Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

Mateo 19:1-30

  • Casarakuymantawan divorciakuymanta (1-9)

  • Solterolla kanamanta (10-12)

  • Wawakunapaq Jesuspa Diosta mañakusqanmanta (13-15)

  • Apu mozopa tapukusqanmanta (16-24)

  • Tukuy imata saqispa Jesusta qatinamanta (25-30)

19  Kaykunamanta Jesus rimayta tukuruspanmi Galileamanta rispan Jordan mayuta chimparqa, hinaspanmi Judea lawpa hichpanman chayarurqa.  Chaymantapas Jesustaqa achkallaña runakunam qatirqaku, hinaptinmi paykunata chaypi sanoyachirqa.  Fariseokunañataqmi* pantachinankupaq asuykuspanku tapurqaku: “¿Imaraykullapas qariqa warminmanta divorciakunmanchu?”, nispa.  Jesusñataqmi nirqa: “¿Manachu leerqankichik Diosqa qallariymantapacha qaritawan warmita unanchasqanmanta?  Paymi nirqa: ‘Chayraykum qariqa tayta-mamanta saqispan warminmanña hukllawakunqa hinaptinmi huk aychallaña kanqaku’, nispa.  Chaynaqa manam iskayñachu kanku aswanqa huk aychallañam. Hinaptinqa Diospa kuskanchasqantaqa amayá pipas rakichunchu”, nispa.  Paykunañataqmi nirqaku: “Chaynaqa, ¿imanasqataq Moisesqa nirqa divorciakuna papelta quykuspan warminmanta pipas divorciakunanpaq?”, nispa.  Hinaptinmi Jesusñataq paykunata nirqa: “Moisesqa rumi sunqu kasqaykichikraykum saqirqa warmikichikmanta divorciakunaykichikpaq, qallariymantam ichaqa mana chaynachu karqa.  Ñuqam nikichik: Mana huchapakuchkaptin* pipas warminmanta divorciakuspan hukwan casarakuqqa pierdekuy* huchamanmi wichiykun”, nispa. 10  Qatiqninkunañataqmi nirqaku: “Chayna kaptinqa, yanqañachiki casarakuyqa”, nispanku. 11  Chaymi Jesus nirqa: “Manam llapankuchu nisqaykichikman hinaqa kanku, aswanqa chaypaq kaqkunallam. 12  Kanmi nacesqankumantapacha mana casarakuy atiqkuna, kantaqmi runakuna caparuptinku mana casarakuy atiqkuna, wakinñataqmi hanaq pacha Diospa munaychakuyninrayku* kikinkumanta mana casarakuyta munankuchu. Pipas mana casarakuspa kawsakuy atiqqa, chaynayá kawsakuchun”, nispa. 13  Chaymantam warmachakunata Jesusman pusamurqaku, makinta paykunaman churaykuspa Diosta mañapunanpaq, qatiqninkunañataqmi pusamuqkunata qaqcharqaku. 14  Jesusmi ichaqa nirqa: “Amayá harkaychikchu, hinayá warmakunaqa ñuqaman hamuchun, kay warmakuna hina kaqkunapaqmi hanaq pacha Diospa munaychakuyninqa”, nispa. 15  Chaymi makinta warmakunaman churaykuspan chaymanta pasakurqa. 16  Chaymantam huk runa asuykuspan tapurqa: “Yachachikuq, ¿ima allintataq ruwanay wiñay kawsayta chaskinaypaq?”, nispa. 17  Payñataqmi nirqa: “¿Imanasqataq ñuqata tapuwanki imam allin kaqmanta? Hukllam allin kaqqa. Ichaqa kawsakuyta munaspaykiqa kamachikuykunatam tukuy tiempo kasukunayki”, nispa. 18  Paymi nirqa: “¿Mayqinkunata?”, nispa. Hinaptinmi Jesus mayqinkuna kasqanmanta nirqa: “Amam pitapas wañuchinkichu, amam hukwanqa pierdekunkichu*, amam suwakunkichu, amam llullataqa willakunkichu, 19  tayta-mamaykitam respetanki, runamasikitapas kikikita hinam kuyanki”, nispa. 20  Hinaptinmi chay mozoqa nirqa: “Tukuy chaykunataqa kasukurqanim, ¿imataraqtaq ruwanay?”, nispa. 21  Jesusñataqmi nirqa: “Mana pantaq runa kayta munaspaykiqa, rispaykiyá tukuy imaykikunata rantikaramuspa* wakchakunaman quykamuy, chaymi hanaq pachapi kapuqnikikuna kanqa, hinaspayá qatiqniyña kay”, nispa. 22  Chayta uyariruspanmi mozoqa llakisqallaña pasakurqa achka kapuqniyuq kasqanrayku. 23  Chaymi Jesusñataq qatiqninkunata nirqa: “Chiqaptapunim nikichik: Apu runapaqqa sasam kanqa hanaq pacha Diospa munaychakuyninman yaykuyqa. 24  Nikichiktaqmi: Diospa munaychakuyninman apu runapa yaykunanmantaqa camelloraqchá agujapa rinrinta yaykurunman”, nispa. 25  Chayta qatiqninkuna uyariruspanmi anchata admirakuspanku nirqaku: “Chaynaqa, ¿pitaqsi salvasqaqa kanman?”, nispanku. 26  Hinaptinmi paykunata qawariykuspan Jesus nirqa: “Runakunapaqqa kayqa mana atinanmi, Diospaqmi ichaqa tukuy imapas atinallan”, nispa. 27  Hinaptinmi Pedro nirqa: “Ñuqaykuqa tukuy imata saqiruspam qamta qatichkaykiku, ¿imataq ñuqaykupaqqa kanqa?”, nispa. 28  Jesusñataqmi nirqa: “Chiqaptapunim qamkunata nikichik: Tukuy imapas musuqyanan tiempopi runapa churin* achkirichkaq kamachinanpaq tiyananpi* tiyaykuptinmi, qamkunapas tiyaykunkichik chunka iskayniyuq tiyanakunapi, hinaspam juzgankichik chunka iskayniyuq Israel ayllukunata. 29  Chaymantapas, sutiyrayku pipas wasinkunata, wawqi-paninkunata, tayta-mamanta, wawa-churinkunata hinaspa chakrankunata saqiqqa aswan achkataraqmi chaskinqa, chaskinqataqmi wiñay kawsaytapas. 30  Ichaqa achkallaña puntapi kaqkunam qipapi kanqaku, qipapi kaqkunañataqmi puntapi kanqaku.

Willakuykuna

Qaway: Palabrakuna entiendenapaq listata.
Kayqa, qari kayninwan utaq warmi kayninwan millakuypaq kaqkunata ruwaymi. Qawaytaq: Palabrakuna entiendenapaq listata.
Utaq: “Waqllikuy”.
Utaq: “Gobiernonrayku”. Qawaytaq: Palabrakuna entiendenapaq listata.
Utaq: “Waqllikunkichu”.
Utaq: “Vendemuspa”.
Qaway: Palabrakuna entiendenapaq listata.
Utaq: “Trononpi”.