Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

Mateo 25:1-46

  • CRISTO CHAYARAMUSQANTA QAWACHIQ SEÑALKUNAMANTA (1-46)

    • Chunka sipaskunawan rikchanachisqanmanta (1-13)

    • Talento nisqa qullqiwan rikchanachisqanmanta (14-30)

    • Ovejakunamantawan cabrakunamanta (31-46)

25  Hanaq pacha Diospa munaychakuyninqa* rikchakun mecheronkuta aparikuspa novio taripaq* chunka sipaskunamanmi.  Pichqa sipaskunam karqa mana yuyayniyuq, pichqañataqmi allin yuyayniyuq.  Mana yuyayniyuqkunam mecheronkuta apaspanku ratachinapaq aceitetañataq mana aparqakuchu,  allin yuyayniyuqkunam ichaqa aparqaku mecheronkuta hinaspa aysakuchankupi* aceitetapas.  Novio unamuptinmi, llapallanku puñuywan aysachikuspanku puñururqaku.  Hinaptinmi chawpi tutata uyarikurqa kayna qayakuy: ‘¡Kaypiñam novioqa kachkan! Tupanaykichikpaqyá lluqsimuychik’, nispa.  Hinaptinmi llapallan sipaskuna hatarispanku mecheronkuta alistarqaku.  Mana yuyayniyuq sipaskunam allin yuyayniyuqkunata nirqaku: ‘Aceitekichiktayá rakiykullawayku mecheroykum wañuruchkanña’, nispanku.  Allin yuyayniyuqkunañataqmi nirqaku: ‘Manapaschá qamkunapaqwanqa haypanmanchu. Rantikuqkunaman* rispaykichikyá qamkunapaq rantiramuychik’, nispa. 10  Chaymi rantiq rinankukama novioqa chayaramurqa, hinaptinmi listo kaq sipaskuna casarakuy convidoman noviowan yaykurqaku, chaymantam punku wichqakururqa. 11  Chaymantañam wakin sipaskunapas hamurqaku, hinaspam nirqaku: ‘¡Señor, señor, kichaykamullawaykuyá!’, nispanku. 12  Payñataqmi nirqa: ‘Chiqaptapunim nikichik: Manam riqsikichikchu’, nispa. 13  Qawan-qawanllayá kaychik, manam yachankichikchu imay punchaw nitaq imay hora kanantaqa. 14  Diospa munaychakuyninqa rikchakun huk law nacionman rinanpaqña kachkaspan, sirvientenkunata qayachimuspan kapuqninkunata saqipakuq runamanmi. 15  Hukninmanmi qurqa pichqa talento* nisqa qullqita, hukninmanñataq iskayta, hukninmanñataqmi hukllata. Sapakamamanmi qurqa ruway atisqankuman hinalla, chaymantam huk law nacionman ripukurqa. 16  Chayllam pichqa talento qullqi chaskiqqa chay qullqiwan llamkaspan chayna pichqatawanraq mirarachirqa. 17  Chaynallataqmi iskay chaskiqpas iskaytawanraq mirarachirqa. 18  Chullalla chaskiq sirvientem ichaqa pasaspan pampata tuqururqa, hinaspanmi patronninpa qullqinta pampaspan pakarurqa. 19  Unay tiempomantañataqmi chay sirvientekunapa patronnin kutiramurqa hinaspanmi paykunamanta cuentata mañarqa. 20  Hinaptinmi pichqa talento chaskiq sirviente, pichqa talento qullqitawanraq payman apamuspan nirqa: ‘Patronlláy, saqiwarqankim pichqa talento qullqita, kayqaya mirarachini pichqa talento qullqitawanraq’, nispa. 21  Patronninñataqmi nirqa: ‘¡Tukuy sunqumanta ruwaq allin sirviente, allintam ruwarunki! Kay asllapipas allin ruwaq kasqaykiraykum aswan achkataraq qusqayki. Chaynaqa, ñuqawanyá kusikuy’, nispa. 22  Paypa qipallantam iskay talento chaskiq sirvientepas hamuspan nirqa: ‘Patronlláy, saqiwarqankim iskay talento qullqita, kayqaya mirarachini iskay talento qullqitawanraq’, nispa. 23  Patronninñataqmi nirqa: ‘¡Tukuy sunqumanta ruwaq allin sirviente, allintam ruwarunki! Kay asllapipas allin ruwaq kasqaykiraykum achkataraq qusqayki. Chaynaqa, ñuqawanyá kusikuy’, nispa. 24  Chaymantañataqmi chullalla talento chaskiq sirviente hamuspan nirqa: ‘Patronlláy, ñuqaqa yacharqanim piñakuq kasqaykita, qamqa cosechankim mana tarpusqaykimanta, huñunkitaqmi mana wayrachisqaykimanta. 25  Chaymi manchakurqani hinaspam pasaspay talento qullqikitaqa allpapi pamparurqani. Kayqaya qullqikita kutichipuchkayki’, nispa. 26  Patronninñataqmi nirqa: ‘¡Mana allin hinaspa qilla sirviente!, mana tarpusqaymanta cosechasqayta hinaspa mana wayrachisqaymanta huñusqayta yachachkaspaykiqa, 27  bancomanchiki qullqiytaqa churawaq karqa, hinaptinchiki kunan kutimuspay mirayniyuqta qullqiyta chaskichkayman karqa. 28  Chaynaqa, talento qullqita paymanta qichuspaykichikyá, chunka talento qullqiyuqman quychik. 29  Kaqniyuqqa astawanraqmi chaskinqa hinaptinmi achkanpi kapunqa, mana kaqniyuqmi ichaqa kaqnintapas qichuchikunqa. 30  Mana imapaqpas valeq sirvientetayá hawa law tutayayman wischuychik, chaypim waqaspa kirunta kirichichichinqa’, nispa. 31  Ancha atiyninpi runapa churin* llapallan angelkunapiwan chayaramuspanmi achkirichkaq kamachinanpaq tiyananpi* tiyaykunqa. 32  Hinaptinmi qayllanpi llapallan nacionkuna huñunasqa kanqaku, chaymi runakunata rakinqa imaynam michiqpas cabrakunamanta ovejakunata rakichkaq hina. 33  Ovejakunatam rakinqa alliq* lawninman cabrakunatañataqmi ichuq* lawninman. 34  Hinaptinmi alliq* lawninpi kaqkunata kamachiqqa ninqa: ‘Hamuychikyá, taytaypa bendecisqankuna, hinaspayá chaskiychik runakuna rikurisqanmantapacha* qamkunapaq alistasqa Diospa munaychakuyninta. 35  Qamkunaqa yarqaymanta kaptiymi imallatapas mikuykachiwarqankichik, yakumanta kaptiymi tomaykachiwarqankichik, forastero kaptiymi samaykachiwarqankichik*, 36  mana pachayuq kaptiymi pachaykachiwarqankichik, unquruptiymi atiendeykuwarqankichik, carcelpi kaptiypas watukaykamuwarqankichikmi’, nispa. 37  Hinaptinmi allin ruwaq runakuna kaynata ninqaku: ‘Señorlláy, ¿haykapitaq yarqaymanta rikurqaykiku hinaspa mikuykachirqaykiku, yakumanta kaptikipas tomaykachirqaykiku? 38  ¿Haykapitaq forastero puriqta rikurqaykiku hinaspa samaykachirqaykiku* utaq mana pachayuqta rikuspayku pachaykachirqaykiku? 39  ¿Haykapitaq unquqta utaq carcelpi kaqta rikuspayku watukamurqaykiku?’, nispa. 40  Hinaptinmi kamachiqqa ninqa: ‘Chiqaptapunim nikichik: Kay wawqiykunamanta huknin uchuychan kaqpaq allin kaqta ruwaspaykichikqa ñuqapaqmi ruwarqankichik’, nispan. 41  Ichuq* lawninpi kaqkunatañataqmi ninqa: ‘Yaw ñakasqa kaqkuna, qayllaymantayá pasawaychik diablopaqwan angelninkunapaq alistasqa wiña-wiñaypaq ninaman. 42  Qamkunaqa yarqaymanta kaptiymi mana mikuykachiwarqankichikchu, yakumanta kaptiymi mana tomaykachiwarqankichikchu. 43  Forastero kaptiymi mana samaykachiwarqankichikchu*, mana pachayuq kaptiymi mana pachaykachiwarqankichikchu, unquruptiypas hinaspa carcelpi kaptiypas manam atiendeykuwarqankichikchu’, nispa. 44  Hinaptinmi paykunapas ninqaku: ‘Señorlláy, ¿haykapitaq yarqaymanta, yakumanta, forastero puriqta, mana pachayuqta, unquqta utaq carcelpi kaqta rikuspayku mana yanaparqaykikuchu?’, nispanku. 45  Hinaptinmi kaynata ninqa: ‘Chiqaptapunim nikichik: Kay uchuychakunamanta hukninpaq mana ruwaspaykichikqa ñuqapaqmi mana ruwarqankichikchu’, nispa. 46  Chaymi paykunaqa wiña-wiñaypaq wañunqaku, allin ruwaqkunam ichaqa wiña-wiñaypaq kawsanqaku”, nispa.

Willakuykuna

Utaq: “Gobiernonqa”. Qawaytaq: Palabrakuna entiendenapaq listata.
Utaq: “Haypaq”.
Utaq: “Aysanankupi”.
Utaq: “Vendeqkunaman”.
Qaway: Palabrakuna entiendenapaq listata.
Qaway: Palabrakuna entiendenapaq listata.
Utaq: “Trononpi”.
Utaq: “Paña”.
Utaq: “Lluqi”.
Utaq: “Paña”.
Kaypiqa rimachkan Adanpawan Evapa wawa-churinkunamantam.
Utaq: “Allin runa karqankichik”.
Utaq: “Allin runa karqaniku”.
Utaq: “Lluqi”.
Utaq: “Allin runachu karqankichik”.