Mateo 18:1-35

  • Hanaq pacha Diospa munaychakuyninpi aswan riqsisqa kasqanmanta (1-6)

  • Pantachikuykunamanta (7-11)

  • Chinkasqa ovejawan rikchanachisqanmanta (12-14)

  • Iñiqmasinchikta yanapanamanta (15-20)

  • Mana pampachay munaq sirvientewan rikchanachiymanta (21-35)

18  Chay ratom qatiqninkuna Jesusman asuykuspa tapurqaku: “¿Pitaq hanaq pacha Diospa munaychakuyninpi* aswan riqsisqaqa?”, nispanku.  Chaymi warmachata qayaykuspan chawpinkupi sayaykachirqa,  hinaspam nirqa: “Chiqaptapunim nikichik: Piensasqaykichikta mana tikraspaykichikqa hinaspa warmachakuna hina mana kaspaykichikqa manapunim hanaq pacha Diospa munaychakuyninmanqa yaykunkichikchu.  Chaynaqa, kay warmacha hina pipas humillakuqmi hanaq pacha Diospa munaychakuyninpi aswan riqsisqaqa.  Kayna warmachata sutiypi pipas chaskiqqa ñuqatapas chaskiwanmi.  Ichaqa, ñuqapi iñiq kay uchuychakunamanta hukninta pipas huchallichiqpaqqa, aswan allinchá kanman asnopa muyuchinan molino rumita kunkanman wataruspanku lamar quchapa chawpinman wischuyninkuqa.  ¡Ay imaynaraq runakunaqa kanqaku pantachikuykuna kasqanrayku, pantachikuykunaqa kanqapunim! Ichaqa, ¡imaynaraq kanqa pantachiq runaqa!  Chayraykuyá makiki utaq chakiki pantachisuptikiqa* kuchukuruspayki wikaparuy. Aswan allinqa kanman kawsay vidaman mana makiyuq utaq mana chakiyuq yaykuynikim, iskaynin makiyuq hinaspa iskaynin chakiyuq wiñaypaq rupachkaq ninaman wischusqa kanaykimantaqa.  Chaymantapas ñawiki pantachisuptikiqa hurqukuruspaykiyá wikaparuy. Aswan allinqa kanman kawsay vidaman chullalla ñawiyuq yaykuynikim, iskaynin ñawintin rupachkaq gehena* nisqaman wischusqa kanaykimantaqa. 10  Amam despreciankichikchu kay uchuychakunamanta huknintaqa, nikichikmi: Paykunapa angelninkum hanaq pacha taytaypa qayllanpi tukuy tiempo kachkanku. 11  *⁠—⁠— 12  ¿Ima ninkichiktaq? Pachak ovejayuq runapa huknin ovejan chinkaruptinqa, ¿manachu isqun chunka isqunniyuq ovejanta urqupi saqiykuspan chay chinkasqa ovejanta maskaq rinqa? 13  Tariruspanmi ichaqa isqun chunka isqunniyuq mana chinkasqa ovejankunamantapas aswanqa kusikun chinkaruq ovejanta tarirusqanwan. 14  Chaynallataqmi hanaq pachapi taytaypas mana munanchu kay uchuychakunamanta hukllanpas chinkarunantaqa. 15  Chaymantapas, sichum wawqiki qampa contraykipi huchallikuptinqa rispaykiyá pantasqanmanta sapallanpi rimapayaykuy. Uyarisuptikiqa allinta ruwananpaqmi wawqikita yanaparunki. 16  Mana uyarisuptikim ichaqa huk utaq iskay testigokunata pusanki, chaynapi iskay utaq kimsa testigokunapa rimasqanwan ima sasachakuypas allichasqa kananpaq. 17  Paykunatapas mana uyariptinqa iñiqkunamanyá* willay. Iñiqkunatapas mana uyariptinqa qampaqyá kachun impuestokuna mañaq hina chaynataq mana judio runakuna hina. 18  Chiqaptapunim nikichik: Kay pachapi imapas watasqaykichikqa hanaq pachapipas watasqañam kanqa, chaynallataqmi kay pachapi imapas paskasqaykichikqa hanaq pachapipas paskasqaña kanqa. 19  Kaqmantam nikichik: Sichum qamkunamanta iskay runakuna kay pachapi imapas allin kaqmanta Diosta mañakunankupaq tanteaptinqa, hanaq pachapi taytaymi mañakusqaykichikta qusunkichik. 20  Iskayllapas utaq kimsallapas sutiypi huñunakuptinkuqa paykunapa chawpinpim ñuqaqa kachkani”, nispa. 21  Hinaptinmi Pedro asuykuspa nirqa: “Señor, ¿hayka kutikamataq pampachanay ñuqapa contraypi wawqiy huchallikuptin? ¿Qanchis kutikamachu?”, nispa. 22  Hinaptinmi Jesusñataq nirqa: “Manam qanchis kutikamallachu, aswanqa qanchis chunka qanchisniyuq kutikamam. 23  Chaymi hanaq pacha Diospa munaychakuyninqa rikchakun sirvientenkunamanta cuentata mañaq kamachikuqman. 24  Cuenta mañayta qallaykuptinmi pusamurqaku chunka waranqa talento* nisqa qullqi debeqnin runata. 25  Pagapunanpaq mana kaptinmi patronninqa kamachirqa chay sirviente, warmintin, churintin chaynataq tukuy kapuqnintin rantikusqa* kananpaq, chaynapi pagapunanpaq. 26  Chaymi sirvienteqa ñawpaqninpi kumuykuspan ruegakurqa: ‘Suyaykullawayyá, lliwtam pagapullasqayki’, nispan. 27  Llakipayariykuspanmi patronqa lliw debesqanmanta pampachaykuspan pasakunanpaq kachaykurqa. 28  Ichaqa, chay sirviente lluqsiruspanmi pachak denario* nisqa qullqi debeqnin sirvientemasinwan tuparurqa, hinaspam kunkamanta hapiruspan nirqa: ‘Lliw debewasqaykita pagapuway’, nispan. 29  Chaywanmi sirvientemasinqa qunqurakuykuspan ruegakurqa: ‘Suyaykullaway, pagapullasqaykim’, nispan. 30  Payñataqmi mana munarqachu, aswanqa carcelmanmi churarachirqa debesqanta pagapunankama. 31  Chayta rikuruspankum sirvientemasinkunaqa llumpayta llakikururqaku, hinaspam patronman rispanku tukuy chaykunamanta willarqaku. 32  Chaymi patronqa qayarachimuspan nirqa: ‘Yaw mana allin sirviente, ruegakuwaptikim ñuqaqa lliw debewasqaykita pampachaykurqayki. 33  Chaynaqa, ¿manachu qampas sirvientemasikitaqa llakipayarikuwaq karqa ñuqapas qamta llakipayasqayman hina?’, nispa. 34  Chaymi patronqa llumpayta piñakuruspan carcelpi guardiakunaman entregaykurqa lliw debesqanta pagapunankama. 35  Chaynallatataqmi hanaq pachapi taytaypas qamkunata ruwasunkichik, wawqikichikta sapakama sunqumanta mana pampachaptikichikqa”, nispa.

Willakuykuna

Utaq: “Gobiernonpi”. Qawaytaq: Palabrakuna entiendenapaq listata.
Kaypiqa nichkan: “Urmachisuptikiqa”, nispam.
Chayqa karqa Jerusalenpa hawa lawninpi basura kañananku sitiom. Qawaytaq: Palabrakuna entiendenapaq listata.
Kay versiculoqa manam kanchu ñawpa tiempo qillqakunapiqa. Wakin bibliakunapi kaspanqa manam Diospa yanapayninwan qillqasqachu.
Kaypiqa rimachkan huñunakuypi punta apaqkunamantam. Qawaytaq: Deuteronomio 19:16, 17 nisqantapas.
10.000 talento nisqa qullqiqa 60.000.000 denario nisqa qullqim. Qawaytaq: Palabrakuna entiendenapaq listata.
Utaq: “Vendesqa”.
Huk denario nisqa qullqiqa huk punchaw llamkaypa pagonmi karqa. Qawaytaq: Palabrakuna entiendenapaq listata.