Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

Mateo 28:1-20

  • Jesuspa kawsarimusqanmanta (1-10)

  • Soldadokuna llullakunankupaq qullqi qusqankumanta (11-15)

  • Jesuspa qatiqnin kanankupaq kamachikuymanta (16-20)

28  Sabado punchaw pasaruptinmi, semanapa qallariynin punchaw* achikyayta Maria Magdalenawan* huknin Maria sepultura qawaq rirqaku.  Hatun terremotom karurqa Jehova* Diospa angelnin hanaq pachamanta uraykamusqanrayku, chay angelmi asuykuspan rumita asurachirqa hinaspanmi rumipa hawanpi tiyachkarqa.  Rikchayninmi karqa llipyay hina kancharichkaq, pachanñataqmi riti hina yuraq-yuraq.  Sepultura cuidaqkunam payta manchakuspanku katkatatarqaku hinaspam wañusqa hinaña rikurirurqaku.  Angelñataqmi warmikunata nirqa: “Ama manchakuychikchu, yachanim qirupi* wañuchisqa Jesusta maskasqaykichikta.  Payqa manam kaypiñachu, nisqanman hinam kawsarirunña. Hamuspayá qawaykuychik maypi churasqankuta.  Chaynaqa utqayman* rispaykichikyá qatiqninkunaman willamuychik paypa kawsarimusqanmanta, payqa Galileamanmi ñawpachkan, chaypim paytaqa rikunkichik. Ñuqam chaynata nichkaykichik”, nispa.  Chaymi warmikunaqa manchakuspankupas sepulturapa kasqanmanta kusisqallaña utqaylla* lluqsirqaku hinaspam kallpaylla* rirqaku Jesuspa qatiqninkunaman willamunankupaq.  Hinaptinmi paykunawan tuparuspan Jesus nirqa: “Rimaykullaykichik”, nispan. Warmikunañataqmi asuykurqaku hinaspam chakinmanta hapiykuspanku ñawpaqninpi kumuykurqaku. 10  Jesusñataqmi nirqa: “Ama manchakuychikchu, rispaykichikyá wawqiykunaman willamuychik Galileaman rinankupaq, chaypim rikuwanqaku”, nispa. 11  Warmikuna rinankukamam sepultura cuidaqmanta wakinqa llaqtaman riruspanku riqsisqa sacerdotekunaman tukuy kaykunamanta willakurqaku. 12  Chay sacerdotekunañataqmi autoridadkunawan huñunakuspanku tanteanakurqaku. Hinaspam achka qullqita chay cuidaqkunaman quspanku 13  nirqaku: “Ninkichikmi: ‘Puñuchkaptiykum qatiqninkuna tuta hamuruspanku suwarusqaku’, nispa. 14  Gobernador kaymanta yacharuptinqa ñuqaykum paywan rimasaqku, hinaptinmi qamkunaqa manaña imamantapas llakikunkichikñachu”, nispa. 15  Chaymi cuidaqkunaqa qullqita chaskikuykuspanku chay yachachisqankuman hina ruwarqaku. Chayna kasqantam judiokunaqa willakachakurqaku kunan punchawkama. 16  Chunka hukniyuq apostolkunañataqmi huñunakunankupaq Jesuspa nisqanman hina Galilea urquman rirqaku. 17  Rikuruspankuñataqmi ñawpaqninpi kumuykurqaku, wakinmi ichaqa iskayrayarqaku. 18  Jesusñataqmi paykunaman asuykuspa nirqa: “Tukuy atiytam chaskiruni hanaq pachapipas kay pachapipas. 19  Chaynaqa llapallan nacionpi runakunaman rispayá yachachimuychik qatiqniykunaña kanankupaq, hinaspayá bautizamuychik* hanaq pacha taytapa, churinpa hinaspa chuya espiritupa* sutinpi. 20  Yachachimuychikyá tukuy ima kamachisqaykunata kasukunankupaq. Sapa punchawmi ñuqaqa qamkunawan kasaq kay tiempopa tukupayninkama*”, nispa.

Willakuykuna

Kunanmi kay punchawta sutichanchik domingo nispa. Judiokunapaqmi domingoqa karqa semanapa qallariynin punchaw.
Utaq: “Magdala llaqtayuq Maria”.
Qaway: Palabrakuna entiendenapaq listata.
Utaq: “Kaspipi”. Qawaytaq: Palabrakuna entiendenapaq listata.
Utaq: “Apurawman”.
Utaq: “Apurawlla”.
Utaq: “Raskiylla”.
Utaq: “Yakupi challpumuychik”.
Utaq: “Diospa atiyninpa”. Qawaytaq: Palabrakuna entiendenapaq listata.
Qaway: Palabrakuna entiendenapaq listata.