Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

Mateo 22:1-46

  • Casarakuypi convidowan rikchanachisqanmanta (1-14)

  • Diosman hinaspa Roma nacionta kamachiqman qunamanta (15-22)

  • Wañuqkuna kawsarimunanmanta Jesusta tapusqanku (23-33)

  • Iskay hatun kamachikuymanta (34-40)

  • ¿Davidpa churinchu Cristo?, nispa tapukuymanta (41-46)

22  Kaqmantam Jesusqa rikchanachiykunawan yachachispan paykunata nirqa:  “Hanaq pacha Diospa munaychakuyninqa* rikchakunmi churinpaq casarakuy convidota ruwaq kamachikuqman.  Kay kamachikuqmi sirvientenkunata kamachirqa casarakuy convidoman hamuqkunata qayamunankupaq, paykunam ichaqa qayamuptinkupas mana hamuyta munarqakuchu.  Kaqmantam wakin sirvientenkunatapas kamachispan nirqa: ‘Convidoman hamuqkunata nimuychik: “Mikuymi listoña kachkan, ñam toroykunawan wira animalniykunapas nakasqaña, tukuy imakunapas listoñam kachkan. Hamuychikyá casarakuy convidoman”’, nispa.  Hamunankupaq kaqkunam ichaqa mana kaqpaqpas hapispanku pasakurqaku: Hukninmi chakranman, hukninñataq negocionman.  Wakinñataqmi chay sirvientekunata hapiruspanku maqaparurqaku hinaspa wañurachirqaku.  Hinaptinmi chay kamachiq runaqa piñakuruspan tropankunata kacharqa*, chaymi chay wañuchiq runakunata wañurachirqaku chaynataq llaqtankutapas kañarurqaku.  Chaymantam sirvientenkunata nirqa: ‘Casarakuy convidoqa listoñam kachkan, chay invitasqakunam ichaqa mana chay convidopaq hinachu karqaku.  Chayraykuyá llaqtamanta lluqsiq ñankunaman riychik, hinaspayá haykam tarisqaykichik runakunata nimuychik casarakuy convidoman hamunankupaq’, nispa. 10  Chaymi sirvientekunaqa ñankunaman rispanku lliw tarisqanku runakunata huñuramurqaku, allin runakunatawan mana allin runakunata, hinaptinmi casarakunapaq wasiqa chay hamuq runakunawan huntarurqa. 11  Chay kamachikuq runam invitasqakunata qawaq yaykuspan huk runata rikururqa casamientopaq hina mana pachasqata. 12  Chaymi nirqa: ‘Yaw tayta, ¿imaynataq kaymanqa yaykuramurqanki casamientopaq hina mana pachasqa kachkaspaykiqa?’, nispa. Chaymi mana imatapas rimarirqachu. 13  Hinaptinmi chay kamachiq runaqa sirvientenkunata nirqa: ‘Makintawan chakinta chaqnaruspaykichikyá hawa law tutayayman wischuychik, chaypim waqaspa kirunta kirichichichinqa’, nispa. 14  Chaynaqa, achkamá qayasqakunaqa, akllasqakunam ichaqa aschalla”, nispa. 15  Hinaptinmi fariseokunaqa* pasakurqaku hinaspam tanteanakurqaku rimasqanpi Jesusta pantarachinankupaq. 16  Chaymi qatiqninkunatawan Herodespa* runankunata kamachirqaku kaynata nimunankupaq: “Yachachikuq, yachanikum chiqap kaqta rimasqaykita, Diospa ñanninmanta imam kaqta yachachisqaykita hinaspa pipapas sayapakuyninta mana maskasqaykita, qamqariki manam runakunapa hawallantachu qawanki. 17  Chaynaqa niykuwaykuyá imam piensasqaykita: Roma nacionta kamachiqman* impuesto pagayqa, ¿allinchu kanman icha manachu?”, nispa. 18  Jesusmi ichaqa mana allin piensasqankuta yachaspan nirqa: “¡Yaw iskay uyakuna! ¿Imanasqataq pantachiwayta munankichik? 19  Qawachiwaychik impuesto pagana qullqita”, nispa. Chaymi huk denario* nisqa qullqita haywaykurqaku. 20  Hinaptinmi tapurqa: “¿Pipa uyantaq hinaspa pipa sutintaq kaypi kachkan?”, nispa. 21  Chaymi nirqaku: “Roma nacionta kamachiqpam”, nispa. Hinaptinmi nirqa: “Chaynaqa, Roma nacionpi kamachiqpa kaqtaqa paymanyá quychik, Diospa kaqtañataq Diosman quychik”, nispa. 22  Chayta uyariruspankum admirakurqaku hinaspam pasakuspanku saqirurqaku. 23  Chay punchawtaqmi saduceokuna* Jesusman asuykurqaku, paykunaqa manam creeqkuchu wañuqkuna kawsarimunantaqa, chaymi tapurqaku: 24  “Yachachikuq, Moisesmi nirqa: ‘Pipas mana churiyuq wañukuptinqa wawqinmi chay wañuqpa warminwan casarakunqa, wañukuqpa miraynin kananpaq’, nispa. 25  Ñuqaykuwanmi karqa qanchis wawqintin qarikuna, piwi* kaqmi casarakururqa hinaspanmi manaraq churiyuq kachkaspan wañukurqa, chaymi warmintaqa wawqinmanña saqirqa. 26  Chay wawqinpas manaraq churiyuq kachkaspanmi wañukurqa, hinaptinmi hukninwanña casarakurqa, paypas chaynallataqmi wañukurqa, chaynam karqa qanchis kaqkama. 27  Chaymantañataqmi warmipas wañukurqa. 28  Chaynaqa, wañuqkuna kawsarimuptinqa, ¿mayqinninpa warmintaq kanqa chay warmiqa qanchisnintinpa warmin kachkaspanqa?”, nispa. 29  Chaymi Jesus nirqa: “Qamkunaqa pantaypim kachkankichik, manam riqsinkichikchu Diospa qillqankunata, nitaq Diospa atiynintapas. 30  Wañuqkuna kawsarimuptinqa manam qarikunapas nitaq warmikunapas casarakunqakuchu, paykunaqa kanqaku hanaq pachapi angelkuna hinam. 31  Wañuqkuna kawsarimunanmantaqa, ¿manachu leerqankichik Diospa nisusqaykichikta? Paymi nirqa: 32  ‘Ñuqaqa kani Abrahanpa, Isaacpa hinaspa Jacobpa Diosninmi’, nispa. Payqa manam wañuqkunapa Diosninchu, aswanqa kawsaqkunapam”, nispa. 33  Chayta uyariruspankum runakunaqa yachachisqanwan admirasqallaña karqaku. 34  Fariseokunañataqmi saduceokunata upallarachisqanta uyariruspanku huñunakururqaku. 35  Hinaptinmi Moisespa leyninmanta yachachiq huknin fariseo pantachinanpaq tapurqa: 36  “Yachachikuq, ¿mayqintaq Moisespa leyninmanta aswan hatun kamachikuyqa?”, nispa. 37  Payñataqmi nirqa: “‘Jehova* Diosnikitam kuyanayki tukuy sunquykiwan, tukuy vidaykiwan* hinaspa tukuy yuyaynikiwan’. 38  Kaymi punta kaq hinaspa aswan hatun kamachikuyqa. 39  Kayman rikchakuq iskay kaqñataqmi nin: ‘Runamasikitam kuyanki kikikita hina’, nispa. 40  Kay iskaynin kamachikuykunamantam kanqa Moisespa llapallan leynin hinaspa Diosmanta willakuqkunapa* nisqankunapas”, nispa. 41  Chaymantañataqmi fariseokuna huñunasqa kachkaptinku Jesus tapuykurqa: 42  “¿Ima ninkichiktaq Cristomanta*? ¿Pipa churintaq?”, nispa. Paykunañataqmi nirqaku: “Davidpa churinmi”, nispa. 43  Payñataqmi tapurqa: “Hinaptinqa, ¿imaynanpitaq Davidqa chuya espiritupa* yanapakuyninwan ‘señor’ nispa suticharqa? Davidmi nirqa: 44  ‘Jehova Diosmi señorniyta nirqa: “Enemigoykikunata saruchinaykamayá alliqniypi* tiyaykuy”’, nispa. 45  Chaynaqa, ‘señor’ nispa David sutichachkaptinqa, ¿imaynataq churinqa kanman?”, nispa. 46  Hinaptinmi ima niytapas mana atirqakuchu, chay punchawmantapacham manaña pipas tapuyta munarqañachu.

Willakuykuna

Utaq: “Gobiernonqa”. Qawaytaq: Palabrakuna entiendenapaq listata.
Utaq: “Mandarqa”.
Qaway: Palabrakuna entiendenapaq listata.
Qaway: Palabrakuna entiendenapaq listata.
Kaypiqa nichkan: “Cesarman”, nispam. Chaynatam sutichaqku Roma nacionta wakin gobiernaqkunata.
Huk denario nisqa qullqiqa, huk punchaw llamkaypa pagonmi karqa. Qawaytaq: Palabrakuna entiendenapaq listata.
Qaway: Palabrakuna entiendenapaq listata.
Utaq: “Punta”.
Qaway: Palabrakuna entiendenapaq listata.
Utaq: “Almaykiwan”. Qawaytaq: Palabrakuna entiendenapaq listata.
Utaq: “Profetakunapa”. Qawaytaq: Palabrakuna entiendenapaq listata.
Qaway: Palabrakuna entiendenapaq listata.
Utaq: “Diospa atiyninpa”. Qawaytaq: Palabrakuna entiendenapaq listata.
Utaq: “Pañaypi”.