Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

Mateo 7:1-29

  • URQUPI JESUSPA YACHACHISQANMANTA (1-27)

    • Pitapas mana juzganamanta (1-6)

    • Hinalla mañakunamanta, maskanamanta hinaspa qayakunamanta (7-11)

    • Runamasinchikpaq allin kaqkuna ruwananchikmanta (12)

    • Kichki punkunta yaykunamanta (13, 14)

    • Rurusqanpi riqsinamanta (15-23)

    • Taqra rumipa utaq aqupa hawanpi wasita hatarichinamanta (24-27)

  • Jesuspa yachachisqanwan runakuna admirakusqankumanta (28, 29)

7  Amayá hukkunata juzgaychikchu chaynapi mana juzgasqa kanaykichikpaq,  juzgasqaykichikman hinam juzgasqa kankichik, hukkunata imayna ruwasqaykichikman hinataqmi paykunapas ruwasunkichik*.  Hinaptinqa, ¿imanasqataq wawqikipa ñawinpi qupata* qawanki ñawikipi machu-machu kulluta mana qawakuchkaspaykiqa?  Utaq ñawikipi machu-machu kullu kachkaptinqa, ¿imaynamá wawqikitaqa niwaq, ‘ñawikipi qupata* hurqurusqayki’ nispaqa?  ¡Iskay uya runa! Puntataqa ñawikipi kullutaraqyá hurqukuruy, chaynapi allinta qawaspayki wawqikipa ñawinpi qupata* hurqunaykipaq.  Amayá Diospa kaqninkunataqa allqukunamanqa quychikchu nitaq perlasnikichiktapas kuchikunamanqa wischuychikchu, chaynapi mana saruparunankupaq hinaspa kutiriykamuspa mana tisaparusunaykichikpaq.  Hinallayá mañakuychik hinaptinqa qusunkichikmi, hinallayá maskaychik hinaspaqa tarinkichikmi, hinallayá punkuta takaychik hinaptinqa kichaykusunkichikmi.  Pipas mañakuqqa chaskinmi, pipas maskaqqa tarinmi, punku takaqpas kichaykachikunmi.  ¿Mayqinnikichiktaq churikichikmanqa rumita quykuwaqchik tantata mañakusuptikichik? 10  Utaq ¿culebrata quykuwaqchik challwata mañakusuptikichik? 11  Qamkunaqa mana allin runakuna kachkaspaykichikpas allin kaqkunatam churikichikmanqa qunkichik. Hinaptinqa, ¡aswanraqchiki mañakuqninkunamanqa hanaq pachapi kaq taytaykichikqa allin kaqkunata qunqa! 12  Chaynaqa, imaynam qamkunapas munankichik runamasikichik qamkunapaq imapas ruwananta, chaynatayá qamkunapas paykunapaq ruwaychik. Chaynatam kamachin Moisespa leyninpas hinaspa Diosmanta willakuqkunapa* nisqanpas. 13  Kichki punkuntayá yaykuychikqa, hatun punkuqa hinaspa hatun ñanqa wañuymanmi apakun, achkallañam chaynintaqa yaykuchkanku, 14  kichki punkuwan kichki ñanmi ichaqa kawsayman apakun, chaytaqa asllam tarinku. 15  Cuidakuychikyá Diosmanta willakuq tukuqkunamanta*, paykunaqa ovejaman rikchakuqllaña hamuspankupas sunqunkupiqa yarqasqa atuqkunam* kanku. 16  Hinaptinqa, rurunpim riqsinkichik, manamá runaqa haykapipas kichkakunamantaqa uvasta nitaq higostapas pallanmanchu, ¿aw? 17  Chaynallataqmi allin sachapas allinllata rurun, mana allin sacham ichaqa mana allinllata rurun. 18  Allin sachaqa manam rurunmanchu mana allin rurutaqa, manataqmi mana allin sachapas allintaqa rurunmanchu. 19  Lliw mana allin ruruq sachaqa kuchurachikuspanmi ninaman wischuykachikun. 20  Hinaptinqa rurunpimá chayna runakunataqa riqsinkichik. 21  Manam ‘¡señorlláy, señorlláy!’ nispa llapallan niwaqniykunachu hanaq pachapi Diospa munaychakuyninmanqa* yaykunqa, aswanqa hanaq pachapi taytaypa munasqanta ruwaqkunallam. 22  Chay punchawpiqa achkallañam niwanqaku: ‘Señorlláy, señorlláy, ¿manachu sutikipi willakurqaniku, demoniokunata qarqurqaniku hinaspa milagrokunatapas ruwarqaniku?’, nispa. 23  Hinaptinmi paykunata nisaq: ‘¡Manam haykapipas riqsirqaykichikchu, qayllaymanta pasawaychik mana allin ruwaqkuna!’, nispa. 24  Nisqaykunata uyarispa lliw kasukuqkunaqa rikchakunmi taqra rumipa hawanpi wasinta hatarichiq yuyayniyuq runaman. 25  Para chayaramuptinmi llumpa-llumpay lluqlla hamururqa, wayrapas llumpayllatañam wasiman pukumurqa, ichaqa taqra rumipa hawanpi cimientasqa kasqanraykum wasiqa mana tuñirqachu. 26  Nisqaykunata uyarichkaspan mana kasukuq runañataqmi rikchakun aqupa hawanpi wasinta hatarichiq mana yuyayniyuq runaman. 27  Para chayaramuptinmi llumpa-llumpay lluqlla hamururqa, wayrapas llumpayllatañam wasiman pukumurqa hinaptinmi wasiqa lliw tuñirurqa”. 28  Chaykunamanta Jesus rimayta tukuruptinmi runakunaqa imayna yachachisqanwan uyarayarqakuraq. 29  Paypa yachachisqanqa Diosmantam karqa, manam escribakunapa* hinachu.

Willakuykuna

Kaypiqa nichkan: “Imayna tupusqaykichikman hinam qamkunapas tupusqa kankichik”, nispam.
Utaq: “Pajata”.
Utaq: “Pajata”.
Utaq: “Pajata”.
Utaq: “Profetakunapa”. Qawaytaq: Palabrakuna entiendenapaq listata.
Utaq: “Profeta tukuqkunamanta”.
Kaypiqa nichkan: “Lobo”, nispam. Kay animalqa atuq kaqllam, ichaqa aswan hatunmi.
Utaq: “Gobiernonmanqa”. Qawaytaq: Palabrakuna entiendenapaq listata.
Qaway: Palabrakuna entiendenapaq listata.