Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

Mateo 11:1-30

  • Bautizaq Juan hatunchasqa kasqanmanta (1-15)

  • Rumi sunqu runakuna qaqchasqa kasqankumanta (16-24)

  • Jesusmi hanaq pacha taytanta hatunchan humilde runakunata akllasqanmanta (25-27)

  • Jesuspa yugon apayqa kusikunapaq kasqanmanta (28-30)

11  Chunka iskayniyuq qatiqninkunaman yachachiyta tukuruspanmi Jesusqa rirqa huk law llaqtakunapipas willakunanpaq hinaspa yachachinanpaq.  Juanñataqmi carcelpi kachkaspan Cristopa* ruwasqankunamanta yacharurqa, hinaspam qatiqninkunata kacharqa*  kaynata tapumunankupaq: “¿Qamchu kachkanki suyasqayku runa, icha huktachu suyasaqku?”, nispa.  Hinaptinmi Jesus nirqa: “Riychikyá hinaspa Juanman willamuychik uyarisqaykichikmantawan qawasqaykichikmanta:  Ñawsakunam kaqmanta qawakuchkanku, wistukunam* purichkanku, leprawan unquqkunam sanoyachkanku, mana uyariqkunam uyarichkanku, wañuqkunam kawsarimuchkanku, wakchakunapas sumaq willakuytam uyarichkanku.  Mayna kusisqam pipas mana iskayrayaspa ñuqapi hapipakuqqa”, nispa.  Paykuna pasakuptinmi Juanmanta rimaspan achkallaña runakunata Jesus tapurqa: “¿Imata qawaqtaq chunniqmanqa rirqankichik? ¿Wayrapa aywityachisqan suqusta qawaqchu?  Icha, ¿imata qawaqmi lluqsirqankichik? ¿Fino pachawan pachasqa runata qawaqchu? Chayna pachasqa runaqa kamachiqkunapa wasinpim kachkan.  Chaynaqa, ¿imamanmi lluqsirqankichik? ¿Diosmanta willakuqta* qawaqchu? Ñuqam qamkunata nikichik: Chay qawaq risqaykichik runaqa Diosmanta willakuqkunamantapas aswan riqsisqaraqmi. 10  Paymantam kayna qillqasqa kachkan: ‘Ñuqam willakuqniyta kachamuchkani ñawpaqnikita rinanpaq, paymi ñannikita allichapusunki’, niq. 11  Chiqaptapunim nikichik: Warmimanta nacemuqkunamantaqa manam pipas rikurimurqachu bautizaq Juanmanta aswan riqsisqaqa, chayna kaptinpas hanaq pacha Diospa munaychakuyninpi* mana ancha riqsisqa runam paymanta aswan riqsisqaqa. 12  Ichaqa bautizaq Juanpa tiemponmanta kunankamam runakunaqa hanaq pacha Diospa munaychakuyninta haypanankupaq anchata kallpanchakuchkanku, chaymi haypanankupaq kallpanchakuqkunaqa haypanqaku. 13  Diosmanta llapallan willakuqkunapa* qillqasqanpas hinaspa Moisespa leyninpas Juanpa tiemponkamallam willakurqa, 14  qamkuna chaskiyta munaptikichikqa paypunim ‘Eliasqa, paymi hamunqa’. 15  Pipas rinriyuqqa uyarichunyá. 16  Hinaspapas, ¿piwantaq kay tiempopi runakunata rikchanachiyman? Paykunaqa rikchakunkum plazakunapi tiyaspa pukllaqmasinkunata qayaykachaq warmachakunaman, 17  hinaspam ninku: ‘Quenata* tocapuptiykupas manam tusunkichikchu, llaki takita takipuptiykupas manataqmi llakikunkichikchu’, nispa. 18  Chaymantapas Juanqa hamurqa ayunaspa chaynataq vinota mana tomaspanmi, ichaqa runakunam ninku: ‘Payqa demonioyuqmi’, nispa. 19  Runapa churinñataqmi* hamurqa mikuspa hinaspa tomaspa, ichaqa runakunam ninku: ‘Mikuysapa hinaspa vino tomakuq, impuesto mañaqkunapa chaynataq huchasapakunapa amistadnin’, nispa. Chayna kaptinpas runapa allin ruwasqankunam qawachin yachayniyuq kasqanta”, nispa. 20  Hinaspanmi Jesusqa maypim achkallaña milagrokuna ruwasqan llaqtakunapi runakunata qaqchayta qallaykurqa, paykunaqariki manam wanakurqakuchu, chaymi Jesus nirqa: 21  “¡Ay imaynaraq kankichik Corazin hinaspa Betsaida sutiyuq llaqtakuna! Sichu Tiro hinaspa Sidon llaqtakunapi kay admirakuypaq milagrokuna ruwakunman karqa, hinaptinqa llaki pachawan churakuspankuchá uchpapi tiyaspanku unayña wanakunmanku karqa. 22  Ichaqa nikichikmi: Juicio punchawpiqa Tiro hinaspa Sidon llaqtakunaraqmi qamkunamantaqa aswan llakipayasqa kanqa. 23  ¡Yaw Capernaum llaqta! ¿Hanaq pachamanchu huqarisqa kanki? Manamá. Sepulturamanmi* uraykunkiqa. Capernaum llaqtapi admirakuypaq milagrokuna ruwasqay Sodoma llaqtapipas ruwakuptinqa kunankamaraqchá chay llaqtaqa kachkanman karqa. 24  Chayraykum nikichik: Juicio punchawpiqa Sodoma hinaspa Gomorra llaqtakunaraqmi qamkunamantaqa aswan llakipayasqa kanqa”, nispa. 25  Chay kutipim Jesus nirqa: “Hanaq pachapipas kay pachapipas kamachikuq taytáy, hukkunapa qayllanpim hatunchayki, qamqa kaykunatam pakaykurqanki yachayniyuqkunamantawan yuyaysapakunamanta, hinaspam qawaykachinki warmachakuna hina humilde runakunaman. 26  Arí taytalláy, chayna kananpaqmi qamqa tantearurqanki”, nispa. 27  Jesusqa nirqataqmi: “Tukuy imakunatam taytayqa quykuwan, ñuqa churitaqa manam pipas allintaqa riqsiwanchu aswanqa taytallaymi, manataqmi taytaytaqa pipas allintaqa riqsinchu aswanqa ñuqa churillanmi, hinaspapas churipa riqsichiyta munasqan runallam taytaytaqa riqsin. 28  Ñuqamanyá hamuychik llapallan hukmanyasqakuna hinaspa llasaq qipiyuqkuna, ñuqam samaykachisqaykichik. 29  Yugoyta apaspayá ñuqamanta yachaychik, ñuqaqa kani llampu sunqu hinaspa humillakuqmi, chaynata ruwaspaqa hawkayaytam tarinkichik. 30  Yugoyqa mana llasaqmi qipiypas sampallataqmi”, nispa.

Willakuykuna

Qaway: Palabrakuna entiendenapaq listata.
Utaq: “Mandarqa”.
Utaq: “Wiqrukunam”.
Utaq: “Profetata”. Qawaytaq: Palabrakuna entiendenapaq listata.
Utaq: “Gobiernonpi”. Qawaytaq: Palabrakuna entiendenapaq listata.
Utaq: “Profetakunapa”.
Utaq: “Flautata”.
Qaway: Palabrakuna entiendenapaq listata.
Utaq: “Hades”. Qawaytaq: Palabrakuna entiendenapaq listata.