Mateo 3:1-17

  • Bautizaq Juanpa Diosmanta willakusqan (1-12)

  • Jesuspa bautizakusqanmanta (13-17)

3  Chay punchawkunapim bautizaq Juanqa Judea law chunniqkunapi willakustin purirqa,  hinaspam nirqa: “Hanaq pacha Diospa munaychakuynin* hichparamusqanraykuyá huchaykichikmanta wanakuychik”, nispa.  Diosmanta willakuq* Isaiasmi Juanmanta kaynata nirqa: “Uyariychik, chunniqpim runa qayakuchkan: ‘¡Jehova* Diospa ñannintayá allichaychik! Purinan ñankunatayá derechaychik’”, nispa.  Juanpa pachanmi karqa camellopa pelonmanta, wiqaw watakunanñataqmi karqa qaramanta, mikunanñataqmi karqa aqarway urukuna hinaspa purun abejapa miskinkuna.  Runakunañataqmi Jerusalenmanta payman rirqaku, rirqakutaqmi Judeamanta chaynataq Jordan mayupa chimpankunamantapas,  hinaspam Jordan mayupi Juanwan bautizachikurqaku*, huchankutapas riqsikuspankum willakurqaku.  Bautizasqanman achkallaña fariseokuna* hinaspa saduceokuna* hamusqankuta qawaykuspanmi Juan nirqa: “Venenoyuq culebrapa mirayninkuna, ¿pitaq willasurqankichik Diospa piñakuyninmanta ayqinaykichikpaq?  Chaynaqa, ruwasqaykichikwanyá qawachiychik huchaykichikmanta wanakusqaykichikta.  Amayá sunquykichikpiqa niychikchu ‘Abrahanmi taytayku’ nispaqa. Diosqa kay rumikunamantapas Abrahanpa churinkunataqa hatarirachinmanmi. 10  Hachaqa ñam sachakunapa sapinman churasqaña kachkan. Chaymi lliw mana allin ruruq sachaqa kuchusqa kaspan ninaman wischusqa kanqa. 11  Ñuqam yakuwan bautizaykichik huchaykichikmanta wanakusqaykichikrayku, qipay hamuqmi ichaqa ñuqamantapas aswan atiyniyuq, manam usutallantapas hurqunaypaq hinachu kani. Paymi chuya espirituwan* hinaspa ninawan bautizasunkichik. 12  Wayrachinanqa makinpiñam kachkan, hinaspanmi erasqanta suma-sumaqta wayrachinqa. Trigotam huqarinqa taqiman, pajatañataqmi kañanqa mana amachay atina ninawan”, nispa. 13  Chaymantam Jesusqa Galileamanta Jordan mayuman rirqa Juanwan bautizachikunanpaq. 14  Ichaqa Juanmi mana munaspan nirqa: “Ñuqam qampa bautizananqa kanay, hinachkaptinchu ¿qamraq ñuqaman hamuwanki?”, nispan. 15  Jesusñataqmi nirqa: “Kunanllayá kachun, chayna mana kaptinqa manam Diospa tukuy munasqantaqa ruwachwanchu”, nispa. Hinaptinmi manaña harkakurqachu. 16  Chaymi Bautizarachikuspan Jesusqa yakumanta chaylla lluqsirqa, hinaptinmi hanaq pacha kicharikuykuptin rikururqa Diospa espiritun paloma hina payman uraykamuchkaqta. 17  Chaymantapas hanaq pachamantam nimurqa: “Paymi churiy, paytam kuyani hinaspapas chaskinim”, nispa.

Willakuykuna

Utaq: “Gobiernon”. Qawaytaq: Palabrakuna entiendenapaq listata.
Utaq: “Profeta”. Qawaytaq: Palabrakuna entiendenapaq listata.
Qaway: Palabrakuna entiendenapaq listata.
Utaq: “Yakupi challpuchikurqaku”.
Qaway: Palabrakuna entiendenapaq listata.
Qaway: Palabrakuna entiendenapaq listata.
Utaq: “Diospa atiyninwan”. Qawaytaq: Palabrakuna entiendenapaq listata.