  • Kuyakuqqa Moisespa leyninta kasukusqanmanta (8-10)

  • Punchawpi hina purinamanta (11-14)

13  Llapallan runakunayá* autoridadkunata kasukuchunku, autoridadkunaqariki manam kanmanchu Dios mana munaptinqa, autoridadkunaqa imam ruwanankuta ruwanankupaqmi Dios churaptillan kachkanku.  Chaynaqa, autoridadkunapa contranpi pipas churakuqqa Diospa imayna ruwasqanpa contranpim churakuchkan, contranpi churakuqkunaqa juzgasqam kanqaku.  Autoridadkunaqa kachkanku mana allin ruwaqkuna manchakunankupaqmi, manam allin kaqta ruwaqkuna manchakunankupaqchu. ¿Autoridadkunata mana manchakuspa kawsakuytachu munanki? Chayna kaptinqa hinallayá allin kaqta ruway chaynapim paykunapa alabasqan kanki.  Paykunaqa qampa allinnikipaq Diospa serviqninmi kanku. Mana allin kaqta ruwaspayki ichaqa manchakuy, paykunaqa manam yanqachu kanku atiyniyuqqa*. Autoridadkunaqa Diospa serviqninmi kanku mana allin ruwaqkunata castiganankupaq.  Chaynaqa kasukunaykichikpunim, ichaqa manamá castigota manchakuspallachu, kasukunaykichikqa concienciaykichikraykutaqmi.  Chaymi qamkunapas impuestota pagankichik, autoridadkunaqa kanku Diospa serviqninmi. Paykunaqa tukuy tiempom imam ruwayninkuta ruwanku.  Llapallanmanyá imam kaqta quychik: Impuesto mañakuqman impuestota, pago mañakuqmanpas quykuy pagota, chaynallataqyá kasukuychik kasukunaykichik munaqtapas, respetaychiktaqyá respetanaykichik munaqtapas.  Pitapas amayá imamantapas debekuychikchu, debespaqa debekuychik kuyanakuyllatayá. Runamasinta kuyaqqa cumplirunñam Moisespa leyninta.  Wakin kamachikuykunam nin: “Amam hukwan pierdekunkichu*, amam pitapas wañuchinkichu, amam suwakunkichu, amam hukpa kaqnintapas munapayankichu”, nispa. Kay kamachikuykunapiwan wakin kamachikuykunapas hukllawasqam kachkan, “runamasikitam kuyanki kikikita hina” nisqa kamachikuypi. 10  Pipas kuyakuqqa manam runamasinpaq mana allin ruwaqchu, chaynaqa pipas kuyakuqqa Moisespa leynintam allinta cumplichkan. 11  Kaykunataqa ruwanaykichikmi imay tiempopi kasqanchikta yachasqaykichikrayku. Ñamá horaña puñusqaykichikmanta rikcharinaykichikpaq, kunanmi salvakunanchik punchawqa aswan hichpallapiña kachkan iñisqanchik punchawmantaqa. 12  Tutam llumpay tutaña kachkan, achikyaramunqañam kanpas. Chayraykuyá tutapi ruwana kaqkunata wischusunchik, hinaspayá Diosmanta hamuq armakunawan churakusunchik*. 13  Punchawpi hinayá allinta purisun, amayá pinqaypaq kusirikuykunapichu, sinkakuypichu, qacha* ruwaypichu nitaq mana pinqakuspa mana allin ruwaypichu*, liryanakuypichu nitaq sientichinakuypichu. 14  Aswanqa señor Jesucristopa ejemplontayá qatikuychik, amayá ñawpaqmantaraqqa tanteaychikchu aychaykichikpa munasqanta ruwanaykichikpaqqa.

Willakuykuna

Utaq: “Almakunayá”. Qawaytaq: Palabrakuna entiendenapaq listata.
Kaypiqa nichkan: “Espadayuqqa”, nispam.
Utaq: “Waqllikunkichu”.
Kaypiqa nichkan: “Kanchay armakunawan churakusunchik”, nispam.
Utaq: “Qanra”.
Qaway: Palabrakuna entiendenapaq listata.