Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

Mateo 17:1-27

  • Jesuspa rikchaynin tikrakusqanmanta (1-13)

  • Mostaza muhu sayayllapas iñiyniyuq kanamanta (14-21)

  • Wañukunanmanta Jesuspa yapamanta willakusqan (22, 23)

  • Challwapa siminpi qullqita tarisqanwan impuesto pagasqanmanta (24-27)

17  Suqta punchaw pasaruptinmi Jesusqa: Pedrota, Santiagota hinaspa Santiagopa wawqin Juanta pusarikuspan hatun urquman rirqa, hinaspam chaypi sapallanku karqaku.  Paykunapa qayllanpim Jesuspa rikchaynin tikrakururqa: Uyanmi inti hinaraq kancharirqa, hawanpi pachanpas suma-sumaqllatañam llipipipirqa.  Hinaptinmi Moiseswan Elias rikurirurqa, paykunam Jesuswan rimachkarqaku.  Chaymi Jesusta Pedro nirqa: “Señor, ima sumaqmi kaypi kasqaykuqa. Munaptikiqa kaypiyá kimsa carpata ruwarusaq: Hukninta qampaq, hukta Moisespaq, huktañataq Eliaspaq”, nispa.  Rimachkaptinraqmi kancharichkaq puyu paykunata tapaykurqa, hinaptinmi puyumanta kaynata nimurqa: “Paymi kuyasqay churiy, paytam kuyani hinaspapas chaskinim, uyariychikyá”, nispa.  Qatiqninkunañataqmi chayta uyariruspanku llumpayta mancharikurqaku hinaspam pampaman kumuykurqaku.  Hinaptinmi Jesusqa asuykuspan paykunata llachpaykurqa, hinaspam nirqa: “Hatariychik, amayá manchakuychikchu”, nispa.  Qawarispankuñataqmi mana pitapas rikurqakuchu aswanqa Jesusllatañam rikurqaku.  Chay urqumanta uraykamuchkaptinkum Jesusqa kaynata kamachirqa: “Rikusqaykichiktaqa amam pimanpas willakunkichikchu runapa churin* wañusqanmanta kawsarimunankama”, nispa. 10  Qatiqninkunam ichaqa tapurqaku: “¿Imanasqataq escribakunaqa* ninku Elias puntata hamunanmanta?”, nispa. 11  Hinaptinmi Jesusñataq nirqa: “Eliasqa hamuchkanmi, hinaspam tukuy imata allichanqa. 12  Ichaqa nikichikmi: Eliasqa ñam hamurunña hinaptinmi mana riqsispanku munasqankuta paywan ruwarunku. Chaynallatataqmi paykunaqa runapa churintapas ñakarichinqaku”, nispa. 13  Hinaptinmi qatiqninkunaqa yacharurqaku bautizaq Juanmanta rimasqanta. 14  Runakunapa kasqanman asuykuptinkum Jesusman huk runa asuykurqa, hinaspam ñawpaqninpi qunqurakuykuspan nirqa: 15  “Señorlláy, churillaytayá llakipayaykuy, payqa wañuy unquyniyuq* kaspanmi llumpayta ñakarichkan, achka kutitam ninaman wichiykun wakin kutitañataqmi yakuman, 16  chaymi qatiqnikikunaman pusamurqani, ichaqa manam sanoyachiyta atinkuchu”, nispa. 17  Jesusñataqmi nirqa: “Yaw, mana iñiyniyuq hinaspa mana allin runakuna*, ¿haykapikamataq qamkunawan kasaq? ¿Haykapikamataq aguantasqaykichik? Kayman pusamuwaychik chay warmachata”, nispa. 18  Hinaptinmi Jesusqa demoniota qaqcharqa, chaymi warmamanta demonio lluqsiruptin chay horamantapuni sanoyarurqa. 19  Chaymantam qatiqninkuna Jesusman sapallanpi asuykuspanku tapurqaku: “¿Imanasqataq ñuqaykuqa demonio qarquytaqa mana atirqanikuchu?”, nispanku. 20  Jesusñataqmi paykunata nirqa: “Pisi iñiyniyuq kasqaykichikraykum. Chiqaptapunim nikichik: Mostaza muhu* sayayllapas iñiynikichik kaptinqa, kay urqutam niwaqchik, ‘kaymanta wakman riy’ nispa, hinaptinqa chaypiñam rikurirunman. Arí, manam imapas mana atinaykichikqa kanqachu”, nispa. 21  *⁠—⁠— 22  Chaymantam Galileapi huñunasqa kachkaptinku qatiqninkunata Jesus nirqa: “Runapa churinqa runakunapa makinmanmi entregasqa kanqa, 23  hinaptinmi wañuchinqaku. Ichaqa kimsa punchawmantam kawsarimunqa”, nispa. Chaymi anchallataña llakikururqaku. 24  Capernaum llaqtaman chayaruptinkum Pedroman asuykurqaku templopaq impuesto* mañaqkuna, hinaspam nirqaku: “¿Manachu yachachiqnikichikqa pagan templopaq impuestota?”, nispa. 25  Pedroñataqmi nirqa: “Arí paganmi”, nispa. Ichaqa wasiman Pedro yaykuruptinmi Jesusqa puntata rimapayarqa: “¿Ima ninkitaq Simon? ¿Pikunamantataq kay pachapi kamachikuqkunaqa impuestokunata mañanku? ¿Churinkunamantachu icha huk runakunamantachu?”, nispa. 26  “Huk runakunamantam” nispa Pedro niptinmi, Jesusñataq nirqa: “Chaynaqa churikunaqa manam impuestotaqa pagananchu, ¿aw? 27  Ichaqa ama piñakunankupaqyá lamar quchaman rispa anzueloykita wischuykuy, hinaspam punta challwa hapisqaykipa siminta kichaykuspayki huk qullqita* tarinki. Chay qullqitayá paykunaman quykuy ñuqamantawan qanmanta”, nispa.

Willakuykuna

Qaway: Palabrakuna entiendenapaq listata.
Qaway: Palabrakuna entiendenapaq listata.
Utaq: “Wañuy mañayuq”.
Utaq: “Kay tiempopi runakuna”.
Kayqa Israel lawpi uchuychalla muhucham, tawa metro mastam wiñan.
Kay versiculoqa manam kanchu ñawpa tiempo qillqakunapiqa. Wakin bibliakunapi kaspanqa manam Diospa yanapayninwan qillqasqachu.
Kaypiqa nichkan: “Iskay dracma qullqi”, nispam.
Kaypiqa nichkan: “Estater sutiyuq qullqita”, nispam. Sutichaqkum tetradracma sutiyuq qullqi nispa.