Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

Mateo 21:1-46

  • Jerusalenman Jesuspa yaykusqanmanta (1-11)

  • Templopi rantikuqkunata Jesus qarqusqanmanta (12-17)

  • Higos sacha ñakasqa kasqanmanta (18-22)

  • Jesuspa kamachikuq kasqanta mana riqsikusqankumanta (23-27)

  • Iskay churikunawan rikchanachisqanmanta (28-32)

  • Chakrapi llamkaqkuna runamasinta wañuchisqankumanta rikchanachiy (33-46)

    • Wasi pirqapa esquinanpi hapiq rumita wischupakusqankumanta (42)

21  Jerusalenman hichparuspankum Olivos muqupi Betfague llaqtachaman chayarurqaku, hinaspam iskay qatiqninkunata Jesus kamachirqa  kaynata nispan: “Riychikyá wak chinpapi llaqtachaman, chaypim tarinkichik watasqa asnota malta asnochantinta, paskamuspaykichikyá pusamuwaychik.  Pipas imatapas nisuptikichikqa ninkichikmi: ‘Señormi munachkan’, nispa. Hinaptinmi payqa chaylla quykamusunkichik”, nispa.  Chaynam karqa Diosmanta willakuqpa* rimasqan cumplikunanpaq, paymi nirqa:  “Niychik Sion llaqtata: ‘Asnopi sillasqam kamachiqninchik hamuchkan, payqa llampu sunqum, arí carga asnopa wawan malta asnochapim hamuchkan’”, nispa.  Chaymi qatiqninkunaqa rispanku Jesuspa kamachisqanman hina ruwarqaku.  Pusamurqakum maman asnota maltachantinta, hawa pachankuwan asnokunata karunaykuptinkum Jesusqa maltachanpi sillakuykurqa.  Yaqa llapallan runakunam hawan pachankuta ñanpi mastarqaku, wakinñataqmi sachakunapa kallmankunata kuchumuspanku ñanpi mastarqaku.  Puntanta riq hinaspa qipanta riq achkallaña runakunañataqmi qayaykachakuspanku nirqaku: “¡Dioslláy, ama hina kaspaykiyá Davidpa churinta salvaykuy! ¡Bendecisqayá kachun Jehova* Diospa sutinpi hamuqqa! ¡Hanaq pachapi kaqyá salvaykuchun!”, nispanku. 10  Hinaptinmi Jerusalenman Jesus chayaruptin llaqtantin runakuna afanakuchkarqaku, hinaspam nirqaku: “¿Pitaq payqa?”, nispa. 11  Jesuswan riq runakunañataqmi paykunata nirqaku: “¡Diosmanta willakuq* Jesusmi, payqa Galilea law Nazaret llaqtayuqmi!”, nispa. 12  Chaymantam Jesusqa temploman yaykuruspa chaypi rantikuqkunata* hinaspa rantiqkunata llapallanta qarqururqa, tikrarurqataqmi qullqi cambiaqkunapa mesankuta chaynataq paloma rantikuqkunapa tiyanankunatapas. 13  Hinaspam nirqa: “Qillqasqam kachkan: ‘Wasiyqa sutichasqam kanqa Diosta mañakuna wasiwan’, qamkunam ichaqa suwakunapa machayninta ruwarunkichik”, nispa. 14  Templopiqa asuykurqakutaqmi ñawsakunawan wistukunapas* hinaptinmi sanoyachirqa. 15  Templopim warmakuna qayakurqaku: “¡Dioslláy, ama hina kaspaykiyá Davidpa churinta salvaykuy!”, nispanku. Chayta uyariruspanku hinaspa Jesuspa admirakuypaq ruwasqanta qawaspankum riqsisqa sacerdotekunawan escribakuna* piñakururqaku, 16  hinaspam nirqaku: “¿Uyarichkankichu paykunapa nisqanta?”, nispa. Jesusñataqmi nirqa: “Arí uyarichkanim, ¿manachu haykapipas leerqankichik ‘warmachakunapiwan wawakunawanmi alabaykachikunki’ nisqanta?”, nispa. 17  Chaymantam Jesusqa paykunata saqiruspan llaqtamanta lluqsirurqa, hinaspam Betaniaman rispan chaypi puñurqa. 18  Tutapaytaraq Jerusalenman kutichkaspanmi yarqarachikurqa. 19  Hinaspanmi ñanpa patanpi higos sachata rikuruspan asuykurqa, ichaqa manam rurunta tarirqachu aswanqa rapillantam*, chaymi nirqa: “Kunanmantapacham manaña haykapipas rurunkichu”, nispan. Hinaptinmi higosqa chaylla chakirurqa*. 20  Chayta qawaykuspankum qatiqninkunaqa admirakuspanku nirqaku: “¿Imaynataq higos sachaqa chaylla chakirun*?”, nispanku. 21  Jesusñataqmi nirqa: “Chiqaptapunim nikichik: Iñiyniyuq kaspa mana iskayrayaspaqa manam kay higos sachawan ruwasqallaytachu ruwankichik, aswanqa kay urqutapas niwaqchikmi: ‘Huqarikuspa lamar quchaman wischukuy’, nispa. Hinaptinqa chaynam kanman. 22  Mana iskayrayaspa imatapas Diosta mañakuspaykichikqa chaskinkichikmi”, nispa. 23  Chaymantam, temploman yaykuruspan Jesus yachachichkaptin riqsisqa sacerdotekuna hinaspa llaqtapi autoridadkuna asuykuspanku nirqaku: “¿Ima derechoykiwantaq kaykunata ruwanki? ¿Pitaq kamachisurqanki?”, nispa. 24  Jesusñataqmi nirqa: “Ñuqapas tapusqaykichikyá. Chay tapukusqayta kutichiwaptikichikqa ñuqapas nisqaykichikmi ima derechoywan kaykuna ruwasqaymanta: 25  ¿Pitaq Juanta kamachirqa bautizananpaq*? ¿Hanaq pacha Dioschu icha runakunachu?”, nispa. Paykunañataqmi kikinkupura ninakurqaku: “Sichum ‘Diosmi’ nisun, hinaptinqa niwasunchá: ‘Chaynaqa, ¿imanasqataq mana creerqankichikchu?’, nispa. 26  Manataqmi nichwanchu ‘runakunam’ nispaqa, chaynata niptinchikqa llapa runakunachiki imanaruwasunpas, paykunaqariki ninkum Juanqa Diosmanta willakuq* kasqanta”, nispa. 27  Chaymi Jesusta nirqaku: “Manam yachanikuchu”, nispanku. Hinaptinmi Jesuspas nirqa: “Chaynaqa manam ñuqapas nisqaykichikchu ima derechoywan kaykuna ruwasqaytaqa. 28  ¿Ima ninkichiktaq? Huk runapam karqa iskay churinkuna. Huknintam nirqa: ‘Churilláy, rispaykiyá uvas chakranchikpi kunan llamkaramuy’, nispa. 29  Churinñataqmi nirqa: ‘Manam rillaymanchu’, nispa. Ichaqa mana kasukusqanmanta pesakuspanmi rirqa. 30  Asuykuspanmi huknin churintapas hina chaynallata nirqa. Hinaptinmi payñataq nirqa: ‘Risaqmi taytáy’, nispa. Ichaqa manam rirqachu. 31  Hinaptinqa, ¿mayqinnintaq taytanpa munasqanta ruwarqa?”, nispa. Paykunañataqmi nirqaku: “Punta kaqmi”, nispa. Jesusñataqmi nirqa: “Chiqaptapunim nikichik: Impuesto mañaqkunawan chuchumikakunaraqmi Diospa munaychakuyninmanqa* qamkunapa ñawpaqnikichikta richkanku. 32  Juanqa hamurqa allin ñanta riqsichisunaykichikpaqmi, qamkunañataqmi mana creerqankichikchu. Impuesto mañaqkunawan chuchumikakunam ichaqa creerqaku, kaykunata qawachkaspaykichikpas qamkunaqa manam wanakurqankichikchu creenaykichikpaq. 33  Kay rikchanachiytawan uyariychik: Uvas chakrayuq huk runam chakranpi uvasta plantaruspan chakranta cercorurqa, tuqururqataqmi uvaspa rurunta sarunapaq uchkutapas, ruwarqataqmi cuidanapaq altosniyuq chuklla wasichatapas, hinaspanmi chakrapi llamkaqkunaman arriendakuruspan huk law nacionman ripukurqa. 34  Uvas cosechay tiempo chayaramuptinmi chay runaqa sirvientenkunata kacharqa arriendaqkunamanta uvaspa rurunta mañamunankupaq. 35  Arriendaqkunam ichaqa chay sirvientekunata hapirurqaku hinaspam hukninta maqarurqaku, huknintañataq wañurachirqaku, huknintañataqmi rumiwan chuqaparurqaku. 36  Hinaptinmi kaqmanta chay chakrayuq runaqa punta sirvientenkunamanta aswan achkataraq kacharqa*, ichaqa paykunatapas chaynallatam ruwarurqaku. 37  Qipatañataqmi churinta kacharqa*: ‘Churiytaqa respetanqakum’, nispan. 38  Ichaqa churinta rikuruspankum llamkaqkunaqa ninakurqaku: ‘Paymi herencia chaskiqqa. ¡Hamuychikyá wañurachisunchik hinaspa herencianwan qipakusunchik!’, nispa. 39  Chaymi hapiruspanku uvas chakramanta hurquruspa wañurachirqaku. 40  Chaynaqa, uvas chakrayuq hamuruspanqa, ¿imatataq ruwanqa chay llamkaqkunata?”, nispa. 41  Paykunañataqmi nirqaku: “Mana allin kasqankuraykum paykunataqa wañurachinqa hinaspam huk llamkaqkunamanña uvas chakranta arriendakunqa, paykunaqa tiempollanpim rurunta qunqaku”, nispa. 42  Chaymi Jesus nirqa: “¿Manachu haykapipas Diospa qillqankunapi leerqankichik ‘pirqaqkunapa wischupakusqanku rumiqa wasi pirqapa esquinanpi hapiq rumiñam rikurirun. Chay rumiqa Jehova Diosmantam hamurqa hinaspapas admirakuypaqmi’ niqta? 43  Chaymi nikichik: Diospa munaychakuyninqa qamkunamanta qichusqa kaspanmi ruruq nacionmanña qusqa kanqa. 44  Kay rumipa hawanman pipas wichiykuqqa ñutusqam kanqa. Pimanpas kay rumi wichiykuspanqa ñitirunqam”, nispa. 45  Rikchanachisqankunata uyariruspankum riqsisqa sacerdotekunawan fariseokunaqa musyakurqaku paykunamanta rimasqanta. 46  Chaymi aswanraq hapiruyta munarqaku, ichaqa runakunatam manchakurqaku, runakunaqa creerqakum Jesusqa Diosmanta willakuq* kasqanta.

Willakuykuna

Utaq: “Profetapa”. Qawaytaq: Palabrakuna entiendenapaq listata.
Qaway: Palabrakuna entiendenapaq listata.
Utaq: “Profeta”.
Utaq: “Vendeqkunata”.
Utaq: “Wiqrukunapas”.
Qaway: Palabrakuna entiendenapaq listata.
Utaq: “Llaqillantam”.
Utaq: “Tawirurqa”.
Utaq: “Tawirun”.
Utaq: “Yakupi challpunanpaq”.
Utaq: “Profeta”.
Utaq: “Gobiernonmanqa”. Qawaytaq: Palabrakuna entiendenapaq listata.
Utaq: “Mandarqa”.
Utaq: “Mandarqa”.
Utaq: “Profeta”.